އެފް.އެޗް.ޓީ.އެސް އާއި އަލަށް ގުޅުނު ދަރިވަރުންނަށް ބާއްވާ އޮރިއެންޓޭޝަން ބާއްވައިފި

ދިވެހިރާއްޖޭގެ ގައުމީ ޔުނިވާސިޓީގެ ފެކަލްޓީ އޮފް ހޮސްޕިޓަލިޓީ އެންޑް ޓުއަރިޒަމް ސްޓަޑީސްއަށް އަލަށް ގުޅުނު ދަރިވަރުންނަށް ބާއްވާ އޮރިއެންޓޭޝަންތައް ބާއްވައިފިއެވެ. މިފަހަރުގެ އޮރިއެންޓޭޝަން ބޭއްވީ ދެބަޔަކަށް ބަހާލައިގެންނެވެ. އެއީ ފޭސް-ޓު-ފޭސްކޮށް ބޭއްވި އޮރިއެންޓޭޝަން އަކާއި އޮންލައިން އޮރިންއަންޓޭޝަން އެކެވެ.

ފޭސް-ޓު-ފޭސް އޮރިންއަންޓޭޝަން ބޭއްވީ ސެޓްފިކެޓް 3 ގެ ކޯސްތަކާއި އަދި އެޑްވާންސް ސެޓްފިކެޓްގެ ކޯސް ހަދާ ދަރިވަރުންނަށެވެ. ޑިގްރީ ހަދާ ދަރިވަރުންނަށް އޮރިއެންޓޭޝަން ބާއްވާފައިވަނީ އޮންލައިންކޮށެވެ. 

22 އޯގަސްޓް 2021 ވީ އާދީއްތަ ދުވަހުގެ މެންދުރު އެމް.އެން.ޔޫ އެފް.އީ އޮޑިޓޯރިއަމްގައި ބޭއްވި ފޭސް-ޓު-ފޭސް އޮރިއެންޓޭޝަންގައި އެފް.އެޗް.ޓީ.އެސް އާއި އަލަށް ގުޅުނު ދަރިވަރުންގެ ތެރެއިން ސެޓްފިކެޓް ލެވެލްގެ ކޯސްތަކާއި، އެޑްވާންސް ސެޓްފިކެޓްގެ ކޯހުގެ ގިނަ އަދަދެއްގެ ދަރިވަރުން ބައިވެރިވެފައިވާއިރު، ފެކަލްޓީގެ ޑީން އާއި، އެފް.އެޗް.ޓީ.އެސްގެ އިސްވެރިންނާއި، ލެކްޗަރާސްގެ އިތުރުން، ސޮސައިޓީ ފޯ ހޮސްޕިޓަލިޓީ އެންޑް ޓުއަރިޒަމް ސްޓަޑީސް (ޝެޓްސް)ގެ ހިންގާ ކޮމެޓީގެ މެންބަރުންގެ އިތުރުން ބައެއް އިސްވާރުން (ލީޑަރުން) ވަނީ ބައިވެރިވެފައެވެ.

މި އޮރިއެންޓޭޝަންގައި ފެކަލްޓީގެ ޑީން ޒީނަތު ޞާލިޙު ދަރިވަރުންނާއި މުޚާޠަބުކޮށް ދެއްކެވި ވާހަކައިގައި ކިޔެވުމުގައި ކުރިޔަށް ދާންވީގޮތްތައް ކިޔާދެއްވުމުގެ އިތުރުން ވަރަށް އަގުހުރި ނަސޭޙަތްތަކެއް ވަނީ ދެއްވާފައެވެ. އަދި އަލަށް ކިޔަވަން ފަށާ ދަރިވަރު ކޯހުގެ ވަކި ހިސާބަކުން ކޯސް މެދުކަނޑާލުމަކީ މިސް ވަރަށް ކަންބޮޑުވާ ކަމެއް ކަމުގައިވަނީ ފާހަގަ ކޮށްފައެވެ. އަލަށް ގުޅޭ ދަރިވަރުން މިފަދަ ކަންތައް ނުކުރުމަށް ޑީންވަނީ އެދިފައެވެ.

ޒީނަތު މިސްގެ ވާހަކައަށްފަހު ދެން ދަރިވަރުންނާއި ބައްދަލުކޮށް ވާހަކަ ދެއްކެވީ ފެކަލްޓީގެ ލެކްޗަރަރ އެއްކަމަށްވާ ރިފްގާ މިސްއެވެ. މިސްގެ ވާހަކަ ބޮޑަށް އަމާޒުކޮށްފައިވަނީ ދަރިވަރުންގެ ޢަމަލުތައް ބަހައްޓަންވީ ގޮތުގެ މައްޗަށެވެ. މިގޮތުން ހެދުން އެޅުމުގައި ސަމާލުވުމަށާއި ދަރިވަރުންގެ ހާޒިރީ ރަނގަޅު ކުރުމަށް ވަނީ ނަސޭހަތް ދެއްވާފައެވެ. އަދި ދަރިވަރަކު ބަލިވެއްޖެނަމަ ކަންތައް ކުރަންވީގޮތް ވެސް ރިފްގާ މިސް ވަނީ ދަރިވަރުންނަށް ކިޔާދީފައެވެ.

