ޚިދުމަތުގެ އަރުތަ އެވޯޑަކީ މިދިޔަ އަހަރު ސިއާ ތަޢާރަފް ކުރި އެވޯޑެކެވެ. މިދިޔަ އަހަރު އަބްސީ ސަރ އަށް ދިން ފެއަރވެލްގައި ތަޢާރަފް ކުރި މި އެވޯޑަކީ ސިއާ އާއި އެފް.އޭ ގެ ކަންކަމުގައި ސިއާގެ މެމްބަރުންގެ އިތުރުން އެންމެ ރަނގަޅަށް ހަރަކާތްތެރިވާ ދަރިވަރަކަށް ނުވަތަ ދަރިވަރުންތަކަކަށް ހިތްވަރުދީ އަގުވަޒަން ކުރުމުގެ ގޮތުން ސިއާ އިން ދޭން ނިންމި އެވޯޑެކެވެ.
މި އެވޯރޑް މި ދިޔަ އަހަރު އެންމެ ދަރިވަރެއް ހޯދި ކަމުގައި ވިޔަސް މިއަހަރު މި އެވޯރޑް ދެ ދަރިވަރުންން ހޯދާފައިވާކަން އުފަލާއިއެކު ފާހަގަ ކުރަމެވެ. މިއަހަރު އެފް.އޭ ގެ ލީޑަރުން ގިނަވެފައިވާ ކަން މި ކަމުގެ ސަބަބުން ވެސް އެބަ ހާމަ ވެއެވެ. މިކަން ފާހަގަވާ އަނެއް ކަމަކީ މި އެވޯރޑް މިބުރު ތިންވަނަ ކުއްޖަކަށް ލިބެންވެސް ވަރަށް ވާދަކުރި ކަމެވެ. މި ދެކުދިންނަށް ލިބުނީ ހަމަ އެންމެ ހަރަކާތެއްގައި އިތުރަށް ކަންކަން ކުރުމުގެ ސަބަބުންނެވެ.
އަޒްމާ އިބްރާހީމް އަދި އަމަތުﷲ އަބްދުﷲ ސިއާ އަށް ތަޢާރަފް ވީ މި އަހަރުގެ ފުރަތަަމަ ސެމިސްޓާގައި އޮތް ވޮލީބޯޅަ މުބާރާތުގެ ތެރެއިންނެވެ. ޓީމުގެ ޕްލެޔަރުންގެ އިތުރުން ޓީމަށް ހިތްވަރު ދީ އެހެނިހެން ކަންކަންވެސް މި ދެ މީހުންނާއި އަދި އިތުރު ކުދިން ވެސް ދިޔައީ ކުރަމުންނެވެ. ވޮލީ އިން އުފެދުނު ރަހުމަތްތެރި ކަމާއެކު އަޒްމާ އާއި އަމަތު އަދިވެސް ވޮލީ ޓީމުގެ ބައެއް ކުދިންނާއިއެކު އަދި އާ ކުދިންތަކަކާއެކު ފުޓްސަލްގައި ބައިވެރިވިއެވެ. ފުޓްސަލްގައިވެސް ދަނޑު ބޭރަށް ބޭނުންވާ ޖޫހާ އެއްޗެހި ތައްޔާރުކުރުމަށް ވެސް އަޒްމާ ހަރަކާތްތެރިވިއެވެ. މީގެ އިތުރުން ޓީމުގެ މުހިންމު ކުޅުންތެރިއެއްގެ ގޮތުގައި އަމަތު ވަނީ ވެފަ އެވެ.
އަޒްމާ އިބްރާހީމް އަމަތުﷲ އަބްދުﷲ
ދެންވެސް ހަމަ ވޮލީ އާއި ފުޓްސަލް ކުޅުނު ބައެއް ކުދިންނާއި އާ ކުދިންކޮޅަކާއި އެކު ނެޓްބޯޅައިގައި ބައިވެރިވި ޓީމުގައި ވެސް އަޒްމާ އާއި އަމަތު ހުއްޓެވެ. ނެޓްބޯޅަ ޓީމްވެސް މުހިންމު ކުޅުންތެރިއަކަށް އަމަތުވެފައި ވާއިރު އަޒްމާ ވެސް ދިޔައީ ހިތްވަރު ގަދަ ކުޅުމެއް ކުޅެމުންކަން ފާހަގަކޮށްލެވެއެވެ. އެންމެ ފަހުން ފެކަލްޓީ ރަމްޒުކޮށްދޭން ފުރުސަތު ލިބިފައިވަނީ ’އެމް.އެން.ޔޫ.އެސް.ޔޫ ޕްރެޒެންޓްސް ދަ ނެކްސްޓް ލެވެލް‘ ޓެލެންޓް ޝޯ ގައެވެ. އެ ޝޯގައި އެފް.އޭ އިން ހުށަހެޅި ޑްރާމާގެ އެންމެ އިސް ރޯލް ކުޅެފައިވަނީ ވެސް ހަމަ އަޒްމާ އާއި އަމަތު އެވެ. މި ދެ ދަރިވަރުން ބައިވެރި ނުވެ އޮތީ މަދަހަ މުބާރާތާއި ޤުރުއާން މުބާރާތުގައި އެކަންޏެވެ. އެހެން ނަމަވެސް މި އެވޯރޑް މި ދެ ދަރިވަރުން ނޫން އެހެން ދަރިވަރުންތަކަކަށް ހައްޤު ހެއްޔެވެ؟
ކުރިއަށް އޮތް އަހަރުވެސް ފެކަލްޓީ އޮފް އާރޓްސް ގެ ލީޑަރުން ހަރަކާތްތަކުގައި ބައިވެރިވާ މިންވަރު އިތުރުވެ މި އެވޯރޑަށް ގިނަބަޔަކު ވާދަ ކޮށް ހޯދަން މަސައްކަތް ކުރުމަކީ ’ސިއާ‘ ގެ އުއްމީދެވެ.
ލިޔުނީ: އަޙްމަދު ޝައްފާޒު
ރައީސް
ސްޓޫޑެންޓްސް އިނިޝިއޭޓިވް އޮފް އާރޓްސް
