ސޮސައިޓީ ފޯރ ހޮސްޕިޓާލިޓީ އެންޑު ޓުއަރިޒަމް ސުޓަޑީޒް (ޝެޓްސް) އަދި ނިއަރެސް ގުޅިގެން 2022 ވަނަ އަހަރުގެ ދެވަނަ ޓާމަށް ފެކަލްޓީ އޮފް ހޮސްޕިޓާލިޓީ އެންޑު ޓުއަރިޒަމް ސުޓަޑީޒް (އެފް.އެޗް.ޓީ.އެސް) އަދި ސުކޫލް އޮފް ނާރސިންއަށް އަލަށް ގުޅުނު ދަރިވަރުންނަށް ހާއްސަ ކޮށް ވެލްކަމް ނައިޓެއް ކުރިއަށް ގެންގޮސްފިއެވެ.
26 އޮގަސްޓު ވީ ހުކުރު ދުވަހުގެރޭ ސުކޫލް އޮފް ނާރސިންގެ ކޮންފަރެންސް ހޯލްގައި ކުރިޔަށް ގެންދުވުނު މި ހަރަކާތުގައި ދެ ފެކަލްޓީގެ ކޯސްތަކަށް އަލަށް ގުޅުނު 40 ށްވުރެ ގިނަ ދަރިވަރުން ވަނީ ބައިވެރިވެފައެވެ.
ދެ ގޮފީގެ ހިންގާ ކޮމެޓީއިން އިސްނަގައިގެން، ދެ ގޮފީގެ އިސްވާރުންގެ އެހީތެރިކަމާއެކު ކުރިޔަށް ގެންދެވުނު މި ހަރަކާތަކީ ދެ ފެކަލްޓީގެ ކޯސްތަކަށް އަލަށް ގުޅުނު ދަރިވަރުންނަށް މަރުހަބާ ކިޔުމުގެ އިތުރަށް ޝެޓްސް އަދި ނިއަރެސްގެ ހަރަކާތްތަކުގައި ބައިވެރިވާން ބޭނުންވާ އިސްވާރުންނަށް އެ ފުރުސަތު ތަނަވަސް ކޮށްދިނުމަށް ކުރިއަށް ގެންދެވުނު ހަރަކާތެކެވެ.
މި ހަރަކާތުގައި ސުކޫލް އޮފް ނާރސިންގެ ޑީން އާސިޔާ އިބްރާހީމް ވަނީ ބައިވެރިވެލައްވާފައެވެ.
އެކުވެރި މާހައުލެއްގައި ކުރިޔަށް ގެންދެވުނު މި ހަރަކާތުގައި، އަލަށް ގުޅުނު ދަރިވަރުންނަށް، ދެ ގޮފީގެ ހިންގާ ކޮމެޓީ ތައާރަފު ވުމުގެ އިތުރަށް ސުކޫލު އޮފް ނާރސިންގެ ޑީން ވެސް ވަނީ ދަރިވަރުންނާ މުހާތަބު ކޮށް ވާހަކަ ދައްކަވާފައެވެ. ގިނަ ގޭމްތަކަކާއެކު ކުރިޔަށްގެންދެވުނު މި ހަރަކާތަށް ހުރިހާ ބައިވެރިންގެ ފަރާތުން ވަނީ ހޫނު ތަރުހީބެއް ލިބިގެން ގޮސްފައެވެ. އަދި ސުކޫލް އޮފް ނާރސިންގެ ދެ ދަރިވަރެއްގެ ފަރާތުން މުނިފޫހި ފިލުވުމުގެ އައިޓަމެއްވެސް ވަނީ ހުށަހަޅައިދީފައެވެ.
ވެލްކަމް ނައިޓާއެކު ދެ ގޮފީގެވެސް މި ޓާމުގެ ހަރަކާތްތައް ފެށިގެން ދިޔައިރު ދެ ގޮފީގެ ފަރާތުންވެސް މި ޓާރމުގައި ގިނަ ހަރަކާތްތަކެއް ކުރިޔަށް ގެންދިއުމަށް ނިންމާފައިވާކަމަށް ދެ ގޮފީގެ ހިންގާކޮމެޓީން މައުލޫމާތު ދެއެވެ.
