އެމް.އެން.ޔޫ.އެސް.ޔޫގެ ފަރާތުން ކުރިޔަށް ގެންދިއުމަށް ހަމަޖެހިފައިވާ ”މެކްސްކޮމް އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީ ބޯޅަ މުބާރާތް 2018″ގައި އެސް.އެސް.އެލް އިން ބައިވެރިވި އަންހެން އަދި ފިރިހެން ޓީމަށް ޖާރޒީ ހަވާލުކުރުމަށް ހަފްލާއެއް ބާއްވައިފިއެވެ. މި ހަފްލާގައި ޝަރަފްވެރިމެހެމާނެއްގެ ގޮތުގައި ފެކަލްޓީ އޮފް ލޯ އެންޑް އިސްލާމިކް ސްޓަޑީސްގެ ޑީން ޑރ.އަލީ ޒާހިރު ވަނީ ބައިވެރިވެފައެވެ. އަދި އެކި ގޮތްގޮތުން އެސް.އެސް.އެލް އަށް އެހީތެރިވެދެއްވަމުންދާ ފަރާތްތަކުން މި ހަފްލާގައި ވަނީ ބައިވެރިވެފައެވެ. ޓީމާއި މުޚާތަބުކޮށް ޑީން ވާހަކަފުޅު ދައްކަވާފައިވާއިރު، ފެކަލްޓީގެ ފަރާތުން އެންމެ ފުރިހަމަ އެއްބާރުލުން ދެއްވާނެކަމަށް ވާހަކަފުޅުގައި ފާހަގަކުރެއްވިއެވެ.
މީގެ އިތުރުން އަންހެން އަދި ފިރިހެން ޓީމަށް މުބާރާތް ކާމިޔާބު ކުރެއްވުމަށް ހިތްވަރުދެއްވިއެވެ. މި ޙަފްލާގައި އެމް.އެން.ޔޫ.އެސް.ޔޫގެ ރައީސް އަދި ކުރީގެ ރައީސް ވެސް ވަނީ ވާހަކަފުޅު ދައްކަވާފައެވެ. މި ދެ ބޭފުޅުންގެ ވާހަކަފުޅުގައިވެސް އެސް.އެސް.އެލް އަށް ފުރިހަމަ އެއްބާރުލުން ދެއްވާނެކަމަށް ފާހަގަކުރެއްވިއެވެ. މީގެ އިތުރުން އެސް.އެސް.އެލްގެ ރައީސް ވަނީ އެމް.އެން.ޔޫ.އެސް.ޔޫ އަށާއި އެހީތެރިވެދެއްވި އެހެން ފަރާތް ތަކަށް ޝުކުރު އަދާކޮށްފައެވެ.
މި ހަފްލާގައި ފިރިހެން ޓީމަށް ފެކަލްޓީގެ ޑީން ޖޯޒީ ހަވާލުކޮއްދެއްވާފައިވާއިރު އަންހެން ޓީމަށް ޖޯޒީ ޙަވާލުކޮއްދެއްވީ އެމް.އެން.ޔޫ.އެސް.ޔޫގެ ރައީސްއެވެ.
މި ހަފްލާ އިތުރަށް ހާއްޞަ ވެގެން ދިޔައީ އެސް.އެސް.އެލްގެ ފޭސްބުކް އަދި ޓުވިޓަރ އެކައުންޓް އަލުން ރަސްމީކޮށް އިފްތިތާހްކޮށް މުޅިން އަލަށް އިންސްޓަގްރާމް އެކައުންޓް އިފްތިތާހްކުރުމުންނެވެ. ހަމައެއާއި އެކު ކުރީގެ އެސް.އެސް.އެލްގެ އެކްސްކޯގެ ޓީމަށް އެމް.އެން.ޔޫ.އެސް.ޔޫ އިން ޙަވާލުކޮށްފައިވާ ލިޔުންތައްވެސް މި ހަފްލާގައި އެ ފަރާތްތަކާއި ޙަވާލުކުރެއްވިއެވެ. މި ޙަފްލާ ނިމިގެންދިޔައީ ބައިވެރިންނަށް ހާއްޞަކޮށް ތައްޔާރުކުރެވިފައިވާ ހަވީރުސައިފޮދަކުންނެވެ.
