1440 ވަނަ އަހަރުގެ ރަމަޟާން މަހުގެ މުނާސަބަތުގައި ދިވެހިންގެ ޘަޤާފީ މާހެފުން ޝެޓްސް އަދި ސިއާ ގުޅިގެން އެފް.އެޗް.ޓީ.އެސް އާއި އެފް.އޭ ގެ ދަރިވަރުންނަށް ބާއްވައިފިއެވެ.
ބުރާސްފަތި ދުވަހުގެ ރޭ އެފް.އެޗް.ޓީ.އެސް ގެ 3 ވަނަ ފަންގިފިލާގައި އޮތް މި މާހެފުމުގައި އެފް.އެޗް.ޓީ.އެސް އާއި އެފް.އޭ ގެ ގިނަ ދަރިވަރުންތަކަކާއި ލެކްޗަރާއިން ވަނީ ބައިވެރިވެފައެވެ. މީގެ އިތުރުން އެމް.އެން.ޔޫ.އެސް.ޔޫ ގެ ބައެއް މެމްބަރުންނާއި ވިންގް ތަކުގެ މެމްބަރުންވެސް ވަނީ މި ޘަޤާފީ ހަރަކާތުގައި ބައިވެރިވެފައެވެ.
ޝެޓްސް އާއި ސިއާ އިން އިންތިޒާމުކޮށްގެން ބޭއްވި މި މާހެފުމުގައި ދިވެހި ޘަޤާފީ ކެއުންތައް ތައްޔާރު ކޮއްފައިވަނީ ދެ ފެކަލްޓީގެ ދަރިވަރުންނެވެ. މި ދެ ފެކަލްޓީ ގައި ހިމެނޭ އެކި ކޯސް ތަކުގެ ކޮންމެ ބެޗަކަށް ކޮންމެވެސް ދެ ދިވެހި ކެއުމެއްތައްޔާރު ކުރަން ހަވާލު ކުރީ ގުރުއަތުލައިގެނެވެ. މަދު ކުލާސް ތަކަކުން ފިޔަވާ އެހެން ހުރިހާ ކުލާހަކުންވެސްމިކަމުގައި ވަނީ ވަރަށް ބޮޑު އެއްބާރުލުމެއް ދީފައެވެ. އަދި ތައްޔާރުކޮށްފައިވާ ކާއެއްޗެހީގެ ރަހަވެސް އެހާމެ މީރެވެ.
މިއީ ސިއާ އިން ޝެޓްސް އާއި ގުޅިގެން ބޭއްވި ފުރަތަމަ އިވެންޓް ކަމުގައި ވީއިރު މި އިވެންޓްގެ ކަންކަން ކުރިއަށް ގޮސްފައިވަނީ ވަރަށް ރަނގަޅަށް ކަމަށް ސިއާގެ ނައިބު ރައީސާ (ޢަމަލީ) ރުޤިއްޔާ ރިމާނާ ފާހަގަ ކުރިއެވެ. އަދި މީގެ އިތުރުން ވެސް ދަރިވަރުންނާއި ގުޅުން ހުރި އިތުރު ހަރަކާތްތަކެއް ހިންގުމަށް ކޮންމެ ވިންގަކާއި އެކުވެސް މަސައްކަތް ކުރުމަށް ފަސް ނުޖެހޭނެ ކަމަށްވެސް ވިދާޅުވިއެވެ.
މި އަހަރުގެ ރަމަޟާންމަހުގެ އެއްވަނަ ދުވަހަކީ މި މަހުގެ 6 ވާ ހޯމަ ދުވަހެވެ.
ލިޔުނީ: މުޙައްމަދު ޝަރުވާން
މީޑިއާ ކޯޑިނޭޓަރ
ސްޓޫޑެންޓްސް އިނިޝިއޭޓިވް އޮފް އާރޓްސް
