ދިވެހިރާއްޖޭގެ ޤައުމީ ޔުނިވަރސިޓީގައި ކިޔެވުން ޙާސިލު ކުރަމުންދާ ހުރިހާ ދަރިވަރުންނަށާއި މުވައްޒަފުންނަށް، ސިއާ އިން މިދިޔަ އަހަރު ހުޅުވާލި އިންސްޓަގްރާމް ފޮޓޯ ޗެލެންޖްގެ އެއްވަނަ ޝުޢައިބު މުޙައްމަދަށް ލިބިއްޖެއެވެ.
މި ޗެލެންޖްގެ އެއްވަނަ އަށް އިނާމް ޙަވާލު ކޮއްފައިވަނީ ސިއާ އާއި ޝެޓްސް ގުޅިގެން އެފް.އޭ އަދި އެފް.އެޗް.ޓީ.އެސް ގެ ދަރިވަރުންނަށް ބޭއްވި މާހެފުމުގައެވެ. އެންމެ މޮޅު ފޮޓޯއެއް ލާ ފަރާތަކަށް ސިއާ އިން ދޭން ހަމަޖައްސާފައިވާ ޕާރޓީ ޕިއްޒާ ޝުޢައިބު އާ ހަވާލު ކޮށްދެއްވީ ސިއާ ގެ ނައިބު ރައީސާ (ޢަމަލީ) ރުޤިއްޔާ ރިމާނާ އެވެ.
މި ޗެލެންޖްގެ އެންމެ މޮޅު ފޮޓޯ ހޮވާފައިވަނީ ޖަޖުންގެ 50% މާރކުހާއި 50% ފޮޓޯ އަށް ލިބޭ ލައިކްސް އިންނެވެ. ޝުޢައިބު އަކީ އެމް.އެން.ޔޫ. ބިޒްނަސް ސްކޫލް ގައި މިދިޔަ އަހަރު ކިޔެވުން ޙާސިލް ކުރި ދަރިވަރެކެވެ. ބިޒްނަސް ގެ ދާއިރާއިން ކިޔެވުން ޙާސިލް ކުރި ނަމަވެސް ޝުޢައިބުގެ ޕްރޮފެޝަން އަކީ ފޮޓޯ ގްރަފީއެވެ. ޔުނިވާރސިޓީގައި އުޅުން އިރުވެސް އެއްވެސް އަގަކާއި ނުލައި އެމް.އެން.ޔޫ.އެސް.ޔޫ ގެ ފޮޓޯތައް ވެސް ނަގައިދީފައިވަނީ ފޮޓޯގްރަފީ އަށް އޮންނަ ލޯބިންނެވެ. އަދި މިހާރު މި ފޮޓޯ ގްރާފަރ މަސައްކަތް ކުރަނީ ރާއްޖެ ޓީވީ ގައެވެ.
ފޮޓޯ ނެގުމުގެ ދާއިރާއިން ދަރިވަރުންނާއި ލެކްޗަރަރ އިން އަދި ސްޓާފުންގެ ހުރި ހުނަރުތައް ފާހަގަ ކުރުމުގެ މަޤްސަދުގައި ހުޅުވާލި މި މުބާރާތުގެ ތީމަކީ “ޔުނިވަރސިޓީ ލައިފް” އެވެ. މި ޗެލެންޖަށް އެކި ފެކަލްޓީ ތަކުގެ ދަރިވަރުން މުޅިއެކު 7 ފޮޓޯ ލާފައިވެއެވެ.
ސިއާ ފޮޓޯ ޗެލެންޖް މިއަހަރުވެސް އޮންނާނެއެވެ..
ލިޔުނީ: އަޙްމަދު ޝައްފާޒު
ރައީސް
ސްޓޫޑެންޓްސް އިނިޝިއޭޓިވް އޮފް އާރޓްސް
