އެމްއެންޔޫއެސްޔޫ އަދި އެސްއެސްއެލް ގުޅިގެން 1443 ވަނަ އަހަރުގެ ރަމަޟާން މަހަށް ޚާއްސަކޮށްގެން ކުރިޔަށް ގެންދިޔަ ޤުރުއާން ކިޔެވުމުގެ މުބާރާތް ކާމިޔާބުކަމާއެކު ނިންމާލައިފިއެވެ. މިއީ ދިވެހި ރާއްޖޭގެ ޤައުމީ ޔުނިވަރސިޓީގެ ދަރިވަރުންނަށް އަމާޒުކޮށްގެން ކުރިޔަށް ގެންދިޔަ މުބާރާތަކަށް ވީއިރު މި މުބާރާތުގައި ޖުމްލަ 74 ދަރިވަރަކު ބައިވެރިވެފައި ވެއެވެ. އެގޮތުން ބަލައިގެން ކިޔެވުމާއި ހިތުން ކިޔެވުން އެކުލެވޭ ގޮތަށް ކުރިޔަށް ގެންދިޔަ މި މުބާރާތް ނިންމާލީ ޖުމްލަ 3 ދަންފަޅިއަކަށް ބަހާލައިގެންނެވެ.
މުބާރާތުގެ ފުރަތަމަ ދަންފަޅީގައި ޖުމްލަ 19 ދަރިވަރެއްގެ ކިޔެވުން ފެނިގެންދިޔައިރު، މި ދަންފަޅި ފެށިގެން ދިޔައީ އެސްއެސްއެލް އިން އިންތިޒާމްކޮށްގެން ބޭއްވުނު މުބާރާތް އިފްތިތާޙް ކުރުމުގެ ރަސްމިއްޔާތަކާއި އެކުއެވެ. އެރަސްމިއްޔާތު ޝަރަފުވެރިކޮށްދެއްވީ ދިވެހިބަހުގެ އެކަޑަމީގެ ކުރީގެ ރައީސް އަލްފާޟިލް އަޝްރަފް އަލީއެވެ.
މި މުބާރާތުގައި ބަލައިގެން ކިޔެވުމުގައި ޖުމްލަ 71 ދަރިވަރަކު ބައިވެރިވެފައިވީއިރު، ނުބަލައި ކިޔުމުގައި ޖުމްލަ 3 ދަރިވަރަކުވަނީ ބައިވެރިވެރފައިއެވެ. މިއީ ނިމިދިޔަ އަހަރާ އަޅާބަލާއިރު، ލިބުނު ކުރިއެރުމެއްކަމުގައި މުބާރާތުގެ ހިންގާކޮމެޓީގެ ފަރާތުން މައުލޫމާތުދެއްވައެވެ.
އެގޮތުން މުބާރާތުގެ ހިންގާ ކޮމެޓީގެ މެމްބަރު އަދި އެސްއެސްއެލްގެ ނައިބުރައީސް (ޢަމަލީ) ކަމުގައިވާ އައިޝަތު ޝާލިޔާ ވިދާޅުވިގޮތުގައި، މި މުބާރާތުން ހިންގާ ކޮމެޓީއިން ހާސިލްކުރަން ބޭނުންވި އެންމެހާ ލަނޑުދަނޑިތައް ހާސިލްކުރެވިއްޖެކަމަށާ، ދެން ކުރިއަށް ބޭއްވޭ މުބާރާތްތަކަކީ މި މުބާރާތަށްވުރެ ފުރިހަމަ މުބާރާތަކަށް ހެދުމަށް މަސައްކަތްކުރާނެ ކަމުގައިއެވެ.
އެމްއެންޔޫއެސްޔޫ ޤުރުއާން މުބާރާތަކީ 2013 ވަނަ އަހަރުން ފެށިގެން ސިލްސިލާކޮށް ބާއްވަމުން އަންނަ މުބާރާތެކެވެ. 2019 ވަނަ އަހަރުން ފެށިގެން ޤުރުއާން މުބާރާތް ބާއްވަމުން އަންނަނީ އެސްއެސްއެލްއާ ގުޅިގެންނެވެ. މި މުބާރާތުގެ އެންމެ ބޮޑު މަގްސަދަކީ އެމްއެންޔޫގައި ތައުލީމު ޙާސިލްކުރަމުންދާ ދަރިވަރުންގެ މެދުގައި ކީރިތި ޤުރްއާންއަށާއި ޤުރްއާންގެ ޢިލްމަށް އޮތް ލޯބި އަށަގެންނެވުމެވެ.
