ފެކަލްޓީ އޮފް ޝަރީޢާ އެންޑް ލޯގެ ގޮފި ސޮސައިޓީ އޮފް ޝަރީޢާ އެންޑް ލޯ (އެސް.އެސް.އެލް) އިން ފެމިލީ ކޯޓާއި ގުޅިގެން، ދިވެހިރާއްޖޭގެ ޤައުމީ ޔުނިވަރސިޓީގައި ޝަރީޢާ އެންޑް ލޯ ކިޔަވާ ދަރިވަރުންނަށް މަޢުލޫމާތު ދިނުމުގެ ސެޝަނެއް ކުރިޔަށް ގެންގޮސްފިއެވެ.
28 އޮގަސްޓުވީ ބުދަ ދުވަހުގެ ރޭ، 19:50 އިން ފެށިގެން 22:00 އަށް މި ބޭއްވުނު މަޢުލޫމާތު ދިނުމުގެ ސެޝަންގެ މަޢުޟޫ އަކީ ”ދިވެހިރާއްޖޭގެ ފެމިލީ ކޯޓަށް ހުށަހެޅޭ މައްސަލަތަކުގެ ޚުލާސާ“ އެވެ. ސެޝަން ނަންގަވައިދެއްވީ، ފެމިލީ ކޯޓުގެ ދެ ޤާޟީން ކަމަށްވާ، އަލްއުސްތާޛާ މަޢީޝާ ޔޫސުފް ސަމީރުއާއި އަލްއުސްތާޛާ ޒަޢީމާ ނަޝީދު ޢަބޫބަކުރު އެވެ.
ދަރިވަރުންގެ އިތުރުން، ފެކަލްޓީގެ ބައެއް ލެކްޗަރާއިން ބައިވެރިވެ ވަޑައިގެންނެވި މި ސެޝަނުގައި، ފެމިލީ ކޯޓުގެ ކުޑަ ތަޢާރަފަކަށް ފަހު، އެ ކޯޓުން ބަލާ މައްސަލަތަކުގެ މަޢުލޫމާތު ދަރިވަރުންނަށް ވަނީ ދެވިފައެވެ. އަދި އެއަށްފަހު އެ ކޯޓުން ދެވޭ ޚިދުމަތްތަކާއި، ކޯޓުގައި ބައެއް ނާޒުކު މައްސަލަތަކުގެ ޝަރީޢަތް ކުރިޔަށް ގެންދެވޭ ގޮތުގެ މަޢުލޫމާތު ވެސްދެވުނެވެ. މީގެއެތުރުން، ކޯޓުން ރައްޔިތުންނަށް ފޯރުކޮށްދޭ، އިތުރު ޚިދުމަތްތަކުގެ މަޢުލޫމާތު ވެސް ވަނީ ދެއްވާފައެވެ. އަދި ސެޝަން ނިންމާލަމުން، ދަރިވަރުންގެ ސުވާލުތަކަށް ފުރުސަތު ހުޅުވާލައި، އެ ދަރިވަރުންގެ ސުވާލުތަކަށް ދެ ޤާޟީން ޖަވާބު ދެއްވިއެވެ.
ސޮސައިޓީ އޮފް ޝަރީޢާ އެންޑް ލޯ އިން، އިންތިޒާމުކޮށްގެން ހިނގުނު މި ސެޝަނަށް ދަރިވަރުންގެ ބޮޑު ތަރުހީބެއް ލިބިފައިވާއިރު، މިފަދަ އިތުރު ސެޝަންތަކެއް، އިތުރު ކޯޓުތަކާއި އަދި މުއައްސަސާތަކާ ގުޅިގެން، މުސްތަޤުބަލުގައި ކުރިޔަށް ގެންދަން މަސައްކަތް ކުރަމުން ދާކަމަށް އެސް.އެސް.އެލްގެ ރައީސް، އިސްމާޢީލް ރަޒީން އިމްރާން ރޭގެ ސެޝަން ނިންމާލަމުން ވަނީ ވިދާޅުވެފައެވެ.
