ނަޞްރުގެ ދުވަހާއި ގުޅުވައިގެން ސިއާގެ ފަރާތުން ’ނަޞްރުގެ އައްޑަނަ‘ މި ނަމުގައި އާރޓް އެގްޒިބިޝަން އެއް ބާއްވާއިފިއެވެ.
ނޮވެންބަރު 2 އަދި 3 ގައި ބޭއްވި މި އާރޓް އެގްޒިބިޝަންގައި ހުރި ހުރިހާ ކުރެހުންތަކަކީވެސް އެމް.އެން.ޔޫ ގެ ދަރިވަރުންގެ އަމިއްލަ ކުރެހުންތަކެކެވެ. އާއްމުންނަށްވެސް ހުޅުވާލައިގެން ބޭއްވި މި އެގްޒިބިޝަން ހުޅުވައިދެއްވީ ޑީން އޮފް ސްޓޫޑެންޓްސް ނާދިޔާ ޢަލީ އެވެ.
ނާދިޔާ މިސް ފާހަގަ ކުރެއްވީ ސްޓޫޑެންޓް ޔޫނިއަންގެ ވިންގެއް ކަމުގައިވާ ސިއާ ގެ ފަރާތުން މިފަދަ ކަމެއް ބޭއްވުމަކީ ދަރިވަރުންގެ ހިތްތަކުގައި ޤައުމީ ލޯބި އަށަގަންނުވައި ތާރީހީ މިފަދަ ދުވަސްތައް ފާހަގަ ކުރުމަށް ލިބިގެނަދާނެ ހިތްވަރެއްކަމުގައެވެ. އަދި އެތަނުގައި ބެހެއްޓިފައި ހުރި ތަފާތު އެކި ކުރެހުންތައް ނާދިޔާ މިސް ވަނީ ބައްލަވާލައްވާފައެވެ. ކޮންމެ ކުރެހުމެއްވެސް އެ ކުރެހުމެއް ކުރެހި ދަރިވަރު ދިޔައީ އެ ކުރެހުމަކުން ދައްކުވައިދޭ މަންޒަރުތައް އިތުރަށް ކިޔައިދެމުންނެވެ. މި އެގްޒިބިޝަންގައި ދައްކާލެވިފައިވަނީ ’ސިއާ ޕެއިންޓް ކޮމްޕެޓިޝަން 2019‘ އަށް ހުށަހަޅާފައިވާ ކުރެހުންތަކެވެ. މުޅިއެކު 13 ދަރިވަރެއްގެ 17 ކުރެހުން މި އެގްޒިބިޝަންގައި ވަނީ ބެހެއްޓިފައެވެ. މި އެގްޒިބިޝަން އިން އެމް.އެން.ޔޫ ގެ ހުނަރުވެރި އާޓިސްޓުންގެ ތަފާތު ވިސްނުންތަކުގެ ކުރެހުންތައް ފެނިގެންގޮސްފައިވެއެވެ. މި އެގްޒިބިޝަން އަށް ގިނަ އަދަދެއްގެ އާއްމުންނާއި ދަރިވަރުން ވަދެފައިވެއެވެ.
ސިއާ ޕެއިންޓް ކޮމްޕެޓިޝަން އާއި އާރޓް އެގްޒިބިޝަން އެއް އަންނަ އަހަރުވެސް ބޭއްވުމަށް ވަނީ ހަމަޖެހިފައެވެ.
ލިޔުނީ: އަޙްމަދު ޝައްފާޒު
ރައީސް
ސްޓޫޑެންޓްސް އިނިޝިއޭޓިވް އޮފް އާރޓްސް
