ޝެޓްސް 3 ވީ 3 ފުޓްސަލް މުބާރާތުގައި ބައިވެރިވުމުގެ ފުރުސަތު ހުޅުވާލައިފި

އެފް.އެޗް.ޓީ.އެސް ގައި ތައުލީމު ހާސިލް ކުރަމުން އަންނަ ދަރިވަރުންނަށް ހާއްސަކޮށް ސޮސައިޓީ ފޯރ ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (ޝެޓްސް) އިން އިންތިޒާމްކޮށްގެން ކުރިއަށްގެންދާ ޝެޓްސް 3ވ3 ފުޓްސަލް މުބާރާތުގައި ބައިވެރި ވުމުގެ ފުރުސަތު ހުޅުވާލައިފިއެވެ.

މި މަހުގެ 23 ވަނަ ދުވަހު މާފަންނު ޓާރފް ގްރައުންޑްގައި ކުރިޔަށް ގެންދިޔުމަށް ހަމަޖެހިފައިވާ މި މުބާރާތަށް ދަރިވަރުންގެ ފަރާތުން ބޮޑު ތަރުހީބެއް ލިބިގެން ދާނެ ކަމަށް ބެލެވެއެވެ.

މި މުބާރާތަކީ ޝެޓްސްގެ އިސްވާރުންގެ މެދުގައި އެއްބައިވަންތަކަން އާލާކޮށް ކުރިޔަށް އޮތް އެމް.އެން.ޔޫ.އެސް.ޔޫ ފުޓްސަލް ފިއެސްޓާއަށް އެފް.އެޗް.ޓީ.އެސްގެ އަންހެން އަދި ފިރިހެން ޓީމަށް ކުޅެން ޝައުގުވެރިވާ ކުދިންގެ ހުނަރު ކުރިއެރުވުމުގެ މަގުސަދުގައި ޝެޓްސް އިން ބާއްވާ މުބާރާތެކެވެ.

ނިމިދިޔަ 2021 ވަނަ އަހަރު ޝެޓްސް އިން ވަނީ އެސް.އެސް.އެލްއާ ގުޅިގެން 3 ވީ 3 ފަން ފުޓްސަލް ޓޯރނަމެންޓެއް ކުރިއަށް ގެންގޮސްފައެވެ. މި މުބާރާތުގެ ފިރިހެން ޑިވިޝަނުގައި ދެ ފެކަލްޓީ އަށް ނިސްބަތްވާ 12 ޓީމު ބައިވެރިވި އިރު އަންހެން ޑިވިޝަނުގައި ޖުމްލަ 3 ޓީމް ބައިވެރިވިއެވެ.

މި އަހަރުގެ މުބާރާތުގައި އެފް.އެޗް.ޓީ.އެސްގެ ޓީމުތަކުގެ އިތުރަށް އެމް.އެން.ޔޫ.އެސް.ޔޫ އަދި ބައެއް ގޮފިތަކުގެ ހިންގާ ކޮމެޓީއަށް ވަނީ ޓީމުތައް ބައިވެރި ކުރުމުގެ ފުރުސަތު ދީފައެވެ. އެހެންކަމުން މުބާރާތުގެ ފޯރި ގަދަވާނެ ކަމަށް ބެލެވެއެވެ.

މުބާރާތުގައި ބައިވެރިވުމުގެ ސުންގަޑި އަކީ 22 ސެޕްޓެންބަރު 2022 ވާ ބުރާސްފަތި ދުވަހުގެ ރޭގަނޑު 14:00 އެވެ. މުބާރާތުގައި ބައިވެރިވުމަށް ފުރިހަމަ ކުރަންޖެހޭ ފޯމު ވަނީ ޝެޓްސްގެ އެކި ސޯޝަލް މީޑިއާ ޕްލެޓް ފޯމްތަކުގައި ހިއްސާ ކުރެވިފައެވެ.