ސިއާ ޅެން ހެދުމުގެ މުބާރާތް 2019 އަށް ހުށަހެޅި އެންމެ މޮޅު ޅެމަކަށް، އެމް.އެން.ޔޫ.އެސް.ޔޫ ގެ ރައީސް އަލްފާޟިލް މުޙައްމަދު ޝާން އާމިރުގެ ޅެން ހޮވިއްޖެ އެވެ.
މި ޅެން މުބާތުގެ އެއްވަނަ ހާސިލް ކުރުމާ ގުޅިގެން ’ކަރަންކާ‘ ގެ ލަޤަބު ޝާން އަށް ވަނީ ދެވިފައެވެ. އެންމެ ފުރަތަމަ މި ލަޤަބު ހާސިލް ކުރި އަޅުގަނޑުމެންގެ ރައީސް ޝާން އަކީ ހޮބީ އެއްގެ ގޮތުގައި ޅެންވެރިކަމުގެ މަސައްކަތް ކުރަމުން އަންނަ ފަރާތެކެވެ. ކަރަންކާ ގެ ލަޤަބު ޝާން އަށް ހަމަ ހައްގެވެ. އެކަން ފޭސް ބުކް ޕޭޖް އެއް ކަމަށްވާ ’ބުލެޓް ޕޮއެޓްރީ‘ ގައި ހުރި ޅެންތައް ކިޔާލުމުން ވެސް އެނގޭނެއެވެ. ޝާން ހަދާފައިވާ އަސަރުން ފުރިގެންވާ ޅެންތައް އެ ޕޭޖުން ފެންނާނެއެވެ. ޅެންވެރި ކަމުގެ ބަގީޗާގައި ހެދެމުން ފައްކާވަމުން ފަރިވެ ފޮޅެމުން އަންނަ މަލެއްކަން ޔަޤީން ވާނެއެވެ.
ފަހަރެއްގައި މި އެވޯރޑް ޔޫނިއަންގެ ރައީސް ހޯދުމުން ބައެއް ފަރާތްތަކުގެ ހިތުގައި ސުވާލު އުފެދިދާނެތީ ބުނެލަމެވެ. މި މުބާރާތަކީ ޔޫނިއަންގެ ވިންގަކުން ކުރިއަށް ގެންދިޔަ މުބާރާތެއްކަމުން، މީގައި ސިއާގެ މެމްބަރުން ފިޔަވާ ދެން އެމް.އެން.ޔޫގެ ހުރިހާ ދަރިވަރުންނަށް ވެސް ބައިވެރިވުމުގެ ފުރުސަތު ވާނީ ހުޅުވާލެވިފައެވެ. އޭގެ ތެރޭގައި ޔޫނިއަންގެ މެމްބަރުންނާއި އެހެން ވިންގުތަކުގެ މެމްބަރުން ވެސް ހިމެނެއެވެ. އެއީ އެމް.އެން.ޔޫ ގެ ދަރިވަރުން ކަމުގައި ވާތީއެވެ.
ޝާން އަކީ މި މުބާރާތުގައި 2018 ވަނަ އަހަރުވެސް ބައިވެރިވި ފަރާތެކެވެ. އެކަމަކު އެފަހަރު ލިބުނީ 3 ވަނަ އެވެ. މިއަހަރުގެ މުބާރާތުން އެއްވަނަ އަށް ދިޔަކަމުގެ ފިލަޔާއި ކަރަންކާގެ ލަޤަބު ޝާން އަށް އެރުވީ ޔޫނިއަންގެ ނައިބު ރައީސް (ގޮފިތައް) އަލްފާޟިލް ޢަލީ ޝަމްއޫން އެވެ. އަދި މި މުބާރާތުގެ ބައިވެރިންނަށް ސެޓްފިކެޓް ވެސް ވަނީ ހަވާލުކޮށްފައެވެ.
މި މުބާރާތަާއި، ޕެއިންޓް ކޮމްޕެޓިޝަން ގެ ވަނަތައް ދީފައިވަނީ ’އާތޮނައިތޮ 2019‘ ގައެވެ.
ލިޔުނީ: އަޙްމަދު ޝައްފާޒު
ރައީސް
ސްޓޫޑެންޓްސް އިނިޝިއޭޓިވް އޮފް އާރޓްސް
