1445 ވަނަ އަހަރުގެ ރަމަޟާން މަހާ ގުޅިގެން ދިވެހިރާއްޖޭގެ ޤައުމީ ޔުނިވާސިޓީގެ ދަރިވަރުންގެ ޔޫނިއަން އަދި އެ ޔޫނިއަންގެ ގޮފި ސުޓޫޑެންޓްސް އިނީޝިއޭޓިވް އޮފް އާރޓްސް ގުޅިގެން ބާއްވާ އެމް.އެން.ޔޫ.އެސް.ޔޫ – ސިއާ 6 ވަނަ މަދަޙަ މުބާރާތް ރޭގައި ފަށައިފިއެވެ.
އެމް.އެން.ޔޫ ސީއޭ އޮޑިޓޯރިއަމްގައި ކުރިއަށްދިޔަ މި މުބާރާތުގައި ރޭގެ ދަންފަޅީގައި ކުރިއަށް ގޮސްފައިވަނީ ވަކިވަކި ދަރިވަރުންގެ ބައެވެ. އެމް.އެން.ޔޫގެ ހުރިހާ ދަރިވަރުންނަށް ހުޅުވާލި މި މުބާރާތުގައި ވަކިވަކި ދަރިވަރުންގެ ބައިގައި ޖުމްލަ 65 އަށް ވުރެ ގިނަ ދަރިވަރުން ވަނީ ބައިވެރިވިވެފައެވެ. މީގެ ތެރެއިން 30 ދަރިވަރުންވަނީ ރޭ މަދަޙަ ހުށައަޅައިދީފައެވެ. މިބައިގެ ބާކީ ބައިވެރިންގެ މަދަޙަ ކިޔުންވަނީ މިރޭ ކުރިއަށް ގެންގޮސްފައެވެ.
މުބާރާތުގައި ކުރިއަށް ދެން އޮންނާނީ ގްރޫޕް މަދަހައިގެ ބައެވެ. މި ބައިގެ ހުށައެޅުން 27 މާރިޗުވާ ބުދަ ދުވަހުގެ ރޭ 21:00ގައި އޮންނާނެއެވެ. މި ގޮފީގައި 9 ފެކަލްޓީއަކުން 14 ގްރޫޕުން ހުށައެޅުމަށްވަނީ ހަމަޖެހިފައެވެ.
މި އަހަރުގެ މަދަޙަ މުބާރާތުގައިވެސް ފަޑިޔާރުކަން ކުރަނީ 3 ބޭފުޅުންގެ ޕެނަލްއަކުންނެވެ. މި މުބާރާތުގެ އިންސާފުކުރުމަށް ހަމަޖެހިފައިވާ ފަޑިޔާރުންނަކީ 2018ވަނަ އަހަރުގެ މޯލްޑިވިއަން އައިޑަލް އިން ވިދާލި ތަސްލީމް އަބްދުލް ކަރީމް، ޅެންވެރިންގެ ޖަމިއްޔާގެ ރައީސް ޢާއިޝަތު ޙުސައިން މަނިކު އަދި ދިވެހި ބަހައް ގިނަ ހިދުމަތްތަކެއް ކުރައްވާފައިވާ އަބުދުﷲ ރަޝީދުއެވެ.
މި މަދަޙަ މުބާރާތުގައި އެންމެ މޮޅު ފަސް ދަރިވަރުން ހޮވޭނެއެވެ. އަދި ގުރޫޕް މަދަޙައިން އެންމެ މޮޅު 3 ހުށައެޅުން ވެސް ހޮވޭނެއެވެ. މީގެ އިތުރުން އެންމެ މޮޅު 3 ފެކަލްޓީވެސް ހޮވޭނެއެވެ.
މިދިޔަ އަހަރުވެސް އެމް.އެން.ޔޫ.އެސް.ޔޫ އަދި ސިއާ ގުޅިގެން ވަނީ މަދަޙަ މުބާރާތް ބާއްވާފައެވެ. އެ އަހަރުގެ އެންމެ މޮޅު ދަރިވަރަކަށް ހޮވިފައިވަނީ ސްކޫލް އޮފް ނާރސިންގެ ދަރިވަރު އައިޝަތު ނަދާއެވެ. އެންމެ ރީތި ގުރޫޕް މަދަޙައެއް ހުށައަޅައިދީފައިވަނީ ފެކަލްޓީ އޮފް އެޑިއުކޭޝަންގެ ޓީމުންނެވެ. އެންމެ މޮޅު ފެކަލްޓީގެ މަގާމުވެސް ހާސިލްކޮށްފައިވަނީ ފެކަލްޓީ އޮފް އެޑިއުކޭޝަންއެވެ.
