ދުނިޔޭގެ ފޮތްތަކާއި ކޮޕީރައިޓްސް ދުވަސް ފާހަގަ ކުރުމުގެ ގޮތުން ސިއާ އިން އިސްނަގައިގެން ކުރިއަށް ގެންދިޔަ ފޮތް ހަދިޔާ ކުރުމުގެ ހަރަކާތް ނިމިއްޖެއެވެ.
އެމް.އެން.ޔޫ ލައިބަރްރީސް އާއި ގުޅިގެން 3 ދުވަހުގެ މުއްދަތައް ކުރިޔައް ގެންދިޔަ މި ހަރަކާތުން 173 ފޮތް ވަނީ ލިބިފައެވެ. އެމް.އެން.ޔޫ ގެ އެކި ކެމްޕަސް ތަކުގައި މުޅިއެކު 8 ފޮށި ބަހައްޓާފައިވާއިރު، ހުރިހާ ފޮށިތަކަކުންވެސް ތަފާތު ކޯސް ތަކާއި ދާއިރާ ތަކާ ގުޅޭ ފޮތްތައް ވަނީ ލިބިފައެވެ. މި ހަރަކާތުގައި ގިނަ ފޮތްތައް ހަދިޔާ ކޮަށްފައިވަނީ އެމެ.އެން.ޔޫ ގައި ކިޔެވުން ޙާސިލް ކުރަމުން ދާ ދަރިވަރުން ކަންވެސް ފާހަގަ ކޮއްލަން ޖެހެއެވެ. އެހެންނަމަވެސް އެމް.އެން.ޔޫގެ ބައެއް މުވައްޒަފުން ވެސް ފޮތް ހަދިޔާކޮއްފައިވާކަން ފާހަގަ ކޮއްލަމެވެ.
މި ހަރަކާތް ނިންމާލުމަށް މިއަދު މެންދުރު އެމް.އެން.ޔޫ ގެ ސެންޓްރަލް ލައިބްރަރީގައި ބޭއްވި ޚަފްލާގައި އެމް.އެން.ޔޫގެ ޑެޕިޔުޓީ ވައިސް ޗާންސެލަރ އަލްފާޟިލާ ޢާއިޝަތު ޝާހީން އަދި ޑީން އޮފް ސްޓޫޑެންޓްސް އަލްފާޟިލާ ނާދިޔާ އަޙްމަދުގެ އިތުރުން ފެކަލްޓީ އޮފް އާރޓްސް ގެ ޑީން އަލްފާޟިލް ޢާސިމް ޢަބްދުލް ސައްތާރު ބައިވެރިވެފައި ވެއެވެ. އަދި ހަމަ އެހެންމެ ޗީފް ލައިބްރޭރިއަން ޙުޞައިން ޙަލީމް އާއި ސިއާގެ ރައީސް އަޙްމަދު ޝައްފާޒު އާއި ލައިބްރަރީގެ މުވައްޒަފުން އަދި ސިއާ ގެ ބައެެއް މެމްބަރުން ބައިވެރިވިއެވެ.
ޝާހީން މިސް އާއި ނާދިޔާ މިސްގެ ޢިލްތިމާސް އަކީ މިފަދަ އިތުރު ހަރަކާތްތަކެއް ސިއާ ގެ ފަރާތުން ކުރިއަށް ގެންދިއުމަށެވެ. އަދި ދަރިވަރުން ފޮތް ތަކާ އޮންނަ ގުޅުން އިތުރުކުރުމަށް ލައިބްރަރީ އާއި ގުޅިގެން ކުދިން ފޮތް ކިޔުމަށް ޝަޢުޤުވެރި ކުރުވާ ކަހަލަ ގިނަ ހަރަކާތް ތަކެއް ރޭވުމަށް އެދުނެވެ. މިވާހަކަ ތަކައްފަހު ސިއާގެ ރައީސް ބުނެފައިވަނީ ފެކަލްޓީ އޮފް އާރޓްސް ގައި ލައިބްރަރީ އެންޑް އިންފޯރމޭޝަން ސާރވިސް ކޯސް ހިންގަމުން ދާއިރު ލައިބްރަރީ އާއި ފޮތް ކިޔުމަށް ކުދިން ޝަޢުޤުވެރި ކުރުވާ އިތުރު ހަރަކާތްތަކެއް ރޭވުމަކީ ސިއާގެ އަމާޒެއް ކަމުގައެވެ.
މި ހަރަކާތުން ލިބުން ހުރިހާ ފޮތެއްވެސް ވަނީ އެމް.އެން.ޔޫ ލައިބްރަރީސް އާއި ހަވާލުކޮއްފައެވެ.
ލިޔުނީ: ރުޤިއްޔާ ރިމާނާ
ނައިބު ރައީސާ (ޢަމަލީ)
ސްޓޫޑެންޓްސް އިނިޝިއޭޓިވް އޮފް އާރޓްސް
