ސިއާ އާއި އެމެރިކަން ސެންޓަރ(މާލެ) ގުޅިގެން، ފަސްޓް އެއިޑް އަދި އެމަރޖެންސީ އިވެކްއޭޝަން އާ ބެހޭ މަޢުލޫމާތު ސެޝަނެއް އެމް.އެން.ޔޫ ގެ ދަރިވަރުންނަށް ބާއްވައިފިއެވެ.
އެމް.އެން.ޔޫ ގެ އެފް.އީ އޮޑިޓޯރިއަމްގއި ކުރިއަށްދިޔަ މި ސެޝަންގައި މަޢުލޫމާތު ދެއްވާފައިވަނީ ދިވެހި ރެޑްކްރެސެންޓްގެ ފަރާތުންނެވެ. ކުއްލި ނުރައްކަލުގެ ޙާލަތްތަކުގައި އެތިބި ތަނަކުން އަވަހަށް ނިކުންނަން ކަންތައް ކުރަންވީ ގޮތާއި، ގޭގެ އާއި އޮފީސްތައް އިމާރާތް ކުރާއިރުވެސް އަބަދުވެސް އެމަރޖެންސީ އެގްޒިޓް އެއް ނުވަތަ ކުއްލި ނުރައްކަލެއްގައި ސަލާމަތްވާނެ ގޮތެއް ހިމަނައިގެން ތަންތަން އިމާރާތް ކުރުމަށް، މި ސެޝަންގައިވަނީ މަޢުލޫމާތު ދީފައެވެ. މީގެ އިތުރުން ގޭތެރޭގައިވެސް އަބަދުވެސް ’ގޯ ބޭގް‘ އެއް ބޭއްވުން މުހިއްމު ކަމުގައިވެސް ރެޑް ކްރެސެންޓްގެ ފަރާތުން އެދުނެވެ.
މީގެ އިތުރުން ކުޑަ ޕްރެކްޓިކަލް އަކާއެކު ފަސްޓް އެއިޑް ފޯރުކޮށްދޭނެ ގޮތުގެ މަޢުލޫމާތު ވެސް ވަނީ މި ސެޝަންގައި ދީފައެވެ. ތަނެއް ކަނޑައިގެން ދިޔުމުން ދޭންޖެހޭ އަވަސް ފަރުވާއާއި ތަނެއް ފިހުމުން ކަންތައް ކުރަންވީގޮތް އަދި ތަނެއް ބިނދިފަ އޮވެއްޖެނަމަ ފަރުވާ ދޭންވީ ގޮތުގެ މަޢުލޫމާތު އެތާ ތިބި ދަރިވަރުންނަށް ވަރަށް ފުރިހަމައަށް ވަނީ ފޯރުކޮށްދީފައެވެ. އަދި ’ފިޓް‘ ޖެހުމުންނާއި ’ޗޯކް‘ ވެފައި ހުންނަ މީހަކަށް ކަންތައް ކުރަންވީ ގޮތްވެސް ވަނީ ދައްކުވައިދީފައެވެ.
މިހާރަކަށް ރާއްޖޭގެ އެކި ހިސާބުތަކުގައި ނުރައްކާތެރި ޙާދިސާތައް ދަނީ ހިންގަމުންނެވެ. އެހެން ކަމުން މިފަދަ ކަންކަމުގައި ކަންކުރަންވީ ގޮތާއި މެދު އެމް.އެން.ޔޫ ގެ ދަރިވަރުން ހޭލުންތެރިކުރުމަށް ބޭއްވި މި ސެޝަންގައި މިކަމާ ބެހޭ މަޢުލޫމާތު ލިބިގެން ދިޔަކަން ފާހަގަކުރެވެއެވެ.
ލިޔުނީ: އަޙްމަދު ޝައްފާޒު
ރައީސް
ސްޓޫޑެންޓްސް އިނިޝިއޭޓިވް އޮފް އާރޓްސް
