އެމް.އެން.ޔޫ.އެސް.ޔޫ ސިއާ މަދަހަ މުބާރާތުގައި ބައިވެރިވުމުގެ ފުރުސަތު ހުޅުވާލައިފި

ދިވެހިރާއްޖޭގެ ގައުމީ ޔުނިވާސިޓީގެ ދަރިވަރުންގެ ޔޫނިއަންއާއި، ސްޓޫޑެންޓް އިނީޝިއޭޓިވް އޮފް އާރޓްސް (ސިއާ)އާ ގުޅިގެން 1442 ވަނަަ އަހަރުގެ ރަމަޟާން މަހަށް ހާއްސަ ކޮށްގެން ބާއްވާ މަދަހަ މުބާރާތުގައި ބައިވެރިވުމުގެ ފުރުސަތު ހުޅުވާލައިފިއެވެ.

މި މުބާރާތުގައި ބައިވެރިވުމުގެ ފުރުސަތު މިހާރު ހުޅުވާލައިފައިވާއިރު މި މުބާރާތުގައި ގައުމީ ޔުނިވާސިޓީގެ ހުރިހާ ދަރިވަރުންނަށް ވެސް ބައިވެރި ވެވޭނެއެވެ.

މީގެ އިތުރުން މި މުބާރާތް ކުރިއަށް ދާނި ވަރަށް ތަފާތު ގޮތަކަށް ކަމުގައި ސިއާއިން ބުނެއެވެ. އެގޮތުން މުބާރާތުގެ ބައިވެރިން ޝެޑިއުލެއްގެ ދަށުން ޔުނިވާސިޓީގެ މާލަމަކަށް ގެނެވި، މަދަހަތައް ރިކޯޑް ކުރެވޭނެ ކަމުގައި ސިއާއިން ބުނެއެވެ. އަދި ބައިވެރިން މަދަހަ ހުށަހަޅާނީ ފަނޑިޔާރުންގެ ކުރިމަތީގައި ކަމަށާއި ބައިވެރިން މަދަހަ ހުށަހަޅައި ނިމުމުން އެ މަދަހައަށް ފަނޑިޔާރުން އިންސާފް ކުރައްވާނެ ކަމަށް ސިއާއިން ބުނެއެވެ.

މި މުބާރާތުގައި މުޅި މުބާރާތުގެ އެންމެ މޮޅު ފަސް މަދަހަ ހޮވުމަށް ނިންމާފައިވާއިރު އެ މަަދަހަތަކުގެ ތެރެއިން އެއްވަނަ، ދެވަނަ އަދި ތިންވަނަ މަދަހަ ވެސް ހޮވިގެން ދާނެއެވެ. އަދި މުބާރާތުގެ މަދަހަތަކުގެ ތެރެއިން އެންމެ ރީތި ޅެމާއި އެންމެ ރީތި ރާގު ވެސް ހޮވިގެންދާނެ ކަމަށް ސިއާ އިން ބުނެއެވެ.

ކޮވިޑް-19ގެ ސަބަބުން މި ދުވަސްވަރު އެއްތަނަކަށް އެއްވެ މުބާރާތް ކުރިއަށް ގެންދިއުމަށް ގިނަ ދަތިތަކަކާ ކުރިމަތިވާނެތީ މިފަދަ ގޮތަކަށް މުބާރާތް ކުރިއަށް ގެންދިއުމަކީ ބައިވެރިން ވެސް ބޮޑަށް ޝައުގުވެރިވާނެ ގޮތެއް ކަމަށް ސިއާ އިން ފާހަގަ ކުރިއެވެ.
މި މުބާރާތުގައި ބައިވެރިވުމުގެ ފުރުސަތު ހުޅުވާލައިފައިވާއިރު މުބާރާތުގައި ބައިވެރިވުމަށް އެދޭ ފޯމް އެމްއެންޔޫއެސްޔޫގެ ފޭސްބުކް ޕޭޖުންނާއި ސިއާގެ ފޭސްބުކް ޕޭޖުން ލިބޭނެއެވެ.

މުބާރާތުގެ އިތުރު މައުލޫމާތު ސާފު ކުރުމަށް 9900943 ނުވަތަ 9922891 އަށް ގުޅުމަށް ސިއާ އިން އެދެއެވެ.