އެމްއެންޔޫއެސްޔޫ-އެސްއެސްއެލްގެ 11ވަނަ ޤުރުއާން މުބާރާތް ކާމިޔާބުކަމާއެކު ނިންމާލައިފިއެވެ.
މި މުބާރާތް ނިންމުމުގެ ރަސްމިއްޔާތު ވަނީ 1 އެޕްރީލް ވީ ހޯމަ ދުވަހުގެ ރޭގައި ބާއްވާފައެވެ. މި ރަސްމިއްޔާތު ޝަރަފްވެރިކޮށްދެއްވީ އިސްލާމީ މަރުކަޒުގެ އިމާމު އައްޝައިޚް އިބްރާހީމް ރަޝީދް ޙަސަންއެވެ.
މި މުބާރާތުގައި 100 އެތައް ކުދިންނެއް ވާދަކޮށް ކިޔަވާފައިވެއެވެ. މީގެ ތެރެއިން ހިތުން ކުޔެވުމުގެ ބައިން 3ވަނަ ޙާސިލްކޮށްފައިވަނީ ސެންޓަރ ފޯ ފައުންޑޭޝަން ސްޓަޑީސްގެ ދަރިވަރު ހުސއިން ޝަހުބާންއެވެ. ހިތުން ކިޔެވުމުގެ ބައިން 2ވަނަ ފެކަލްޓީ އޮފް އެޑިއުކޭޝަންގެ ދަރިވަރު ޙުސައިން ޝިފާޢު ހޯދާފައިވާއިރު، މި ގޮފީގެ 1ވަނަ ހޯދާފައިވަނީ ސްކޫލް އޮފް މެޑިސިންގެ މުޙައްމަދު ޢަޔާޝް ޢަލީއެވެ.
ބަލައިގެން ކިޔެވުމުގެ ގޮފިން މި މުބާރާތުގެ 3ވަނަ ހޯދި ބައިވެރިއަކީ ސްކޫލް އޮފް ނަރސިންގެ ޢާއިޝަތު ޝިމަންއެވެ. އަދި 2 ވަނަ ހޯދައިފައިވަނީ ފެކަލްޓީ އޮފް ޝަރީޢާ އެންޑް ލޯގެ ދަރިވަރު ޢާއިޝަތު މަޢާނީއެވެ. 1ވަނަ ހޯދި ބައިވެރިއަކީ ދިވެހިރާއްޖޭގެ އިސްލާމީ ޔުނިވަރސިޓީގެ ދަރިވަރު މުޙައްމަދު ސާޢީ މުބާރިކެވެ.
ހަމަ މިއާއެކު، މުޅި މުބާރާތުގެ 3ވަނަ އަށް އެންމެ މޮޅު ފެކަލްޓީއަކަށް ސްކޫލް އޮފް މެޑިސިން ހޮވިފައިވާއިރު 2ވަނަ ޙާސިލްކޮށްފައިވަނީ ފެކަލްޓީ އޮފް އެޑިއުކޭޝަންއިންނެވެ. އަދި މުޅި މުބާރާތުގެ ފަޚުރުވެރި 1ވަނަ ހޯދާފައިވަނީ ދިވެހިރާއްޖޭގެ އިސްލާމީ ޔުނިވަރސިޓީއިންނެވެ.
