އެފް.އެލް.އައި.އެސް އިން ކޮންމެ ބުރާސްފަތި ދުވަހެއްގެރޭގައި ފެކަލްޓީ އޮފް ލޯ އެންޑް އިސްލާމިކް ސްޓަޑީސްގެ ދަރިވަރުންނަށް އަމާޒުކޮށްގެން ޤާނޫނީ އަދި ދީނީ ހޭލުންތެރިކަން އިތުރުކުރުމުގެ ގޮތުން އެކިއެކި މައުލޫމާތު ދިނުމަށް ބާއްވަމުންގެންދާ ލެކްޗަރ ސީރީސްތަކުގެ ތެރެއިން އެންމެ ފަހުން 12 އެޕްރީލް 2018 ވީ ބުރާސްފަތި ދުވަހު ބޭއްވުނު ގެސްޓް ލެކްޗަރ އިންތިޒާމް ކޮށްފައިވަނީ އެ ފެކަލްޓީއާއި އެސް.އެސް.އެލް އާއި ގުޅިގެންނެވެ. އެގޮތުން އެޓަރނީ ޖެނެރަލް އޮފީހުގެ ސީނިއަރ ސްޓޭޓް އެޓަރނީ ޢަލީ ޝުހައިލް އާއި ސްޓޭޓް އެޓަރީ އައިމިނަތު ޝީރީން ދެއްވި މި ލެކްޗަރގައި މައިގަނޑުގޮތެއްގައި ވާހަކަފުޅުދައްކަވާފައިވަނީ ޝަރުޢީ ކޯޓުތަކުން ވަގުތީ އަމުރު ނެރުމާއި ގުޅޭގޮތުންނެވެ. ފެކަލްޓީގެ ލޯ ޑިޕާޓްމަންޓާއި ގުޅިގެން އެސް.އެސް.އެލް އިން ކުރިއަށްގެންދިޔަ މި ލެކްޗަރއަށް ފެކަލްޓީގެ ގިނަ ދަރިވަރުންތަކެއް ޙާޟިރުވެފައިވާކަން ފާހަގަކުރެވެއެވެ. މީގެ އިތުރުން ފެކަލްޓީގައި ކިޔަވައިދެއްވަމުން ގެންދަވާ ބައެއް ލެކްޗަރަރއިންވެސް ވަނީ މި ސެޝަންގައި ބައިވެރިވެފައެވެ.
12 އެޕްރީލް 2018 ވީ ދުވަހުގެ ރޭގަނޑު 20:00 އިން 21:00 އަށް ދިވެހިރާއްޖޭގެ ޤައުމީ ޔުނިވަރސިޓީގެ ފައުންޑޭޝަން އޮޑިޓޯރިއަމްގައި ބޭއްވުނު މި ލެކްޗަރ ފެއްޓެވުމުގެ ގޮތުން އެސް.އެސް.އެލްގެ ނައިބްރައީސް މުހައްމަދު ޙަމްދޫން ވަނީ ވާހަކަފުޅު ދައްކަވާފައެވެ. މި ސެޝަންގައި ވަގުތީ އަމުރާއި ގުޅޭގޮތުން ވާހަކަފުޅު ދައްކަވާފައިވާއިރު މި ސުރުޚީގެ ދަށުން ސުޕްރީމްކޯޓްގެ ނަންބަރ 2018/SC-A/21 ރޫލިންގްއަށްވަނީ އަލިއަޅުއްވާލައްވާފައެވެ. ދަރިވަރުންނަށް މުޙިއްމު މައުލޫމާތުތަކެއް ލިބިގެންދިޔަ މި ސެޝަންގައި ދަރިވަރުންގެ ސުވާލުތަކަށް ލެކްޗަރަރ އިންވަނީ ޖަވާބުދެއްވާފައެވެ. ފެކަލްޓީއާއި އެސް.އެސް.އެލް ގުޅިގެން ކުރިއަށް ގެންދެވުނު ފުރަތަމަ ސެޝަން ކާމިޔާބު ކަމާއި އެކު ކުރިއަށް ގެންދެވިފައިވާއިރު، ކުރިއަށް އޮތް ގިނަ ޙަރަކާތްތަކެއް ދެފަރާތުން ގުޅިގެން ކުރިއަށް ގެންދިއުމަށް ވަނީ ހަމަޖެހިފައެވެ.
