ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ފެކަލްޓީ އޮފް އާރޓްސް އަށް ނިސްބަތްވާ ގޮފި، ’ސިއާ’ގެ 3ވަނަ ދައުރުގެ ހިންގާކޮމެޓީ އެކުލަވާލައިފިއެވެ.
ސިއާގެ ހިންގާ ކޮމެޓީއަށް ހޮވާފައިވާ ދަރިވަރުންނަށް މަޤާމުތައް ހަވާލު ކޮއްފައިވަނީ 16 ފެބްރުއަރީ ވީ ހުކުރު ދުވަހުގެ ރޭ ފެކަލްޓީ އޮފް އެޑިޔުކޭޝަންގެ އޮޑިޓޯރިއަމްގައި ބޭއްވި ރަސްމިއްޔާތުގައެވެ. މި ރަސްމިއްޔާތު ޝަރަފުވެރިކޮށްދެއްވީ ޣިޔާޘުއްދީން އިންޓަރނޭޝަނަލް ސްކޫލުގެ ޕްރިންސިޕަލް އަދި އެމް.އެން.ޔޫ ފެކަލްޓީ އޮފް އެޑިއެކޫޝަންގެ އެޑްވައިޒަރީ ބޯޑުގެ މެންބަރު އަލްފާޟިލް ޠާހާ ސަލީމެވެ. މި ރަސްމިއްޔާތުގައި އެމް.އެން.ޔޫގެ އިސްވެރިންގެ އިތުރުން ރައްޔިތުންގެ މަޖިލީހުގެ މާފަންނު ދެކުނު ދާއިރާގެ މެންބަރު ޢަބްދުﷲ ރިފާޢު ބައިވެރިވެވަޑައިގެންނެވިއެވެ.
ސިއާ ގެ ރައީސާ އަށް މަޤާމު ޙަވާލުކުރެވުނު ކަމުގެ ލިޔުން ޙަވާލުކޮށްދެއްވީ ރަސްމިއްޔާތުގެ ޝަރަފުވެރި މެޙްމާން އަލްފާޟިލް ޠާހާ ސަލީމެވެ. ނައިބު ރައީސް (ޢިލްމީ)އަށް މަޤާމު ޙަވާލުކުރެވުނުކަމުގެ ލިޔުން ޙަވާލުކޮށްދެއްވީ އެމް.އެން.ޔޫގެ ޗާންސެލަރ ޑރ. މުޙައްމަދު ލަޠީފެވެ. އަދި ނައިބު ރައީސް (ޢަމަލީ) އަށް މަޤާމު ޙަވާލުކުރެވުނު ކަމުގެ ލިޔުން ޙަވާލުކޮށްދެއްވީ އެމް.އެން.ޔޫގެ ވައިސް ޗާންސެލަރ ޑރ. އަލީ ފަވާޒް ޝަރީފް އެވެ. މީޑިއާ ކޯޑިނޭޓަރ އަށް އެމް.އެން.ޔޫގެ ކުރީގެ ޑައިރެކްޓަރ އޮފް ސްޓޫޑެންޓްސް އަލްފާޟިލް މުޙައްމަދު މުޞްޠަފާ ޙުސައިން މަޤާމު ޙަވާލުކުރެވުނު ކަމުގެ ލިޔުން ޙަވާލުކޮށްދެއްވިއިރު ޚަޒާންދާރަށް މަޤާމު ޙަވާލުކުރެވުނު ކަމުގެ ލިޔުން ޙަވާލުކޮށްދެއްވީ އެމް.އެން.ޔޫގެ ޑެޕިއުޓީ ވައިސް ޗާންސެލަރ ޑރ. މުޢާވިޔަތު މުޙައްމަދެވެ. އަދި ސެކްރަޓަރީއަށް މަޤާމު ޙަވާލުކުރެވުނުކަމުގެ ލިޔުން ޙަވާލުކޮށްދެއްވީ ރައްޔިތުންގެ މަޖިލީހުގެ މާފަންނު ދެކުނު ދާއިރާގެ މެންބަރު ޢަބްދުﷲ ރިފާޢު އެވެ.
ސިއާ ގެ މި ދައުރުގެ ހިންގާ ކޮމެޓީގެ މެމްބަރުންނަކީ:
- ރައީސާ – ޢާއިޝަތު އުމައިރާ
- ނައިބުރައީސާ (ޢިލްމީ) – ޒުހުރާ އިސްމާޢިލް
- ނައިބުރައީސް (ޢަމަލީ) – އަޙްމަދު ޝުނޫން
- މީޑިއާ ކޯޑިނޭޓަރ – ޢާސިމާ ނިޒާރު
- ހަޒާންދާރު – ރުޤިއްޔާ ރިމާނާ
- ސެކްރެޓަރީ – ޢާއިޝަތު އިބްރާހިމް
މިއީ އެމް.އެމް.އެން.ޔޫ.އެސް.ޔޫ ގެ 6ވަނަ ދައުރު ކަމުގައި ވިޔަސް ފެކަލްޓީ އޮފް އާރޓްސްގެ މި ގޮފި އުފެދިފައިވަނީ 2016 ވަނަ އަހަރުއެވެ. އެ އަހަރު މި ގޮފީގެ ނަމަކީ ސޮސައިޓީ ފޯރ އާރޓްސް، ސޯޝަލް ސައިންސެސް އެންޑް ހިއުމެނިޓީސް (ސޭޝް) އެވެ. މި ގޮފީގެ ނަން ސިއާ އަށް ބަދަލު ކޮށްފައިވަނީ 2017 ވަނަ އަހަރުއެވެ. ސިއާ އަކީ ދިވެހި ބަހަކަށް ވާއިރު އޭގެ މާނަ އަކީ މީހެއްގެ ކިބައިގަ ހުރި ކުޅަދާނަ ކަމަކާއި ކުރެހުމާއި އަތުމަސައްކަތުގެ ހުނަރުވެރިކަމެވެ. އަދި އިނގިރޭސި ބަހުން ސިއާ (SIA) އަކީ ސްޓޫޑެންޓް އިނިޝިއޭޓިވް އޮފް އާރޓްސް (Students‘ Initiative of Arts) އެވެ.
ލިޔުނީ: ރުޤިއްޔާ ރިމާނާ، ޙަޒާންދާރު، ސިއާ
