”ފެސެލް“ ވެލްކަމް ނައިޓް 2022 ކާމިޔާބުކަމާއެކު ބާއްވައިފި!

ފެކަލްޓީ އޮފް އެޑިއުކޭޝަންގެ ދަރިވަރުންގެ ގޮފި ކަމުގައިވާ ފެކަލްޓީ އޮފް އެޑިއުކޭޝަން ސްޓޫޑެންޓް އެސޯސިއޭޝަން އާއި ފެކަލްޓީ އޮފް ޝަރީޢާ އެންޑް ލޯގެ ދަރިވަރުންގެ ގޮފި ކަމުގައިވާ ސޮސައިޓީ އޮފް ޝަރީޢާ އެންޑް ލޯ ގުޅިގެން ބޭއްވި ”ފެސެލް ވެލްކަމް ނައިޓް 2022“ ކާމިޔާބުކަމާއެކު ބާއްވައިފިއެވެ.

ދެ ފެކަލްޓީގެ ދަރިވަރުންނަށް އުފާވެރި މާހައުލެއްގެ ތެރޭގައި ކުރިއަށްގެންދިޔަ މި ނައިޓްގައި އިމްޕޯސްޓަރ ގޭމްފަދަ އެކި ކަހަލަ ހަރަކާތްތައް ކުރިއަށް ގެންގޮސްފައިވެއެވެ. އެގޮތުން މި އިވެންޓު ފެށިގެން ދިޔައީ ދެގޮފީގެ ހިންގާ ކޮމެޓީގެ މެމްބަރުންގެ ތަޢާރަފު ވުމަކާއި އިވެންޓަށް ހާޒިރުވި ދަރިވަރުންގެ ތަޢާރަފުވުމުގެ ގޭމަކާއެކުއެވެ. މީގެ އިތުރުން އިވެންޓު ނިމިގެންދިޔައީ ދެ ގޮފީގެ ހިންގާ ކޮމެޓީ މެމްބަރުންނާއި ނައިޓަށް ހާޒިރުވި ދަރިވަރުންނާއެކު ފެޅުނު ޙާއްސަ ކޭކަކުންނެވެ.

”ފެސެލް ވެލްކަމް ނައިޓް 2022″އަށް  ހާޒިރުވި ދަރިވަރުންނާ  ވާހަކަ ދައްކަވަމުން އެސް.އެސް.އެލްގެ ރައީސް އަޙްމަދު ސަދޫފް ވަނީ އެމް.އެން.ޔޫ، އެމް.އެން.ޔޫ.އެސް.ޔޫ އަދި އެމް.އެން.ޔޫ.އެސް.ޔޫގެ ގޮފިތަކުން ބާއްވާ މިފަދަ އިވެންޓުތަކުގައި މިދަރިވަރުންނާއެކު އިތުރު ދަރިވަރުން ފެންނާނެ ކަމަށް އުންމީދުކުރައްވާ ކަމަށް ވިދާޅުވެ، ހާޒިރުވި ދަރިވަރުންނަށް ޝުކުރު އަދާކުރައްވާފައެވެ. އަދި ހަމަ އެހެންމެ، އެމް.އެން.ޔޫގެ އަހަރީ ދުވަސް ފާހަގަ ކުރުމަށްޓަކައި 1 ސެޕްޓެމްބަރު 2022 ގައި ބޭއްވުމަށް ހަމަޖެހިފައިވާ ހިނގާލުމަށް ހުރިހާ ދަރިވަރުންނަށް ސަދޫފް ދައުވަތުދެއްވިއެވެ.

ފެސެލް ވެލްކަމް ނައިޓް“ ގެ މަޤުސަދަކީ ފެކަލްޓީ އޮފް އެޑިއުކޭޝަން (އެފް.އީ) އާއި ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) ގައި ކިޔަވާ ދަރިވަރުންގެ މެދުގައި އުފާވެރި މާހައުލެއްގެ ތެރެއިން ގުޅުން ބަދަހިކޮށް އާ އެކުވެރިންތަކެއް ލިބިގެން ދިޔުމެވެ. އަދި މި ނައިޓްގައި ކުރިޔަށްގެންދިޔަ ތަފާތު ގޭމްސްތަކާއި ހަރަކާތްތަކުން ކުދިންނަށް އިސްނެގުން ފަދަ ތަފާތު ބޭނުންތެރި ހުނަރުތައް ދަސްވުމެވެ.

އޭ ބްލޮކްގެ ތިންވަނަ ފަންގިފިލާގެ ހޯލްގައި ބޭއްވިގެން ދިޔަ ”ފެސެލް ވެލްކަމް ނައިޓް 2022“ ބޭއްވިފައިވަނީ 26 އޯގަސްޓު 2022 ވީ ހުކުރު ދުވަހުގެ ރެޔެވެ.

ކުރިއަށް އޮންނަ މިފަދަ އިވެންޓުތަކަށް ގިނަ ދަރިވަރުންގެ ބައިވެރިވުން ފެނުމަކީ ދެގޮފީގެވެސް އެދުމެކެވެ. އަދި މިފަދަ އިވެންޓުތަކަށް ދަރިވަރުންނާއި އެމް.އެން.ޔޫ.އެސް.ޔޫ އިން ދެއްވާ އެއްބާރުލުމަށް ދެގޮފީގެ މެމްބަރުންވެސް ޝުކުރު އަދާކުރެއެވެ.