އެމް.ޑަބްލިޔު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ އަންހެން އަދި ފިރިހެން ޑިވިޛަން ގައިވެސް އެފް.އޭ އިން ބައިވެރިވެއްޖެއެވެ.
2018 ވަނަ އަހަރުގައި އޮތް އެންމެ ބޮޑު އެމް.އެން.ޔޫ.އެސް.ޔޫ ފުޓްސަލް ފިއެސްޓާގައި އެފް.އޭ ގެ އެއްވެސް ޓީމަކުން ބައިވެރިވެފައި ނުވިނަމަވެސް، މިއަހަރުގެ މުބާރާތުގައި އެފް.އޭ އިން ވަނީ ދެ ޑިވިޛަންގައިވެސް ބައިވެރިވެފައެވެ. ފުޓްސަލް ފިއެސްޓާ އަށް އަންހެން ޑިވިޛަން ތަޢާރަފް ކުރިތާ ދެވަނަ އަހަރު، ފުރަތަމަ ފަހަރަށް އެފް.އޭގެ އަންހެން ފުޓްސަލް ޓީމެއް ބައިވެރިވެފައި މިވަނީ ސީދާ 14 ކުޅުންތެރިންގެ ޓީމަކާއެކުއެވެ. މީގެ އިތުރުން 2017 ވަނަ އަހަރު އެފް.އޭގެ ފިރިހެން ޓީމު 9 ކުޅުންތެރިންނާއިއެކު ބައިވެރިވެފައި ވީނަމަވެސް، މިފަހަރު ފިރިހެން ޓީމުވެސް ބައިވެރިވެފައިވަނީ 14 ކުޅުންތެރިނާއިއެކު ކަން ފާހަގަކޮށްލެވެއެވެ.
މިއަހަރު އެމް.އެން.ޔޫ.އެސް.ޔޫ އިން ބާއްވަމުން އަންނަ ހުރިހާ އިތުރު ހަރަކާތްތަކެއްގައިވެސް އެފް.އޭގެ ޓީމުތަކުން ބައިވެރިވެފައިވެއެވެ. އެގޮތުން އިންޓަރ ފެކަލްޓީ ވޮލީ މުބާރާތް 2019 ގައިވެސް އެފް.އޭގެ އަންހެން އަދި ފިރިހެން ޓީމު ބައިވެރިވިއެވެ. މީގެ އިތުރުން އެންމެ ފަހުން ބޭއްވި އިންޓަރ ފެކަލްޓީ ބަހުސް މުބާރާތް 2019 ގައިވެސް އެފް.އޭ ގެ ދެ ޓީމު ވާދަކޮށް އެއްޓީމުން ވަނީ 3 ވަނަ ހޯދާފައެވެ. ފެކަލްޓީ އޮފް އާޓްސްގެ ތާރީޚުގައި، ދަރިވަރުންގެ ފަރާތުން އިތުރު ހަރަކާތަކަށް އެންމެ ބޮޑު އެއްބާރުލުމެއް ލިބުން ހަރަކާތަކީ މިއަހަރުގެ މި ފުޓްސަލް މުބާރާތެވެ. އަދި މިއަހަރަކީ އާޓްސް ގެ ދަރިވަރުން އިތުރު ހަރަކާތް ތަކުގަޔާއި ސިއާ އިން ބޭނުންވާ ކަންކަމުގައިވެސް އެންމެ ފުރިހަމަޔަށް ބައިވެރިވެ އެއްބާރުލުން ދެމުންގެންދާ އަހަރުކަންވެސް އުފަލާއިއެކު ފާހަގަކުރަމެވެ.
މި މުބާރާތުގައި އެފް.އޭ ގެ ދެ ޓީމުންވެސް ބޭނުން ކުރާނީ ކަޅު ކުލައިގެ ޖާރޒީ އެވެ. މުބާރާތް މި ހަފްތާގެ ބުރާސްފަތި ދުވަހުގެ ހަވީރު ފަށާނެއެވެ.
ލިޔުނީ: އަޙްމަދު ޝައްފާޒު
ރައީސް
ސްޓޫޑެންޓްސް އިނިޝިއޭޓިވް އޮފް އާރޓްސް
