ސިއާ ޕެއިންޓް ކޮމްޕެޓިޝަން 2019 ގެ އެއްވަނަ ދަ ބެޓްލް ފޯރ ޕެރެޑައިސް ނަމުގައި ހުށަހަޅާފައިވާ ކުރެހުމަށް ލިބިއްޖެ އެވެ. މި ކުރެހުން ކުރަހާފައި ވަނީ ވިޝުއަލް އާރޓް ގެ ދަރިވަރެއް ކަމުގައިވާ ޙަސަން މައަ’އަދް މަހްމުމޫދަށެވެ.
ވޯލްޑް އާރޓިސްޓްސް ޑޭ އާއި ނަޞްރުގެ ދުވަހާއި ގުޅުވައިގެން ހުޅުވާލި މި އާރޓް ކޮމްޕެޓިޝަން އަށް 17 ކުރެހުމެއް ވަނީ ހުށަހަޅާފައިވެ. އަދި 13 ކުދިން ބައިވެރިވެފައިވެއެވެ. ނަޞްރުގެ ދުވަހުގެ ތީމަށް ކުރެހުން ހުށަހަޅަން އޮތް، މި މުބާރާތުގެ އެއްވަނަ އަށް ދިޔަ ކުރެހުމަކީ ވަރަށް ތަފާތު ވިސްނުމެއްގެ ނަޒަރަކުން ކުރަހާފައިވާ ކުރެހުމެއްކަނަ ފާހަގަ ކުރެވެއެވެ. ’ނަސްރުގެ އައްޑަނަ‘ އާރޓް އެގްޒިބިޝަންގައި ވެސް ގިނަބައެއްގެ ލޮލުގައި މި ކުރެހުން އަޅައިގަތީ މި ސަބަބާ ހެދި އެވެ.
މި ކުރެހުމުން ފެންނަނީ ތަމަޅައިންނާ ދިވެހިންނާ ކުރެވުނު ހަނގުރާމަ އެވެ. މިނިކާވަގުތަކެއް ގޮތައް ތަމަޅައިން ސިފަ ކޮށްދީފައި ވާއިރު ކަންނެލި ތަކެއް ގޮތައް ސިފަކޮށްދީފައިވަނި ދިވެހިރާއްޖޭގެ މީހުންނެވެ. މި ކުރެހުން ސޯޝަލް މީޑިއާގައި ވެސް އެދުވަހު ވަރަށް ގިނައިން ދައުރުވަމުން ދިޔަކަން ފާހަގަ ކުރެވެއެވެ.
މި މުބާރާތުގެ ދެވަނަ ހޯދާފައިވަނީ ވެސް ހަމަ އެހާމެ ރީތި ހިތްގައިމު ކުރެހުމެއް ކަމުގައިވާ ’މާޓަ‘ އެވެ. އެ ކުރެހުން ހުށަހަޅާފައިވަނީ ހަމަ ވިޝުއަލް އާރޓްގެ ދަރިވަރެއް ކަމުގައިވާ ސުމާ ހަސަން އެވެ. އަދި 3 ވަނަ ވަނީ ދެ ކުރެހުމަކަށް ލިބިފައެވެ. އެއީ ވިޝުއަލް އާރޓްސް ގެ މަރްޔަމް ސާނީ ހުށަހަޅާފައިވާ ’ ނޮވެމްބަރ 3‘ އާއި ފެސްޓްގެ ދަރިވަރެއް ކަމުގައިވާ މަރްޔަމް ޝީޒާ ހުށަހަޅާފައިވާ ’ޒުވާން ބަޠަލް‘ މި ދެ ކުރެހުމަށެވެ.
ވަނަ ވަނައަށް ދިޔަ ކުރެހުންތަކުގެ އިތުރުންވެސް ހުނަރުން ފުރިގެންވާ ރީތި އެތައް ކުރެހުމެއް މި ކޮމްޕެޓިޝަން އަށް ހުށަހަޅާފައިވެ އެވެ. ކުރެހުންތައް ޖަޖު ކޮށްދެއްވީ މި ދާއިރާގެ ތަޖުރިބާކާރު ދެ ފަރާތް ކަމަށްވާ ނައިމްބެ އަދި އަފީފްބެ އަދި މީގެ އިތުރުން 2017 ވަނަ އަހަރުގެ ވިޝުއަލް އާރޓްގެ ދަރިވަރެއް ކަމުގައިވާ ޒިދާން އެވެ.
މި މުބާރާތުން ވަނަތައް ޙާޞިލު ކުރި ދަރިވަރުންނަށް ފިލާ ހަވާލު ކޮށްދެއްވީ ޔޫނިއަންގެ ރައީސް އަލްފާޟިލް މުޙައްމަދު ޝާން އާމިރެވެ.
މި މުބާރާތުގެ ވަނަތަކަށް ދިޔަ ފަރާތްތަކަށް ފިލަޔާއި ބައިވެރިންނަށް ސެޓްފިކެޓް ހަވާލުކޮށްފައިވަނީ ’އާތޮނައިތޮ 2019‘ ގަ އެވެ.
ލިޔުނީ: އަޙްމަދު ޝައްފާޒު
ރައީސް
ސްޓޫޑެންޓްސް އިނިޝިއޭޓިވް އޮފް އާރޓްސް
