ދިވެހިރާއްޖޭގެ ޤައުމީ ޔުނިވާރސިޓީގެ ދަރިވަރުންގެ ޔޫނިއަންގައި ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް) ތަމްސީލުކުރާ ގޮފި ސޮސައިޓީ ފޯރ ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (ޝެޓްސް) އިން ބާއްވަމުން އަންނަ ލޫމޯސްގެ މިއަހަރުގެ ޝޯ ނިމިގެންދިޔައީ ވަރަށްވެސް ކާމިޔާބުކޮށެވެ.
30 އޮކްޓޯބަރ ވީ ހޮނިހިރު ދުވަހުގެ 7:45 ގައި ކުރިއަށްގެންދެވެނު ލޫމޯސް ޝޯވ ބެލުމަށް އެފް.އެޗް.ޓީއެސްގެ ދަރިވަރުންގެ އިތުރުން އެހެން ފެކަލްޓީ ތަކަށް ނިސްބަތްވާ ވަރަށް ގިނަ އަދަދެއްގެ ދަރިވަރުންނާއި އެހެނިހެން ބެލުންތެރިން ވަނީ ހާޒިރުވެފައެވެ. މީގެ ތެރޭގައި އެފްއެޗްޓީއެސްގެ ޑީން އާއި ލެކްޗަރާއިންގެ އިތުރުން ދައުވަތުދީގެން ހާޒިރުވި އެހެނިހެން ފަރާތްތައް ހިމެނެއެވެ.
ލޫމޯސްގެ މިއަހަރުގެ ޝޯވގައި ދަރިވަރުންގެ ތަފާތު ހުނަރުތައް ވަނީ ފެނިގެންގޮސްފައެވެ. އެގޮތުން ނެށުމުގެ ފަރި ހަރަކާތްތަކާއި ދަރިވަރުންގެ ލަވަކިޔުމުގެ އިތުރުން ފޯރިގަދަ ޑްރާމާތައްވެސް ވަނީ މި ޝޯވއިން ފެނިފައެވެ. ޝޯވގައި އަންހެން ދަރިވަރުންގެ 9 ހުށަހެޅުން އަދި ފިރިހެން ދަރިވަރުންގެ 8 ހުށަހެޅުން ފެނިގެން ގޮސްފައިވެއެވެ.
މި ޝޯވ އަށް ފުރިހަމަ ހުށަހެޅުންތަކެއް ހުށަހަޅައިދިންކަމަށް ޓަކައި ހުށަހެޅުންތައް ފަރުމާކުރި 4 ފެކަލްޓީއަށް ޝެޓްސްގެ ރައީސް ޖައިޝް އަލީ ވަހީދު ވަނީ ޝުކުރު ދަންނަވާފައެވެ.
ޝެޓްސް އަކީ ދަރިވަރުންގެ ހުނަރުތައް ތަރައްޤީކޮށް އެ ހުނަރުތައް އެހެން ފަރާތްތަކާއި ހަމައަށް ގެނެސްދިނުމަށް ވަރަށް ގިނަ މަސައްކަތްތަކެއް ކުރަމުން އަންނަ ގޮތްޕެކެވެ. އެގޮތުން ސިލްސިލާކޮށް ބޭއްވިގެންމިދާ ލޫމޯސް އަކީ ފެކަލްޓީއަކުން ހުނަރުދައްކާލުމަށް ބޭއްވިގެންދާ އެންމެ ބޮޑު އެއް ޝޯވއެވެ.
