ޗެމްޕިއަން އެފްއެޗްޓީއެސް ތަށި ދިފާއުކޮށްފި

އެމް.އެން.ޔޫ.އެސް.ޔޫ ޝެޓްސް ކެރަމް މުބާރާތުގެ ޓީމް އިވެންޓުގެ ފިރިހެން ޑިވިޝަނުގެ ތަށި ޖެހިޖެހިގެން ދެވަނަ ފަހަރަށް އެފް.އެޗް.ޓީ.އެސްއިން ކާމިޔާބު ކޮށްފިއެވެ.

ރަމަޟާން މަހަށް ހާއްސަކޮށް ޝެޓްސް އިން އިންތިޒާމު ކޮށް ކުރިއަށް ގެންދާ އެމް.އެން.ޔޫ.އެސް.ޔޫ ޝެޓުސް ކެރަމް މުބާރާތުގެ 3 ވަނަ މުބާރާތް މި އެޕްރީލް މަހުގެ 19 އިން 22 އަށް ކެރަމް އެސޯސިއޭޝަންގައި ކުރިޔަށް ގެންދެވުނު އިރު ފިރިހެން ޑިވިޝަންގެ ޓީމް އިވެންޓުގެ ޗެމްޕިއަންކަން އެފްއެޗްޓީއެސް ހޯދީ ފައިނަލުގައި 3-0ން އެމްއެންޔޫބީއެސް ބަލިކޮށްގެންނެވެ. ފިރިހެން ޑިވިޝަންގެ ޓީމު އިވެންޓުގައި އިތުރަށް ބައިވެރިވީ ސީ.އެފް.އެސްއިންނެވެ. އެ ޓީމު ވަނީ މުބާރާތުގެ ލީގު ބުރުގެ ދެ މެޗުން ބަލިވެ މުބާރާތުން ކަޓައިފައެވެ.

މުބާރާތުގެ އަންހެން ޑިވިޝަނުގެ ޗެމެޕިއަންކަން އެފް.އެޗް.ޓީ.އެސް ހޯދީ ފައިނަލުގައި ވާދަވެރި ކުޅުމަކަށް ފަހު ސީ.އެފް.އެސްގެ ޓީމް ދެ މެޗު އެއްމެޗު އިން ބަލިކޮށްގެންނެވެ. ނިމިދިޔަ އަހަރުގެ މުބާރާތުގެ ފައިނަލުގައި ވާދަ ކުރި ދެޓީމު ކަމުގައިވާ އެސް.އެން އަދި އެމް.އެން.ޔޫ.ބީ.އެސް ވަނީ މުބާރާތުގެ ލީގު ބުރުން ކަޓައިފައެވެ. ލީގު ބުރުގެ ހުރިހާ މެޗަކުން އެމްއެންޔޫބީއެސް ބަލިވި އިރު އެސް.އެން އިންވަނީ ރަނގަޅު ކުޅުމެއް ދައްކާފައެވެ. ނަމަވެސް އެސް.އެންއަށް ފައިނަލުގެ ޖާގަ ގެއްލުނީ ޗެމްޕިއަން އެފް.އެޗް.ޓީ.އެސް އާ ޕޮއިންޓް އަދި ކާމިޔާބު ކުރެވުނު މެޗް އެއްވަރުވުމުން، މެޗު ތަކުގެ ސްކޯ އަށްބަލައި ސްކޯއިން އެފް.އެޗް.ޓީ.އެސްއަށް ކުރި ލިބުމުންނެވެ.

ސިންގަލް އިވެންޓުގެ ފިރިހެން ޑިވިޝަނުގެ ޗެމްޕިއަންކަން ހޯދީ އެފް.އޭގެ އާދަމް ޝާއިއުއެވެ. މިއީ ޝާއިއު މި މުބާރާތް ޖެހިޖެހިގެން ކާމިޔާބުކުރި ދެވަނަ ފަހަރެވެ. ފައިނަލުގައި ސީ.އެފް.އެސްގެ އަބްދުﷲ ނާފިހް ބަލިކުރި އިރު ނާފިހު ވަނީ މުބާރާތުގެ ގުރޫޕު ސްޓޭޖް އަދި ނޮކްއައުޓް މެޗުތަކުގައި މޮޅު ކުޅުމެއް ދައްކާފައެވެ. މިބައިގެ ތިންވަނަ ހޯދީ އެމް.އެން.ޔޫ.ބީ.އެސްގެ އަހުމަދު ރުޝްދާނެވެ.

ސިންގަލް އިވެންޓުގެ އަންހެން ޑިވިޝަންގެ ޗެމްޕިއަންކަން އެސް.އެންގެ އައިޝަތު ޝާރިފާ ހޯދީ ފައިނަލުގައި އެންމެ ފަހުގެ ޗެމްޕިއަން އެމް.އެން.ޔޫ.ބީ.އެސްގެ ފިރުޝާނާ ނަސީރު ބަލިކޮށްގެންނެވެ. މިބައިގެ ތިންވަނަ ހޯދީ އެފް.އެޗް.ޓީ.އެސްގެ މަރިޔަމް އީމާއު މުހައްމަދެވެ.

މި އަހަރުގެ މުބާރާތުގެ ޓީމް އިވެންޓުގައި 4 ފެކަލްޓީއެއްގެ ޓީމްތައް ބައިވެރިވިއިރު މުބާރާތުގެ ސިންގަލް އިވެންޓުގައި 60ށްވުރެ ގިނަ ދަރިވަރުން ބައިވެރިވެފައިވެއެވެ. އަދި މުބާރާތުގެ ބައިވެރިންގެ ފަރާތުން ވަނީ އުއްމީދީ މޮޅު ކުޅުމެއް ފެނިގެން ގޮސްފައެވެ.