”ސިއާ – ހީލާރސް ވެލްކަމް ނައިޓް“ ހުކުރުދުވަހުގެ ރޭ ބާއްވަނީ

ފެކަލްޓީ އޮފް އާރޓްސް (އެފް.އޭ)ގެ ގޮފި ސްޓޫޑެންޓްސް އިނީޝިއޭޓިވް އޮފް އާރޓްސް (ސިއާ) އާއި ފެކަލްޓީ އޮފް ހެލްތް ސައިންސަސް (އެފް.އެޗް.އެސް) ގެ ގޮފި ހީލާރސް ގުޅިގެން އެ ދެ ފެކަލްޓީގެ ދަރިވަރުންނަށް މިއަހަރުގެ ފުރަތަމަ ”ވެލްކަމް ނައިޓް“ ހުކުރުދުވަހުގެ ރޭ ބާއްވަން ނިންމައިފިއެވެ.

މި ހަރަކާތް ބާއްވަން ހަމަޖެހިފައިވަނީ ފެބުރުވަރީ 24 ވަނަ ދުވަހުގެ ރޭ، 20:00ގައި، އެފް.އެޗް.އެސް ކޮންފަރެންސް ހޯލްގައެވެ.

މިއީ މި އަހަރު އެފް.އޭ އަދި އެފް.އެޗް.އެސް އަށް ގުޅުނު ދަރިވަރުންނަށް މަރުޙަބާ ކިޔުމުގެ ގޮތުން ބާއްވާ ހަރަކާތެކެވެ.

ސިއާ އާއި ހީލާރސް ގުޅިގެން ބާއްވާ ”ވެލްކަމް ނައިޓް“ގައި، ގޮފިތަކުގެ ހިންގާ ކޮމިޓީގެ މެމްބަރުންނާއި އިސްވާރުން ތަޢާރަފްކޮށްދިނުން އޮންނާނެއެވެ. އަދި ތަފާތު ގިނަ ކުޅިވަރުތަކާއެކު އެހެނިހެން ހަރަކާތްތައް ކުރިއަށް ގެންދިއުމަށްވެސް ވަނީ ހަމަޖެހިފައެވެ. މި ދެ ގޮފީގެ މަޤްސަދަކީ މި ހަރަކާތްތަކުގެ އެހީގައި ގޮފިތަކުގެ މެމްބަރުންނާއި، ގޮފިތަކުގެ އިސްވާރުންނާއި އަދި ދަރިވަރުންގެ މެދުގައި ގުޅުން ބަދަހިކޮށް އެކުވެރިކަން އާލާކުރުމެވެ.

ސިއާ އަދި ހީލާރސްގެ އުންމީދަކީ ކާމިޔާބު ހަރަކާތަކުން އަހަރުގެ ހަރަކާތްތައް ފެށުމެވެ.