ސިއާ ޅެން ހެދުމުގެ މުބާރާތް 2020ގެ ނަތީޖާ އިޢުލާންކޮށްފިއެވެ. މި މުބާރާތުގެ ރަސްމީ ނަތީޖާ އިޢުލާންކޮށްފައިވަނީ ސިއާގެ ސޯޝަލް މީޑިއާ ޕޭޖްތައް މެދުވެރިކޮށް މިމަހުގެ 02 ވީ ބުދަ ދުވަހުއެވެ. ކޮވިޑްގެ ޙާލަތާއި ގުޅިގެން ހަފްލާއެއް ނުބޭއްވުނު ނަމަވެސް މުބާރާތުގެ ހުރިހާ ބައިވެރިންނަށް ވަނީ ބައިވެރިވިކަމުގެ ލިޔުމާއި އަދި ވަނަވަނައަށް ދިޔަ ފަރާތްތަކަށް ސެޓްފިކެޓް އީމޭލް ކުރެވިފައެވެ.
މިއަހަރުގެ މުބާރާތުގެ ފަޚުރުވެރި އެއްވަނަ ޅެމަކީ ފެކަލްޓީ އޮފް އާރޓްގެ ދިވެހިބަހުގެ މާސްޓާރސް ކޯސް ފުރިހަމަ ކުރަމުންދާ ދަރިވަރު ޢާއިޝަތު ޙުސައިން މަނިކު ހުށަހަޅާފައިވާ ޅެން ”މަޢުނަވީ ޢާލަމުން“ އެވެ. މި ވަނައާއި އެކު ޢާއިޝާ ވެގެން ދާނީ މިއަހަރު ”ކަރަންކާ“ގެ ލަޤަބު ޙާޞިލުކުރި ބައިވެރިއަށެވެ. މުބާރާތުގެ އެއްވަނަ ބައިވެރިޔާއަށް ކަނޑައެޅިފައިވާ ފައިސާގެ އިނާމުވެސް މިހާރު ވާނީ ޙަވާލުކުރެވި ނިމިފައެވެ.
ދެވަނައަށް އެންމެ މަތިން މާރކްސް ލިބުނު ޅެމަކީ ސްކޫލް އޮފް މެޑިސިންގެ ދަރިވަރު އަނޫފް ޢަބްދުﷲގެ ”ގެވެށި އަނިޔާ“ ޅެމެވެ. މުބާރާތުގެ ތިންވަނަ ޅެމަކީ ފެކަލްޓީ އޮފް ހެލްތް ސައިންސަސްގެ ދަރިވަރު ޢަބްދުﷲ ޛައިދު ހުށަހެޅި ޅެން ”ފިނިފެންމާ“ އެވެ.
މިއަހަރުގެ މުބާރާތަށްވެސް ލިބުނު ތަރުޚީބަށާއި އަދި އެކި ގޮތްގޮތުން ލިބުނު އެހީތެރިކަން ފާހަގަކޮށް އެފަރާތްރަކަށް ޝުކުރު ދަންނަވަމެވެ. އަދި ވަކިން ޚާއްސަކޮށް މުބާރާތުގެ ޅެންތައް މާރކުކޮށްދެއްވި ފެކަލްޓީ އޮފް އާރޓްސްގެ ލެކްޗަރަރ އަންވަރު އިބްރާހީމަށް ވަރަށް އިޚުލާސްތެރި ޝުކުރެއް ދަންނަވަމެވެ.
އުންމީދަކީ މިއަންނަ އަހަރުވެސް މިމުބާރާތުގައި ގިނަ ދަރިވަރުންތަކެއް ބައިވެރިވެ، އެކުދިންގެ އަދަބީ ހުނަރު ފެނިގެން ދިއުމެވެ.
ލިޔުނީ: ފާޠިމަތު މުޙައްމަދު އަޙްމަދު
މީޑިޔާ ކޯރޑިނޭޓަރ
ސިއާ
