މިއަހަރުގެ ޝެފްޑޭއާ ގުޅުވައިގެން އެފް.އެޗް.ޓީ.އެސް އިން ތަފާތު ހަރަކާތެއް

މިއަހަރުގެ ޝެފްޑޭ ފާހަގަކުރުމަށް އެފް.އެޗް.ޓީ.އެސް އިން އިސްނަގައިގެން ދަ ޝެފް ގިލްޑް އޮފް މޯލްޑިވްސް އަދި ޝެޓްސް އާ ގުޅިގެން ތަފާތު ހަރަކާތްތަކެއް ކުރިއަށް ގެންގޮސްފިއެވެ. ކޮންމެ އަހަރެއްގެވެސް ޝެފްޑޭގެ ގޮތުގައި ފާހަގަ ކުރާ 20 އޮކްޓޫބަރުގައި ކުރިޔަށް ގެންދެވުނު މި ހަރަކާތް ކުރިއަށް ގެންގޮސްފައިވަނީ ކެންގަރޫ ކިޑްސް އިންޓަނޭޝަނަލް ޕްރީ ސުކޫލްގައެވެ. 3 ދަންފަޅިއަކަށް ބަހާލައިގެން ކުރިޔަށް ގެންދިޔަ މި ސެޝަންތަކުގައި ދަ ޝެފް ގިލްޑް އޮފް މޯލްޑިވްސްގެ ޝެފުން ވަނީ ވެޖިޓަބަލް ޗީސް އޮމްލެޓް ތައްޔާރު ކުރާނެ ގޮތް ސުކޫލްގެ ހުރިހާ ކިލާސް އެއްގެ ކުދިންނަށް ވަގުތުން ދައްކުވައިދީފައެވެ.

އަދި މީގެ އިތުރަށް ވެސް ސުކޫލްގެ ހުރިހާ ދަރިވަރުންނަށް ވަނީ ކަރުދާހުން ތައްޔާރު ކޮށްފައިވާ ޝެފް ހެޓްސްގައި ކުލަ ޖެއްސުމުގެ ފުރުސަތު ދީފައެވެ. 850 އަށް ވުރެ ގިނަ ކުދިން އަމަލީ ގޮތުން މި ހަރަކާތްތަކުގައި ބައިވެރިވިއިރު މި ތަކެތި ތައްޔާރުކުރުމުގައި ޝެޓްސްގެ އިސްވާރުން ވަނީ މުހިންމު ދައުރެއް އަދާކޮށްފައެވެ. އަދި މީގެ އިތުރަށްވެސް މި ހަރަކާތްތަކުގައި ބައިވެރވި ކޮންމެ ކުއްޖަކަށް ވަނީ ހަދިޔާ ދީފައެވެ. މި ތަކެތި ތައްޔާރު ކުރުމުގައިވެސް ޝެޓްސްގެ އިސްވާރުން ވަނީ މުހިންމު ދައުރެއް އަދާކޮށްފައެވެ.

އެފް.އެޗް.ޓީ.އެސް އިން ރާއްޖޭގެ ޓޫރިޒަމްގެ ރަންޔޫބީލް ފާހަގަ ކުރުމަށް ރާވަމުން އަންނަ ހަރަކާތްތަކުގައި އެހީތެރިވުމަށް ޝެޓްސްއާއި އެކު ދަނީ މަޝްވަރާކުރަމުންނެވެ. މި އަހަރުގެ ކުރިޔަށް ހުރި ދުވަސްތަކުގައިވެސް ޝެޓްސް އަދި އެފް.އެޗް.ޓީ.އެސް ގުޅިގެން ތަފާތު ހަރަކާތްތަކެއް ކުރިޔަށް ގެންދާނެ ކަމަށް ބެލެވެއެވެ.