ފުރަތަމަ ބުރުގެ ބަހުސްތައް މިއަދު ހަވީރު ނިމުނުއިރު ފެކަލްޓީ އޮފް އާރޓްސް ގެ ޓީމް އޭ ދެވަނަ ބުރަށް ދަތުރުކޮށްފިއެވެ.
މިދިޔަ ހޯމަ ދުވަހުގެ ރޭ ފެށުން މި ބަހުސް މުބާރާތުގެ ފުރަތަމަ ބަހުސްގައި އެފް.އޭ ގެ އޭ ޓީމް 640 ޕޮއިންޓާއިއެކު ބަހުސް ކާމިޔާބުކުރީ ސީ.އެފް.އެސް.ގެ ބީ.ޓީމާއި ބަހުސްކޮށްގެންނެވެ. މި ބަހުސްގެ އެންމެ މޮޅު ބަހުސްކުރުން ތެރިޔާއަށް އެފް.އޭ ގެ ދަރިވަރު ހަފްސީ އަބްދުﷲ ހޮވިފައިވަނީ 284.50 ޕޮއިންޓާއެކުއެވެ. ދެވަނަ ބުރުގައި އެފް.އޭ ގެ ޓީމް އޭ ބައްދަލުކުރާނީ އެފް.އީ ގެ ޓީމް އޭ އާ ދެކޮޅަށެވެ. މާދަމާ ރޭ އޮންނާ މި ބަހުސްގައި ބަހުސްކުރުމަށް ހަމަޖެހިފައިވާ މަޢުޟޫޢު އަކީ ”ޖިނާއީ ކުށްތައް މަދުކުރެވޭނީ ޓެކްނޮލޮޖީގެ ބޭނުން ފުރިހަމަ ގޮތުގައި ހިފައިގެންނެވެ.“ މަޢުޟޫޢު އާ އެއްކޮޅަށް ބަހުސްކުރާނީ އާރޓްސްގެ އޭ ޓީމެވެ.
މިއަދު ހަވީރު އޮތް ފުރަތަމަ ބަހުސްގައި އެފް.އޭގެ ބީ ޓީމާއި އެފް.އީގެ ބީ ޓީމު ބައްދަލު ކުރި މެޗް 74.5 ޕޮއިންޓްގެ ފަރަގަކުން ބަހުސް ކާމިޔާބު ކޮށްފައިވަނީ އެފް.އީ ގެ ބީ ޓީމެވެ. މި ބަހުސްގެ އެނމެ މޮޅު ބަހުސްކުރުންތެރިޔަކަށް ހޮވިފައިވަނީ އެފް.އީ ޓީމް ބީ ގެ އާމިނަތު ހަމީޒާއެވެ. ނޮކް.އައުޓް އުޞޫލުން ކުރިއަށްދާ މުބާރާތަކަށް ވުމުން، މި ނަތީޖާ އާއި އެކު އެފް.އޭ ގެ ޓީމް ބީ މި ވަނީ މުބަރާތުން ކަޓާފައެވެ.
ދެވަނަ ބުރުގައި 3 ބަހުސް އެއް ކުރުމަށް ހަމަޖެހިފައިވާއިރު އެ 3 ބަހުސް އިން މޮޅުވާ ޓީމްތައް ތެރެއިން އެންމެ މަތިން ޕޮއިންޓް ހޯދާ ޓީމް އެއް ފައިނަލަށް ދަތުރު ކުރާނެއެވެ. ފައިނަލުގައި ދެން ވާދަ ކުރާޏެ ޓީމެއް ކަނޑައަޅާނީ ދެން އޮތް ދެ ޓީމުގެ މެދުގައި ސެމީ އެއް ކުޅެގެންނެވެ.
ލިޔުނީ: އަޙްމަދު ޝައްފާޒު
ރައީސް
ސްޓޫޑެންޓްސް އިނިޝިއޭޓިވް އޮފް އާރޓްސް
