ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އުފެއްދުމުގެ މައިގަނޑު މަޤްސަދަކީ ތަޢުލީމީ ގޮތުންނާއި ކުޅިވަރުގެ ރޮނގުން އެމް.އެން.ޔޫގެ ދަރިވަރުންނަށް ހަރަކާތްތައް ހިންގުމެވެ. ދަރިވަރުންގެ ފުރިހަމަ ހިއްސާ އާއިއެކު ތަފާތުކަމެއް ރާވައި ދިގު މުއްދަތަކަށް އެކަންކަން ހިންގުމަކީ ޔޫނިއަންގެ އެއް އަމާޒަށް ވަނީ ވެފައެވެ. އެހެންކަމުން ދަރިވަރުންގެ ބައިވެރިވުން ސީދާގޮތުން ހިމެނުމަށް ޔޫނިއަން އިންވަނީ ކޮންމެ ފެކަލްޓީ އަކަށް ގޮތްޕެއް ޤާއިމް ކޮށްފައެވެ. އެގޮތުން ސިއާ އަކީ ފެކަލްޓީ އޮފް އާރޓްސް(އެފް.އޭ) އަށް ނިސްބަތްވާ ޔޫނިއަންގެ ގޮތްޕެވެ. ސިއާ އިން މަސައްކަތް ކުރަމުން ދާނީ އެފް.އޭގެ ދަރިވަރުންނަށް ޚާއްސަކޮށްގެން ހަރަކާތްތައް ރާވާ ހިންގުމަށެވެ.
ސިއާ އިން ދަރިވަރުންނާ ގުޅުންހުރި ހަރަކާތްތައް ހިންގުމަށް ރާވާއިރު ލިބޭ އެންމެ ބޮޑު ގޮންޖެހުމަކީ ފެކަލްޓީގެ އެހެން ކުދިންގެ ފަރާތުން އެ ހަރަކާތެއް ހިންގުމަށް ލިބޭ އެއްބާރުލުން ކުޑަވުމެވެ. ނަމަވެސް އުފަލަކީ، ހަރަކާތެއް ހިންގުމަށް ތަނެއް ތައްޔާރު ކުރަން މަސައްކަތް ކުރާއިރު އެ އަންނަ މަދު ދަރިވަރުން ވަރަށް ފުރިހަމަ އަށް އެ މަސައްކަތްކޮށް ނިންމާލަދިނުމެވެ. މާދަރީ ބަހުގެ ދުވަހާއި ދިވެހި ޅެންވެރިކަމުގެ ދުވަހު ބޭއްވި ގުންޒަރު ފަދަ ޕްރޮގްރާމްތައް ކާމިޔާބު ކަމާއެކު ނިންމާލެވިފައިވަނީ މި ދެންނެވި މަދު ކުދިންގެ މިންނެތް މަސައްކަތުންކަން ފާހަގަ ކުރަމެވެ. އަދި ހަމަ އެހެންމެ އޯޓިޒަމް ކުދިންނަށް އެހީވުމަށް ސިއާ އިން ހިންގި ފަންޑުރައިޒިންގ ހަރަކާތުގައިވެސް ބައިވެރިވި ކުދިންވަނީ އަގުނުކުރެވޭފަދަ ބޮޑު މަސައްކަތެއް ކޮށްދީފައެވެ. ކަންމިހެން ހުރިއިރު މި ކުދިންގެ ޚިދުމަތުގެ ކާމިޔާބީގެ އަގުވަޒަންކޮށް ހިތްވަރު ދިނުމަކީ ކޮންމެހެން މުހިންމު ކަމެއް ކަމުގައި ދެކެމެވެ.
