ޝެޓްސް އާއި މެޑިކޯސް ގުޅިގެން ”ސްވިޗް އިޓް އަޕް“ ކާމިޔާބު ކަމާއެކު ކުރިޔަށް ގެންގޮސްފި

”ޝެޓްސް“ އަދި ”މެޑިކޯސް“ ގުޅިގެން ”ސްވިޗް އިޓް އަޕް“ ނަމުގައި ހާއްސަ ހަރަކާތެއް ކުރިޔަށް ގެންގޮސްފިއެވެ. މި ހަރަކާތަކީ ދެގޮފީގެ އިސްވާރުން ކިޔެވުމުގެ ތެރެއިން ދަސްކުރަމުންދާ ހާއްސަ ހުނަރުތައް ދެ ގޮފީގެ އިސްވާރުންގެ މެދުގައި ހިއްސާ ކުރުމަށް ކުރިޔަށް ގެންދެވުނު ހާއްސަ ހަރަކާތެކެވެ. ސެޕްޓެމްބަރ 17 ވީ ހޮނިހިރު ދުވަހު ކުރިޔަށް ދިޔަ މި ހާއްސަ ހަރަކާތުގައި ޝެޓްސްގެ 16 އިސްވާރަކާއި މެޑިކޯސްގެ 15 އިސްވާރުން ބައިވެރިވިއެވެ.

ދެ ދަންފަޅި އަކަށް ބަހާލައިގެން ކުރިޔަށް ގެންދެވުނު މި ހަރަކާތުގެ ފުރަތަމަ ދަންފަޅީގައި މެޑިކޯސްގެ ފަރާތުން ޝެޓްސްގެ އިސްވާރުންނަށް ވަނީ އެކުދިންގެ ހާއްސަ ހުނަރުތައް ދައްކާލާފައެވެ. ދަރުމަވަންތަ ހޮސްޕިޓަލުގެ ސްކޫލް އޮފް މެޑިސިންގައި ކުރިޔަށް ދިޔަ މި ސެޝަންގައި މެޑިކޯސްގެ ބައިވެރިން ވަނީ ސިއްހީ އެމެޖެންސީ ހާލަތްތަކުގައި ކަން ކުރާނެ ބައެއް ގޮތްތައް ކިޔައިދީފައެވެ. އަދި ސީ.ޕީ.އާރު ދިނުމާ ބެހޭގޮތުންވެސް ހާއްސަ ހުނަރުތަކެއް ވަނީ ހިއްސާކުރެވިފައެވެ.

މި ހަރަކާތުގެ ދެވަނަ ސެޝަން ކުރިޔަށް ގެންގޮސްފައި ވަނީ އެފް.އެޗް.ޓީ.އެސްގައެވެ. އެފް.އެޗް.ޓީ.އެސްގައި ކުރިޔަށް ދިޔަ މި ސެޝަންގައި ޝެޓްސްގެ އިސްވާރުންގެ ފަރާތުން ވަނީ ހާއްސަ ހަރަކާތްތަކެއް ދައްކުވައިދީފައެވެ. މިގޮތުން އެނދު އެޅުމުގެ ހާއްސަ ހުނަރުތައް ހިއްސާ ކުރެވިގެން ދިޔައިރު މޮހީޓޯ ތައްޔާރު ކުރާނެ ގޮތްވެސް ވަނީ ހިއްސާ ކުރެވިފައެވެ. އަދި މީގެ އިތުރަށް އެފް.އެޗް.ޓީ.އެސް ގައި ކިޔަވައިދޭ ފަތުރުވެރިކަމުގެ ސިނާއަތާ ގުޅުން ހުރި ތަފާތު އެކި ހުނަރުތައް ވަނީ ދައްކާލައިފައެވެ.

މި ހަރަކާތަކީ ޝެޓްސް އަދި މެޑިކޯސް ގުޅިގެން މި އަހަރު ކުރިޔަށް ގެންދެވެނު ފުރަތަމަ ހަރަކާތެވެ. ދެ ގޮފީގެ ފަރާތުންވެސް މި ޓާރމުގައި އިތުރު ހަރަކާތްތައް ކުރިޔަށް ގެންދިޔުމަށް ވަނީ ނިންމާފައެވެ.