ޤައުމީ ޔުނިވާރސިޓީގެ ދަރިވަރުންގެ ޔޫނިއަންގެ ފެކަލްޓީ އޮފް އާރޓްސްގެ ގޮފި ސިއާ އިން ދިވެހި ބަހުގެ އެކަޑަމީއާއި ބައްދަލު ކޮއްފިއެވެ.
ދުނިޔޭގެ ޅެންވެރިންގެ ދުވަސް ފާހަގަ ކުރުމަށް މަޝްވަރާ ކުރެވުނު މި ބައްދަލުވުމުގައި ވާހަކަދެކެވިފައިވަނީ މި ދުވަހާއި ގުޅިގެން އެކަޑަމީއިން ކުރިން ވެސް ބާއްވަމުން އަންނަ ”ގުންޒަރު“، މި ޕްރޮގްރާމު ސިއާއާއި ގުޅިގެން ޤައުމީ ޔުނިވާރސިޓީގެ ގޯތިތެރޭގައި ބޭއްވުމާއި ބެހޭގޮތުންނެވެ. އަދި ޅެންވެރިންގެ ދުވަހާއި ގުޅިގެން ޔުނިވާރސިޓީ ދަރިވަރުންނަށް ޅެން ހެދުމުގެ މުބާރާތެއް ބޭއްވުމަށްވެސް މަޝްވަރާ ކުރެވުނެވެ. އެކުވެރި މަޖާ މާހައުލަކުން މިފަދަ ދުވަހެއް ކުލަގަދަކޮށް ބޭއްވުމުގެ މައިގަނޑު މަޤުސަދަކީ ދަރިވަރުންގެ ހިތްތަކުގައި އަދަބިއްޔާތަށް ލޯބި ޖެއްސުމާއި މި ދާއިރާގެ ފުންނާބު އުސްބޭފުޅުންގެ ހަދާން އާކުރުމުގެ އިތުރުން މިފަދަ ޢިލްމީ ހަރަކާތް ތަކުގައި ދަރިވަރުންގެ ހުނަރު ފެނިގެން ދިއުން ކަމުގައި ވެސް އެކެޑަމީން ފާހަގަ ކުރެއްވި އެވެ.
20 މާރޗް ވީ އަންގާރަދުވަހު، ސިއާއިން އިސްނަގައިގެން ބޭއްވި މި ބައްދަލުވުމައިގައި އެކަޑަމީއިން ބައިވެރި ވެފައިވަނީ އެކަޑަމީގެ ޑިރެކްޓަރ އާއިޝަތު އަލީ، ޕްރޮގްރާމް ކޯރޑިނޭޓަރ ފައުޒާން މުހައްމަދު، އަދި މީގެ އިތުރުން ސެކެރެޓަރީ އެވެ. ސިއާގެ ފަރާތުން ވިންގުގެ ރައީސާ ޢާއިޝަތު އުމެއިރާ ނައިބު ރައީސާ(ޢިލްމީ) ޒުހުރާ އިސްމާއީލް އަދި ޙަޒާންދާރު ރުޤިއްޔާ ރިމާނާ ބައިވެރިވެފައިވެއެވެ. މިއީ މިފަދަ ހަރަކާތެއް ބޭއްވުމަށް އަމިއްލަ ގޮތުން އިސްނަގައިގެން ޤައުމީ ޔުނިވާރސިޓީގެ ދަރިވަރުން އެދިލެއްވި ފުރަތަމަ ފަހަރު ކަމުގައި އެކަޑަމީއިން ފާހަގަކޮށްފައިވެއެވެ.
ލިޔުނީ: ޒުހުރާ އިސްމާޢިލް، ނައިބު ރައީސް (ޢިލްމީ)، ސިއާ
