ޝެޓްސް 3ވީ3 ފުޓުސަލް ޓޯރނަމެންޓް 2022 ގައި ކުޅުނު ހުރިހާ މެޗެއް ކާމިޔާބު ކޮށް މުބާރާތުގެ ޗެމްޕިއަންކަން ބެންޑިތްސް އިން ހޯދައިފިއެވެ. 23 ސެޕްޓެމްބަރ 2022 ވީ ހުކުރު ދުވަހުގެ މެންދުރުފަހު 15:30 އިން ފެށިގެން 22:00 މާފަންނު ޓާރފް ގުރައުންޑް 2ގައި ކުރިއަށް ދިޔަ މި މުބާރާތުގައި ޖުމުލަ 19 މެޗް ވަނީ ކުޅެވިގެން ގޮސްފައެވެ.
މި މުބާރާތަކީ ކުރިއަށް އޮތް އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަށް އެފް.އެޗް.ޓީ.އެސްގެ ޓީމު ތައްޔާރު ވުމުގެ ގޮތުންނާއި އެފް.އެޗް.ޓީ.އެސްގެ ދަރިވަރުންގެ މެދުގައި ފުޓްސެލްގެ ފޯރި އިތުރުކޮށް، ފުޓުސަލްގެ ގަވާއިދުތަކަށް އަހުލުވެރި ކުރުމަށް ޝެޓްސްގެ ހިންގާ ކޮމެޓީން ރާވާ އިންތިޒާމް ކޮށްގެން ކުރިޔަށް ގެންދެވުނު މުބާރާތެކެވެ.
މި މުބާރާތުގައި އެފް.އެޗް.ޓީ.އެސްގެ ހަ ޓީމަކުން ބައިވެރިވިއިރު ޝެޓްސްގެ ހިންގާ ކޮމެޓީގެ ހާއްސަ ދައުވަތަކަށް އެމް.އެން.ޔޫ.އެސް.ޔޫ ގެ ދެ ޓީމަކާއި، ސުކޫލް އޮފް ނާރސިންގެ ގޮފި ނިއަރެސް ޓީމަކާއެކު ޖުމްލަ 9 ޓީމް ވަނީ ވާދަކޮށްފައެވެ.
ދެ ގުރޫޕަކަށް ބަހާލައިގެން ކުރިޔަށް ގެންދެވުނު މި މުބާރާތުގައި ގުރޫޕް ބުރުގެ މެޗްތަކަށް ފަހު ކޮންމެ ގުރޫޕެއްގެ އެއްވަނަ އަދި ދެވަނަ ޓީމް ވަނީ މުބާރާތުގެ ސެމީ ފައިނަލަށް ދަތުރު ކޮށްފައެވެ. އަދި ސެމީ ފައިނަލުގެ މެޗުތައް ކާމިޔާބުކުރި ދެ ޓީމްގެ މެދުގައި ވަނީ މުބާރާތުގެ ފައިނަލް މެޗް ކުޅެވިގެން ގޮސްފައެވެ. މުބާރާތުގެ ފައިނަލުގައި ވާދަކުރީ އެފް.އެޗް.ޓީ.އެސް ގެ ދެ ޓީމް ކަމުގައިވާ ބެންޑިތްސް އަދި ޓާޒާ އެވެ. ފޯރިގަދަ ކުޅުމަކަށް ފަހު 2:1 ގެ ނަތީޖާއަކުން މުބާރާތުގެ ޗެމްޕިއަން ކަން ހޯދީ ބެންޑިތްސް އެވެ.
މުބާރާތުގެ އެންމެ ގިނަ ގޯލް ޖެހި ކުޅުންތެރިޔަކަށް ހޮވުނީ ބެންޑިތްސްގެ މުހައްމަދު އުލްވާންއެވެ. އަދި މުބާރާތުގެ އެންމެ މޮޅު ތިން ކުޅުންތެރިންނަކީ ޓާޒާ ގެ އަހުމަދު އަޒާން މުހައްމަދު، ބެންޑިތްސް ގެ އަހުމަދު އީވާން މުހައްމަދު އަދި މުހައްމަދު އުލްވާންއެވެ. މީގެ އިތުރަށްވެސް މުބާރާތުގައި ވަނީ ހުނަރުވެރި މޮޅެތި ކުޅުންތެރިން ފެނިގެން ގޮސްފައެވެ.
ކުރިޔަށް އޮތް އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ އަންހެން އަދި ފިރިހެން ޑިވިޝަންގައި އެފް.އެޗް.ޓީ.އެސްގެ ޓީމް އިން ވާދަކުރުމަށް ވަނީ ނިންމާފައެވެ.