އޮރިއެންޓޭޝަންގެ ތެރެއިން އަލަށް ގުޅުނު ދަރިވަރުންނާއި ބައްދަލުކޮށް، ޝެޓްސްގެ ނައިބު ރައީސް (ޢަމަލީ) ސުޢައިދު ޔޫނުސް ވަނީ ވާހަކަ ދައްކާފައެވެ. ސުޢައިދުގެ ވާހަކައިގައި އެމް.އެން.ޔޫ.އެސް.ޔޫ އާއި ޝެޓްސް އިން އިންތިޒާމް ކޮށްގެން ހިންގާ ހަރަކާތްތަކުގެ ވާހަކަ ވަނީ ހިއްސާކޮއްފައެވެ. މީގެ އިތުރުން މިއަހަރު ކުރިއަށް ގެންދިއުމަށް ރާވާފައި ހުރި ހަރަކާތްތަކުގެ މައްޗަށްވެސް ސުޢައިދު ވަނީ އަލިއަޅުވާލާފައެވެ. މިފަދަ ހަރަކާތްތަކަކީ ފެކަލްޓީގައި ކިޔަވަމުންދާ ކޮންމެ ދަރިވަރަކަށްވެސް ބައިވެރިވުމުގެ ފުރުޞަތު އޮތް ހަރަކާތްތަކެއްކަން ވަނީ ފާހަގަ ކޮށްފައެވެ.

ސުޢައިދުގެ ވާހަކަ ނިންމާލީ އަލަށް ގުޅުނު ދަރިވަރުންނަށް ވަރަށް އަގުހުރި ނަސޭހަތެއް ދެމުންނެވެ. އެގޮތުން އެއްވެސް ދަރިވަރަކު ހިތްހަމަ ނުޖެހޭ ކަމެއް ދިމާވެއްޖެނަމަ އެކަން ސޯޝަލް މީޑިއާގައި ނުފެތުރުމާއި އެކަން ކުރަން އޮންނަ އެންމެ ރަނގަޅު ގޮތުގައި އެކަން ކުރުމަށް ވަނީ ދަރިވަރުން ކައިރިން އެދިފައެވެ. އަދި ޖެހޭ މައްސަލަތަކުގެ ވާހަކަ ސޯޝަލް މީޑިއާގައި ފެތުރުމަކީ އެމް.އެން.ޔޫ.އެސް.ޔޫ އާއި ޝެޓްސް އިން އެއްގޮތަކަށްވެސް ބޭނުންވާ ކަމެއް ނޫން ކަމަށާއި އެފަދަ ކަމަކަށް އެއްބާރުލުން ނުލިބޭނެ ވާހަކަ ސުޢައިދު ވަނީ ފާހަގަކޮށްފައެވެ.

އޮންލައިންކޮށް ބޭއްވި އޮރިއެންޓޭޝަންގައި އަލަށް ގުޅުނު ދަރިވަރުންނާއި 23 އޯގަސްޓް 2021 ވީ ހޯމަ ދުވަހުގައި ބައްދަލުކޮށްފައި ވަނީ ޑިގްރީގެ ކޯސް ކޯޑިނޭޓަރު ހުސައިން ނަޞީރު އެވެ. ހުސައިން ސަރ ގެ ވާހަކައިގައި ފެކަލްޓީއަކީ ކޮބައިކަމާއި ކިޔަވައިދެއްވާ ލެކްޗަރަރއިންގެ ތަޢާރަފެއް ވަނީ ދެއްވާފައެވެ. ކުރިއަށް ރޭވިފައި ހުރި އިވެންޓްތަކުގެ އިތުރުން ޝެޓްސްގެ މައުލޫމާތުވެސް ހުސައިން ސަރ ވަނީ ދަރިވަރުންނަށް ދެއްވާފައެވެ. ސަރ ގެ ވާހަކަ ނިންމާލާފައިވަނީ އަލަށް ގުޅުނު ދަރިވަރުންނަށް ޝެޓްސްއިން އަލަށް ގުޅުނު ދަރިވަރުންނަށް ބާއްވާ ވެލްކަމް ނައިޓް އަށް ދައުވަތު ދެމުންނެވެ.

އެފް.އެޗް.ޓީ.އެސް އޮރިއެންޓޭޝަނަކީ ކޮންމެ ސެމިސްޓަރ އެއް ފެށުމުގެ ކުރިން އަލަށް ގުޅޭ ދަރިވަރުންނާއި ބައްދަލުކޮށް ފެކަލްޓީއިން ބާއްވާ ހަރަކާތެކެވެ. އެފް.އެޗް.ޓީ.އެސް އިން ބާއްވާ މިފަދަ ކޮންމެ ހަރަކާތެއްގައި އެމް.އެން.ޔޫ.އެސް.ޔޫ އާއި ޝެޓްސްގެ އެހީތެރިކަން އަބަދުވެސް އަންނަނީ ފޯރުކޮށްދެމުންނެވެ.