އެސް.އެސް.އެލް އިން އިންތިޒާމް ކޮށްގެން ބާއްވާ ”އެފް.އެސް.އެމް އިޒްހާމް މެމޯރިއަލް ކަޕް 2022“ މިހިނގާ ސެޕްޓެމްބަރު މަހުގެ 17 ވާ ހޮނިހިރު ދުވަހުގައި ފެށުމަށް ތައްޔާރު ވެއްޖެއެވެ.
މި އަހަރުގެ މި މުބާރާތުގެ މެއިން ސްޕޮންސަރއެއްގެ ގޮތުގައި ހަމަޖެހިފައިވަނީ ފިއުލް ސަޕްލައިސް މޯލްޑިވްސް ޕްރައިވެޓް ލިމިޓެޑް (އެފް.އެސް.އެމް) އެވެ. އަދި މި މުބާރާތުގެ ސަޕޯޓިންގ ޕާރޓްނަރ ކަމަށް ހަމަޖެހިފައިވަނީ ދިރާގެވެ.
އިޒްހާމް މެމޯރިއަލް ކަޕަކީ 2016 ވަނަ އަހަރު ހިނގި ރޭލު އެކްސިޑެންޓެއްގައި ނިޔާވި ފެކަލްޓީ އޮފް ޝަރީޢާ އެންޑް ލޯގެ ދަރިވަރެއް ކަމުގައިވާ މުހައްމަދު އިޒްހާމްގެ ހަނދާނުގައި ބޭއްވޭ މުބާރާތެކެވެ. އެގޮތުން އިޒްހާމް މެމޯރިއަލް ކަޕް 2022ގެ މަޤްސަދަކީ ފެކަލްޓީ އޮފް ޝަރީޢާ އެންޑް ލޯގައި ތަޢުލީމް ޙާސިލްކުރަމުންދާ ދަރިވަރުންގެ މެދުގައި އެކުވެރިކަމާއި އުޙުއްވަތްތެރިކަން އާލާކޮށް، ކިޔެވުމުގެ އިތުރުން އެދަރިވަރުންނަށް ލިބިފައިވާ ހުނަރުގެ ބޭނުން އެންމެ ހެޔޮ ގޮތުގައި ހިފުމާއެކު، ދުޅަހެޔޮ ހަށިހެޔޮ މުސްތަޤުބަލަކަށް ދަރިވަރުން ބިނާކުރުމަށް އެހީތެރިވެދިނުމެވެ. މީގެ އިތުރުން، މިއަހަރު ބޭއްވޭ އެމް.އެން.ޔޫ.އެސް.ޔޫ ފުޓްސެލް ފިއެސްޓާއަށް ފެކަލްޓީ އޮފް ޝަރީޢާ އެންޑް ލޯގެ ފުޓްސެލް ޓީމު ނެގުމަށް އެހީތެރިވެދިނުމެވެ.
މި އަހަރުގެ މުބާރާތުގައި ޖުމްލަ 5 ޓީމަކުން ބައިވެރިވެފައިވާއިރު، މިއީ އިޒްހާމް މެމޯރިއަލް ކަޕް ބޭއްވޭ 4 ވަނަ ފަހަރެވެ. މި ފަހަރުގެ މުބާރާތުގެ ހުރިހާ މެޗުތަކެއްވެސް ކުޅެވިގެން ދާނީ ހުޅުމާލެ ރެޑްބުލް ޓާރފްގައެވެ.
