”އެފް.އެސް.އެމް އިޒްހާމް މެމޯރިއަލް ކަޕް 2022“ ގެ ޗެމްޕިއަންކަން ފެކަލްޓީ އޮފް ޝަރީޢާ އެންޑް ލޯގެ ޓީމެއްގެ ގޮތުގައި މިމުބާރާތުގައި ބައިވެރިވި، އެފް.ސީ ރިޖާލްއިން ހޯދައިފިއެވެ.
ސެޕްޓެމްބަރު 17 ވަނަ ދުވަހު ހުޅުމާލެ ރެޑްބުލް ޓާރފްގައި، ވަންޑޭ ކަޕެއްގެ ގޮތުގައި ކުޅެވިގެން ދިޔަ މި މުބާރާތުގައި ފައިނަލް މެޗާއެކު ޖުމްލަ 11 މެޗެއްވަނީ ކުޅެވިފައެވެ. އެގޮތުން މުބާރާތުގައި ފެކަލްޓީ އޮފް ޝަރީޢާ އެންޑް ލޯގެ ދަރިވަރުންގެ 2 ޓީމަކާއި، ދިވެހި ރާއްޖޭގެ ގައުމީ ޔުނިވާރސިޓީގެ ދަރިވަރުންގެ ޔޫނިއަންގެ 2 ޓީމަކާއި އަދި، ފެކަލްޓީ އޮފް ޝަރީޢާ އެންޑް ލޯއިން ދަސްވެނިވި ދަރިވަރުންގެ (ގްރެޖުއޭޓްސް) ޓީމެއް މި މުބާރާތުގައި ވާދަކޮށްފައިވެއެވެއެވެ.
ލީގް އުސޫލުން ކުޅެވިގެން ދިޔަ މިމުބާރާތުގައި ފައިނަލްގައި ކުޅުނީ އެންމެ މަތިން ޕޮއިންޓް ލިބުނު 2 ޓީމެވެ. އެގޮތުން ކުޅުނު ހުރިހާ މެޗަކުން މޮޅުވެ ފައިނަލްގެ ޖާގަ އެފް.ސީ ރިޖާލްއިން ކަށަވަރުކުރިއިރު، ކުޅުނު 4 މެޗުގެ ތެރެއިން 3 މެޗުން މޮޅުވެ، ފައިނަލްގެ ދެވަނަ ޖާގަ ކަށަވަރުކުރީ ގްރެޖުއޭޓްސްގެ ޓީމުންނެވެ. މިގޮތުން، ފައިނަލްގައި ދެޓީމުގެ ފަރާތުންވެސް މޮޅު ކުޅުމެއް ފެނިގެން ދިޔައިރު، އެފް.ސީ ރިޖާލްއިން ޗެމްޕިއަންކަން ހޯދީ ޕެނަލްޓީގައި ގްރެޖުއޭޓްސް ޓީމް ބަލިކުރުމަށްފަހުއެވެ.
މުބާރާތުގެ ޗެމްޕިއަން ޓީމަށް ތައްޓާއި ދިރާގުގެ ފަރާތުންދޭ ހަދިޔާ ހަވާލުކުރެއްވީ ނިންމުމުގެ ރަސްމިއްޔާތުގެ ޝަރަފްވެރި މެހެމާން އަދި މި މުބާރާތުގެ މެއިން ސްޕޮންސަރ ކަމުގައިވާ ފިއުލް ސަޕްލައިސް މޯލްޑިވްސް ޕްރައިވެޓް ލިމިޓެޑްގެ މެނޭޖިންގް ޑިރެކްޓަރ، އަލްފާޟިލް މުޙައްމަދު ޤަސަމްއެވެ. އެގޮތުން، މުބާރާތުގެ އެންމެ މޮޅު ކުޅުންތެރިޔަކަށް ހޮވިފައިވަނީ އެފް.ސީ ރިޖާލްގެ ކުޅުންތެރިޔާ އަދި ފެކަލްޓީ އޮފް ޝަރީޢާ އެންޑް ލޯގެ ދަރިވަރު، އަލީ އަޒުހަރެވެ. އަޒްހަރު ވަނީ މުބާރާތުގައި މޮޅު ކުޅުމެއް ދައްކާފައެވެ.
ނިންމުމުގެ ރަސްމިއްޔާތުގައި މުބާރާތާ ބެހޭގޮތުން ވާހަކަ ދައްކަވަމުން، ސޮސައިޓީ އޮފް ޝަރީޢާ އެންޑް ލޯގެ ރައީސް އަޙްމަދު ސަދޫފް ވަނީ އިޒްހާމް މެމޯރިއަލް ކަޕް 2022 ކާމިޔާބުކަމާއެކު ނިންމާލުމުގައި އެހީތެރިވެދެއްވި އެންމެހާ ފަރާތްތަކަށާއި، ސްޕޮންސަރުންނަށް ވަރަށް ބޮޑަށް ޝުކުރުއަދާކޮށްފައެވެ.
”އިޒްހާމް މެމޯރިއަލް ކަޕް“ އަކީ ފެކަލްޓީ އޮފް ޝަރީޢާ އެންޑް ލޯގެ ދަރިވަރެއްކަމުގައިވާ މުޙައްމަދު އިޒްހާމް 2016 ވަނަ އަހަރު ރޭލު އެކްސިޑެންޓެއްގައި ނިޔާވުމުގެ ސަބަބުން އެދަރިވަރުގެ ހަނދާނީ މުބާރާތެއްގެ ގޮތުން ސޮސައިޓީ އޮފް ޝަރީއާ އެންޑް ލޯ އިން އިންތިޒާމްކޮށް ބާއްވަމުންދާ މުބާރާތެކެވެ. މިގޮތުން އިޒްހާމް މެމޯރިއަލް ކަޕް 2018 ،2017 އަދި 2019 ވަނަ އަހަރު ބޭއްވިފައިވީ ނަމަވެސް ކޮވިޑްގެ ޙާލަތާއެކު 2020 އަދި 2021 ވަނަ އަހަރު މި މުބާރާތް ބޭއްވިފައިނުވެއެވެ. މިއަހަރު ބޭއްވިގެން މިދިޔައީ މި މުބާރާތުގެ 4 ވަނަ މުބާރާތަށް ވީއިރު، މިއަހަރުގެ މުބާރާތުގެ މެއިން ސްޕޮންސަރަކީ ފިއުލް ސަޕްލައިސް މޯލްޑިވްސް ޕްރައިވެޓް ލިމިޓެޑްއެވެ. އަދި ސަޕޯޓިންގް ޕާރޓްނަރއަކަށް ހަމަޖައްސާފައިވަނީ ދިރާގެވެ.
