ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީސް (އެފް.އެޗް.އެސް.ޓީ) ގެ ގޮފި ކަމަށްވާ ސޮސައިޓީ ފޯރ ހޮސްޕިޓާލިޓީ އެންޑް ޓުއަރިޒަމް ސްޓަޑީސް (ޝެޓްސް) ގެ ދަރިވަރުންގެ ”ލީޑާރސް ޓްރިޕް“ އަށް މިފަހަރު ތޮއްޑޫއަށް ދިއުމަށްވަނީ ނިންމާފައެވެ.
”ލީޑާރސް ޓްރިޕް“ އަކީ ކޮންމެ އަހަރުވެސް ޝެޓްސްގެ ހިންގާކޮމެޓީއާއި ޝެޓްސްގެ ލީޑަރސް ގްރޫޕްގެ ދަރިވަރުން ހިމެނޭގޮތަށް ރާއްޖޭގެ ރަށަކަށް ކުރާ ދަތުރެކެވެ. ކޮވިޑްގެ ދަތި ހާލަތާއި ގުޅިގެން އެއް އަހަރުގެ މެދުކެނޑުމަކަށް ފަހު މި އަހަރުގެ ދަތުރު ރޭވިފައިވަނީ އއ.ތޮއްޑުއަށެވެ. ދަރިވަރުން މި ދަތުރަށް ފުރާނީ މި އަންނަ ނޮވެމްބަރު މަހުގެ 3 ދުވަހުގައެވެ.
މި ދަތުރުގެ މައިގަނޑު މަޤްސަދަކީ ދަރިވަރުންގެ މެދުގައި ގުޅުން ބަދަހިކޮށް އއ. އަތޮޅުގައި ފަތުރުވެރިކަމުގެ ދާއިރާ ކުރިއަރާފައިވާ މިންވަރު ބަލާ، ފަތުރުވެރިކަމާ ބެހޭގޮތުން އައު މައުލޫމާތުތަކެއް ދަރިވަރުންނަށް ހޯދައި ދަރިވަރުންގެ މައުލޫމާތު މުއްސަނދި ކުރުމެވެ. އަދި މި ދަތުރުގައި ދަރިވަރުން ތޮއްޑޫގައި ހިންގަމުންދާ ގެސްޓް ހައުސްތަކަށް ޒިޔާރަތްކޮށް އެތަންތަނުގެ މަސައްކަތް ހިންގަމުންދާގޮތް ބަލާ އެތަނުގެ މުވައްޒަފުންނާއި ބައްދަލުކުރުމަށް ވަނީ ރޭވިފައެވެ.
އަދި މި ލިބިގެންދާ ފުރުސަތަކީ ދަރިވަރުންގެ އިމްތިހާނުތަކުގެ ކުރިން ދަރިވަރުންގެ ބޯ ހަމަޖައްސާލާ އިމްތިހާނަށް ތައްޔާރުވުމަށް ލިބިގެންދާ ރަނުގެ ފުރުސަތެއްކަމުގައި ޝެޓްސްއިން ދެކެއެވެ.