ޤުރުއާނާ މެދު ވިސްނައި އެއާމެދު ދިރާސާކުރުން މުހިންމު: ޝައިޚް އިބްރާހީމް ރަޝީދު ޙަސަން

ޤުރުއާނާމެދު ވިސްނައި އެއާމެދު ދިރާސާކުރުމަކީ މުހިންމު ކަމެއް ކަމުގައި އިސްލާމީ މަރުކަޒުގެ އިމާމު ޝައިޚް އިބްެރާހީމް ރަޝީދު ޙަސަން ވިދާޅުވެއްޖެއެވެ.
ޝައިޚް އިބްރާހީމް ރަޝީދު ޙަސަން މިހެން ވިދާޅުވެފައިވަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންއާ އެ ޔޫނިއަންގެ ގޮފި ސޮސައިޓީ އޮފް ޝަރީޢާ އެންޑް ލޯއިން ބޭއްވި 11ވަނަ ޤުރުއާން މުބާރާތް ނިންމުމުގެ ރަސްމިއްޔާތު ޝަރަފުވެރިކޮށްދެއްވަމުންނެވެ.
ޝައިޚް އިބްރާހީމް ރަޝީދު ޙަސަން ވަނީ ކީރިތި ޤުރުއާން ކިޔަވައި އެއާމެދު ވިސްނައި ދިރާސާކުރުމުން އެތަކެއް ޢިބްރަތްތަކެއް ލިބޭނޭ ކަމަށް ވިދާޅުވެފައެވެ. އަދި މި ވާހަކަތަކަށް ހެކިދައްކަވަމުން ކުރީގެ އުންމަތްތަކުގެ ވާހަކައާއި އެ އުންމަތްތަކަށް ފޮނުއްވެވި ރަސޫލުންނާއި ނަބިއްޔުންނާއި އެ ނަބިއްޔުންނަށް ދެއްވި މުޢުޖިޒާތްތަކުން މިސާލުޖައްސަވާފައިވެއެވެ.
ހަމަ މިއާއެކު ދަރިވަރުން ހިންގާ ޖަމިއްޔާއަކުން މިފަދަ މުބާރާތެއް ފުރިހަމައަށް ގެންގޮސް ނިންމާލީތީ އެކަން ފާހަގަކޮށް ޖަމިއްޔާއަށާއި ދަރިވަރުންނަށް މިފަދަ ކަންކަން ކުރުމަށް ހިތްވަރުދެއްވާފައިވެއެވެ.
މީގެ އިތުރުން، މި ރަސްމިއްޔާތުގައި ދަރިވަރުންގެ ޔޫނިއަންގެ ފަރާތުން ޔޫނިއަންގެ މީޑިއާ ކޯޑިނޭޓަރ ހަސްނާ ވިޝާމް ވަނީ ވާހަކަފުޅު ދައްކަވާފައެވެ. މިގޮތުން ދަރިވަރުންގެ ޔޫނިއަންއިން އަހަރަކަށްވުރެ އަހަރެއް މި މުބާރާތުގެ ހައިބަތު ބޮޑުކުރުމަށް ކުރާ މަސައްކަތް ކާމިޔާބުވަމުން އަންނަ ކަމުގައި ފާހަގަކޮށް މި އަހަރުގެ މުބާރާތުގެ އެކްސްކްލޫސިވް ސްޕޮންސަރކަން އިސްލާމީ ކަންތައްތަކާ ބެހޭ ވުޒާރާއިން ހަމަޖައްސަވާފައިވާތީ އެ ވުޒާރާއަށް އަދި ވަޒީރު ޑރ.މުޙައްމަދު ޝަހީމް ޢަލީ ސަޢީދަށް ޝުކުރުއަދާކުރައްވާފައިވެއެވެ.
މި ރަސްމިއްޔާތުގައި ސޮސައިޓީ އޮފް ޝަރީޢާ އެންޑް ލޯގެ ރައީސް އިސްމާޢީލް ރަޒީން ޢިމްރާންވެސް ވަނީ ވާހަކަފުޅުދައްކަވާފައެވެ. ރަޒީންގެ ވާހަކައިގައި މި އަހަރުގެ މުބާރާތް ދިވެހިރާއްޖޭގެ ޤައުމީ ޔުނިވަރސިޓީގެ 4 ފާރުން ބޭރަށް ފުޅާކުރެވުނުކަން ވަނީ ފާހަގަކޮށްފައެވެ. އަދި މިފަދަ މުބާރާތްތައް ޔޫނިއަންގެ ގޮފިތަކާ ޙަވާލުކޮށް ގޮފިތައް ބާރުވެރިކުރުވުމަށް ޔޫނިއަނުން ކުރާ މަސައްކަތް ފާހަގަކޮށް ޔޫނިއަންއަށް ވަނީ ޝުކުރުއަދާކޮށްފައެވެ. މީގެ އިތުރުން މި މުބާރާތުގައި ބައިވެރިންގެ އަދަދު އިތުރުވަމުން އަންނަ ކަމާއި ދަރިވަރުންގެ މެދުގައްޔާއި ގޮފިތަކުގެ މެދުގައި މިކަމަށް އޮންނަ ޝައުގާއި ވާދަވެރިކަން އިތުރުވަމުން އަންނަ ކަމުގައިވެސް ރަޒީން ވަނީ ފާހަގަކުރައްވާފައެވެ.