ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒްގެ ގޮފި ޝެޓްސް އަށް އަލަށް ގުޅުނު އިސްވާރުންނަށް ހާއްސަކޮށް، ’ޝެޓްސް ނިއު ލީޑާސް ޓްރިޕް‘ ގެ ނަމުގައި ހާއްސަ ދަތުރެއް ގޮސްފިއެވެ. 22 ފެބްރުވަރީ 2025 ވީ ހޮނިހިރު ދުވަހު ވިލިމާލެއަށް ކުރި މި ދަތުރުގައި ޝެޓްސްގެ 25 އަށް ވުރެގިނަ އިސްވާރުން ވަނީ ބައިވެރިވެފައެވެ.
މި ދަތުރަކީ ޝެޓްސް އަށް އަލަށް ގުޅުނު އިސްވާރުންނަށް ހާއްސަ ކޮށްގެން ޝެޓްސްގެ ހިންގާ ކޮމެޓީއަށް އަލަށް އިންތިހާބްވި ޓީމުން ކުރިޔަށް ގެންދިޔަ ހަރަކާތެކެވެ. އަލަށް ގުޅުނު އިސްވާރުންގެ އިތުރަށް ނިމިދިޔަ އަހަރު ތަކުން ފެށިގެން ޝެޓްސްގެ ހަރަކާތްތަކުގައި ބައިވެރިވަމުން އަންނަ އިސްވާރުންނާއި ޝެޓްސްގެ ކުރީގެ ހިންގާ ކޮމެޓީ ތަކުގެ ބައެއް މެންބަރުން ވެސް ވަނީ މި ދަތުރުގައި ބައިވެރިވެފައެވެ.
މި ދަތުރަކީ ޝެޓްސްގެ އިސްވާރުންގެ ޓީމަށް އަލަށް ގުޅުނު އިސްވާރުންނާއި، ޝެޓްސްގައި މިހާރުވެސް ހަރަކާތްތެރިވަމުން އަންނަ އިސްވާރުންނާއި، ޝެޓްސްގެ ހިންގާކޮމެޓީގެ މެމްބަރުންގެ މެދުގައި އެއްބައިވަންތަކަށް އިތުރުކުރުމަށް ކުރިޔަށް ގެންދެވުނު ދަތުރެކެވެ.
ފާއިތުވެ ދިޔަ އަހަރުތަކުގައި ކޮންމެ ޓާމެއްގައިވެސް އަލަށް ފެކަލްޓީގެ ކޯސްތަކަށް ގުޅޭ ދަރިވަރުންނަށް ކުރިޔަށް ގެންދާ ވެލްކަމް ނައިޓް އެކި އެކި ސަބަބުތަކާހުރެ މި ޓާރމުގައި ކުރިޔަށް ނުގެންދެވުމުން ކުރީ އަހަރުތަކުގެ ވެލްކަމް ނައިޓުތަކުގައި ކުރިޔަށް ގެންދާ ބައެއް ހަރަކާތްތައް މި ދަތުރުގައި ވަނީ ކުރިޔަށް ގެންގޮސްފައެވެ. މިގޮތުން މި މަހުގެ 18 ވަނަ ދުވަހުގައި ކުރިޔަށް ގެންދެވުނު ޝެޓްސް ނިއު ލީޑާސް މީޓިންގައި ބައިވެރި ނުވެވުނު ކުރީގެ ހަރުދަނާ އިސްވާރުންނާއި ޝެޓްސްގެ ހިންގާ ކޮމެޓީގެ ކުރީގެ މެންބަރުން ވަނީ އަލަށް ގުޅުނު ދަރިވަރުންނަށް އެ އިސްވާރުނެގް ތަޖުރިބާ ހިއްސާކޮށްފައެވެ. އަދި ލީޑާސް މީޓިންގައި ނުދެވި ހުރި ޝެޓްސް އަދި އެމް.އެން.ޔޫ.އެސް.ޔޫ އާއި ގުޅުން ހުރި މުހިއްމު މައުލޫމާތުތައްވަނީ ދަތުރުގެ ބައިވެރިންނާ ހިއްސާ ކުރެވިފައެވެ.
ގިނަ ކުޅިވަރުތަކާއި މުނިފޫހިފިލުވުމުގެ ހަރަކާތްތައް ކުރިޔަށް ގެންދެވުނު މި ދަތުރު ކާމިޔާބުކަމާއެކު ނިންމާލެވުނު އިރު ކުރިޔަށް ހުރި ހަރަކާތްތަކުގައި ޝެޓްސްގެ ގިނަ އިސްވާރުން އެކުވެރިކަމާއިއެކު ފެންނާނެކަމަށް އުއްމީދުކުރެވެއެވެ.
ނިއު ލީޑާސް ޓްރިޕަށް ފަހު އަލަށް ގުޅުނު އިސްވާރުންނާއެކު ޝެޓްސްގެ ޓީމުން ވަނީ ރަމަޟާން މަހު ކުރިއަށް ގެންދިއުމަށް ހަމަޖެހިފައިވާ ހަރަކާތްތަކުގެ ތައްޔާރީތައް މެކުހަށް ޖަހާފައެވެ.
