މިއަހަރުގެ ދިވެހި ޅެންވެރިކަމުގެ ދުވަސް ފާހަގަ ކުރުމުގެ ގޮތުން 22 މާރިޗް ވީ ބުރާސްފަތި ދުވަހުގެރޭ އެޑިއުކޭޝަންގެ ބެންޗް އޭރިއާ ގައި ޅެންވެރިންގެ ދުވަހާއި ގުޅިގެން ”ގުންޒަރު“ ސިއާ އާއި ދިވެހި ބަހުގެ އެކަޑަމީ ގުޅިގެން ވަނީ ކުރިއަށް ގެންގޮސްފައެވެ.
މިއީ އެހެން އަހަރުތަކެކޭ ވެސް އެއްގޮތަށް ދިވެހި ބަހުގެ އެކަޑަމީއިން ޅެންވެރިކަމުގެ ދުވަހައި ގުޅިގެން ކުރިއަށް ގެންދަމުންދާ ހަރަކާތެކެވެ. އެހެން ނަމަވެސް މިއަހަރުގެ ޅެންވެރިންގެ ދުވަސް ފާހަގަ ކޮށްފައިވަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ އެފް.އޭ ގެ ގޮފިކަމުގައިވާ ސިއާ އާއި ގުޅިގެންނެވެ. ބޭރުގެ ސަފާރާތަކުގެ އޮފިޝަލުން ބައިވެރިވެގެން ކުރިޔަށް ގެންދިޔަ މިހަރަކާތަކީ ކޮންމެ އަހަރަކުވެސް ވަރަށް ބޮޑު ތަރުހީބެއް ލިބިގެންދާ ހަރަކާތެވެ. އަދި މިއީ ސިއާ އާއި ގުޅިގެން ދިވެހި ބަހުގެ އެކަޑަމީން ކުރިއަށްގެންދިޔަ ފުރަތަމަ ހަރަކާތް ކަމަށްވެސް ފާހަގަ ކުރަމެވެ. މި ހަފްލާ ޝަރަފު ވެރިކޮށް ދެއްވީ އޮގަރު އިބްރާހިމް ވަޙީދެވެ. އަދި ޔުނިވަރސިޓިގެ އިސްވެރިންނާއި ފެކަލްޓީ އޮފް އާރޓްސްގެ މުވައްޒަފުންނާއި ދަރިވަރުން ވަނީ ބައިވެރި ވެފައެވެ.
މިރަސްމިއްޔާތުގައި ވާހަކަދައްކަވަމުން އޮގަރު ވަހީދު ވަނީ ރާއްޖެއަކީ މުއްސަނދި އަދަބިއްޔާތަކާ، މޮޅު ޅެން ވެރިންނާ ލިއުންތެރިން ގިނަ ޤައުމެއްކަން ފާހަގަކުރައްވާފައެވެ. އަދި ރާއްޖެއަކީ ދުނިޔޭގެ ފެންވަރުގައި ފާހަގަކޮށްލެވޭފަދަ އަދަބިއްޔާތެއް އޮންނަ ޤައުމެއްކަން އޭނާ ފާހަގަކުރެއްވިއެވެ.
މިރަސްމިއްޔާތުގައި ވާހަކަދައްކަވަމުން ދިވެހި ބަހުގެ އެކަޑަމީގެ ރައީސް އަޝްރަފު ޢަލީ ވަނީ ޅެންވެރިންގެ ދުވަހުގެ ޝިއާރު ”ޅެންވެރިކަމަކީ ރަން ކަސަބެއް“ މި މައުޟޫއަށް އަލިއަޅުއްވާލައްވައި ވާހަކަދައްކަވާފައެވެ. އަދި ދިވެހި އަދަބިއްޔާތާއި ބަސް ބައިނަލްއަޤްވާމީ ފެންވަރެއްގައި ޕްރޮމޯޓްކުރުމަކީ އެކަޑަމީއިން ގެންގުޅޭ ވިސްނުމެއްކަން އަޝްރަފް ފާހަގަކުރެއްވިއެވެ.
މި ހަފްލާގައި ފެކަލްޓީ އޮފް އާރޓްސް އިން ވަނީ ޅެން ކިޔުމާއި ޅެން ހެދުމުގެ ހަރަކާތެއް ކުރިއަށް ގެންގޮސް ފައެވެ. އަދި ރާއްޖޭގައި ހުންނަ އިންޑިއަން ކަލްޗަރަލް ސެންޓަރުން ވަނީ މިޙަފްލާގައި ޚާއްސަ މުނިފޫހިފިލުވުމުގެ ޙަރަކާތްތަކެއްވެސް ހުށަހަޅާފައެވެ. އަދި މިދުވަހާ ގުޅުވައިގެން ސިއާ އިން ހުޅުވާލައިގެން ކުރިއަށް ގެންދިޔަ ދިވެހި ޅެންހެދުމުގެ މުބާރާތުގެ ނަތީޖާ އިއުލާން ކުރުން މި ހަފްލާގައި ބާއްވަން ހަމަޖައްސާފައި ވީނަމަވެސް ނަތީޖާ އިއުލާން ކުރުން ވަނީ ލަސްކޮށްލާފައެވެ.
ލިޔުނީ: ރުޤިއްޔާ ރިމާނާ، ޙަޒާންދާރު، ސިއާ
