ރަމަޟާން މަހަށް ހާއްސަކޮށްގެން ޝެޓްސް އިން ކުރިޔަށް ގެންދާ އެމް.އެން.ޔޫ.އެސް.ޔޫ ޝެޓްސް ކެރަމް މުބާރާތުގެ މެޗުތައް އަންނަ ހުކުރު ދުވަހު ފެށުމަށްވަނީ ހަމަޖެހިފައެވެ.
މި މާރިޗު މަހުގެ 22 އިން ފެޝިގެން 24 ވަނަ ދުވަހާ ހަމަޔަށް މުބާރާތުގެ މެޗްތައް ކުރިޔަށް ގެންދިއުމަށް ނިންމާފައިވާއިރު، މުބާރާތުގެ މެޗްތައް ކުރިޔަށްދާނީ ކެރަމް އެސޯސިއޭޝަންގެ މާލެ ކެރަމް ހޯލްގައެވެ.
2019 އަހަރު ޝެޓްސް އިން ކުރިޔަށް ގެންދަން ފެށި މި މުބާރާތް، ކޮވިޑުގެ ބަލި މަޑުކަމުގެ ސަބަބުން 2020 ވަނަ އަހަރު ކުރިޔަށް ގެންދެވޭގޮތް ވަނީ ނުވެފައެވެ. ނަމަވެސް ޖެހިގެން އައި 2021 ވަނަ އަހަރުން ފަށައިގެން ކޮންމެ އަހަރަކުވެސް މުބާރާތް އަންނަނީ ކުރިޔަށް ގެންދަމުންނެވެ. މިއީ މި މުބާރާތް ކުރިޔަށް ގެންދެވޭ ފަސް ވަނަ އަހަރެވެ.
މި މުބާރާތަކި ދިވެހި ރާއްޖޭގެ ގައުމީ ޔުނިވާސިޓީގެ ދަރިވަރުންނަށް ކެރަމް ކުޅުމުގެ ފުރުސަތު ތަނަވަސްކޮށްދީ، ދަރިވަރުންގެ މެދުގައި ކެރަމް ކުޅުމުގެ ފޯރި އިތުރުކޮށް އަދި ކެރަމްގެ ގަވާއިދު ތަކަށް އަހުލުވެރި ކުރުމުގެ މަގުސަދުގައި ކުރިޔައް ގެންދާ މުބާރާތެކެވެ.
ކުރިން އަހަރު ތަކާ އެއްގޮތަށް މި އަހަރުގެ މުބާރާތުގައި ވެސް ސިންގަލް އިވެޏްޓް އަދި ޓީމް އިވެންޓްގެ ކުޅުން އޮންނާނެއެވެ. ސިންގަލް އިވެންޓްގެ ކުޅުން އަންހެން އަދި ފިރިހެން ޑިވިޝަނަށް ބަހާލައިގެން ކުރިޔަށް ގެންދެވޭއިރު މުބާރަތުގެ ޓީމް އިވެޏްޓް ކުރިޔަށްދާނީ ދެ ޑިވިޝަން އެއްކޮށް ލައިގެނެންނެވެ.
މުބާރާތުގެ ސިންގަލް އިވެޓްގައި ބައިވެރިވުމުގެ ފުރުސަތު 21 މާރިޗް 2024 ވާ ބުރާސްފަތި ދުވަހުގެރޭ 00:00 ގައި ހަމަވާއިރު ޓީމް އިވެޏްޓްގައި ބައިވެރި ވުމުގެ ސުންގަޑިއަކީ 22 މާރިޗް 2022 ވާ ހުކުރު ދުވަހުގެ ރޭގަނޑު 00:00 އެވެ. މުބާރާތުގައި ފުރަތަމަ ކުރިޔަށް ދާނީ ސިންގަލް އިވެންޓެވެ.
ދަރިވަރުންގެ މެދުގައި އަހަރަކަށްވުރެ އަހަރެއް މި މުބާރާތުގެ ވާދަވެރިކަން އިތުރުވަމުން އަންނައިރު، ނިމިދިޔަ 2023 ވަނަ އަހަރު ފައިނަލްގައި އެމް.އެން.ޔޫ.ބީ.އެސް ބަލިކޮށް މުބާރާތުގެ ޗެމްޕިއަންކަން ހޯދާފައި ވަނީ ސުކޫލް އޮފް ނަރސިންގެ ޓީމުންނެވެ.