ފެކަލްޓީ އޮފް އާރޓްސް އަށް ގިނަގުނަ ޚިދުމަތްތަކެއް ކޮއްދެއްވި އަދި ފެކަލްޓީގެ ޑީން ކަމުގެ ދެ ދައުރު ފުރިހަމަ ކޮށްފައިވާ އަބްދުއްރަޝީދު ޢަލީ އަށް ދިން ފެއަރވެލް ނައިޓްގައި، ”ޚިދުމަތުގެ އަރުތަ އެވޯޑު“ ގެ ނަމުގައި އެވޯޑެއް ސިއާ އިން ވަނީ ތަޢާރަފް ކޮށްފައެވެ. މި އެވޯޑަކީ ސިއާ އިން ހިންގާ ހަރަކާތްތަށް ހިންގުމުގައި ބައިވެރިވާ އަރުތަވެރި އަދި ޚިދުމަތްތެރި ދަރިވަރުންގެ އަގުވަޒަންކުރުމުގެ ގޮތުން ސިއާ އިން ތަޢާރަފް ކުރި އެވޯޑެކެވެ. އަދި ސިއާ އިން ހިންގާ ހަރަކާތް ތަކާއި އެފް.އޭ އިން އިސްނަގައިގެން ކުރިއަށްގެންދާ ހަރަކާތްތަކުގައި، ސީދާ ގޮތެއްގައި ގިނަ ކުދިންތަކެއް ބައިވެރިވުމަށް ހިތްވަރު ދިނުމަށްވެސް ތަޢާރަފު ކުރި އެވޯޑެކެވެ.
މި އެވޯޑަކީ ހަމައެކަނި އެފް.އޭ އަށް ތަޢާރަފް ކޮށްފައިވާ އެވޯޑެކެވެ. މި އެވޯޑު ދިނުމުގައި ބެލެވޭނެ ކަންކަމަކީ އަހަރު ފެށުނިންސުރެން ސިއާ އާއި އެފް.އޭ އިން ހިންގާ ހަރަކާތްތަކުގައި ބައިވެރިވާ މިންވަރަށާއި، ކަންކަން ރާވައި ހިންގުމުގައި ލިބޭ އެއްބާރުލުމަށެވެ. އަދި މި އެވޯޑަކީ ހަމައެކަނި އެންމެ ދަރިވަރަކަށް ދެވޭނެ އެވޯޑެއްވެސް ނޫނެވެ. އެފް.އޭ ގައި އެންމެ ހަރަކާތްތެރިވެ އުޅޭ ދަރިވަރުންތަކަކަށްވެސް މި އެވޯޑު ލިބުން އެކަށީގެންވެއެވެ. އަދި މި އެވޯޑަކީ ސިއާގެ ހިންގާ ކޮމެޓީގެ މެމްބަރުންގެ ތެރެއިން އެއްވެސް މެމްބަރަކަށްވެސް ދެވޭނެ އެވޯޑެއް ނޫނެވެ. އެހެންކަމުން ވީހާވެސް ގިނަ ދަރިވަރުން މި އެވޯޑު ޙާސިލުކުރުމައްޓަކައި ސިއާ އާއި އެފް.އޭ އިން ހިންގާ ހަރަކާތްތަކުގައި ކުރިއައް އޮތް ތަނުގައި ހަރަކާތްތެރިވާނެ ކަމަށް ބެލެވެއެވެ.
ޚިދުމަތުގެ އަރުތަ އެވޯޑު މިއަހަރު ލިބިފައިވަނީ، ބެޗްލަރ އޮފް އާރޓްސް އިން އިންގްލިޝް ލޭންގްވިޖް އެންޑް ކޮމިއުނިކޭޝަން 2016ގެ ދަރިވަރު ދީމާ އަބޫބަކުރަށެވެ. މި އެވޯޑު ފުރަތަމަ ފަހަރަށް އެންމެ ދަރިވަރެއް ހޯދާފައިވީ ނަމަވެސް ސިއާ ގެ އުންމީދަކީ އަންނަ އަހަރު މި އެވޯޑު އެކަކަށްވުރެ ގިނަ ދަރިވަރުން ޙާސިލުކުރުމެވެ.
ލިޔުނީ: އަޙްމަދު ޝައްފާޒު، ނައިބު ރައީސް (ޢަމަލީ)، ސިއާ
