މި އަހަރުގެ ރަމަޟާން މަހާ ދިމާކޮށް ދިވެހިރާއްޖޭގެ ޤައުމީ ޔުނިވާސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އަދި އެމް.އެން.ޔޫ.އެސް.ޔޫގެ ފެކަލްޓީ އޮފް އާރޓްސްގެ ގޮފި ސްޓޫޑެންޓްސް އިނީޝިއޭޓިވް އޮފް އާރޓްސް (ސިއާ) ގުޅިގެން ބާއްވާ 5 ވަނަ އެމް.އެން.ޔޫ.އެސް.ޔޫ – ސިއާ މަދަޙަ މުބާރާތް 1444ގައި ބައިވެރިވުމުގެ ފުރުޞަތު ހުޅުވާލައިފިއެވެ.
އޭޕްރީލް 10 އިން 12 އަށް ކުރިއަށް ގެންދިޔުމަށް ހަމަޖެހިފައިވާ މި މުބާރާތް ބަހާލެވިފައިވަނީ ދެބަޔަކަށެވެ. އެއީ ވަކިވަކި މަދަޙަ ހުށަހެޅުމާއި ގުރޫޕު މަދަޙަ ކިޔުމުގެ ބައެވެ.
މިއަހަރުގެ މަދަޙަ މުބާރާތުގައިވެސް ވަކިވަކި މަދަޙަ ކިޔުމުގެ ބައިގައި ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ)ގައި ރަޖިސްޓްރީވެގެން ކިޔަވަމުންދާ ކޮންމެ ދަރިވަރަކަށްވެސް ބައިވެރިވުމުގެ ފުރުޞަތުވަނީ ދެވިފައެވެ.
މުޅިން އަލަށް މިދިޔަ އަހަރު ތައާރަފްކުރި ގުރޫޕް މަދަޙަ ކިޔުން މިއަހަރުގެ މުބާރާތުގައިވެސް ވަނީ ހިމަނާފައެވެ. މި ބައިގައި ބައިވެރިވުމުގެ ފުރުޞަތު އެމް.އެން.ޔޫގެ ކޮންމެ ފެކަލްޓީއެއްގެ އިތުރުން ކޮލެޖް، ސެންޓަރ އަދި ހައި ސުކޫލްތަކަށް ވަނީ ދެވިފައެވެ.
މަދަޙަ މުބާރާތުގައި ބައިވެރިވުމުގެ ސުންގަޑިއަކީ 7 އޭޕްރީލް 2023 ވަނަ ދުވަހުގެ، 1800 އެވެ. ބައިވެރިވުމަށް އެދޭ ފޯމާއި މުބާރާތުގެ ޤަވައިދު ސިއާގެ ފޭސްބުކް ޕޭޖުން ފެންނާނެއެވެ.
އެމް.އެން.ޔޫ.އެސް.ޔޫ ސިއާ މަދަޙަ މުބާރާތް ފުރަތަމަ ބޭއްވުނީ 2013 ވަނަ އަހަރުގައެވެ. މެދުކެނޑުމަކަށް ފަހު ދެވަނަ މުބާރާތެއް ބޭއްވުނީ 2019 ވަނަ އަހަރުގައެވެ. އޭގެ ފަހުން ކޮންމެ އަހަރަކުވެސް މި މުބާރާތް ބާއްވާއިރު މި އަހަރު މި ބޭއްވެނީ އެމް.އެން.ޔޫ.އެސް.ޔޫ ސިއާ މަދަޙަ މުބާރާތުގެ 5 ވަނަ މުބާރާތެވެ. މިދިޔަ އަހަރުގެ މުބާރާތުގެ އެއްވަނަ ހޯދާފައިވަނީ ސްކޫލް އޮފް މެޑިސިންގގެ ދަރިވަރު ޒައިނާ ޖުނައިދުއެވެ. އެންމެ މޮޅު ފެކަލްޓީއަކަށް މިދިޔަ އަހަރު ހޮވުނީ ފެކަލްޓީ އޮފް ޝަރީޢާ އެންޑް ލޯއެވެ.