އެމް.އެން.ޔޫ ގައި ޝަރީޢާ އެންޑް ލޯ ކިޔަވާ ދަރިވަރުންނަށް މަޢުލޫމާތު ދިނުމުގެ ސެޝަނެއް، އެސް.އެސް.އެލް އިން އިންތިޒާމްކޮށް، ފެމިލީ ކޯޓުން ކުރިޔަށް ގެންގޮސްފިއެވެ.
28 އޯގަސްޓުވީ ބުދަ ދުވަހުގެ ރޭ، 19:50 އިން ފެށިގެން 22:00 އަށް މި ބޭއްވުނު މަޢުލޫމާތު ދިނުމުގެ ސެޝަންގެ މަޢުޟޫ އަކީ ”ދިވެހިރާއްޖޭގެ ފެމިލީ ކޯޓަށް ހުށަހެޅޭ މައްސަލަތަކުގެ ޚުލާސާ“ އެވެ. ސެޝަން ނަންގަވައިދެއްވީ، ފެމިލީ ކޯޓުގެ ދެ ޤާޟީން ކަމަށްވާ، އަލްއުސްތާޛާ މަޢީޝާ ޔޫސުފް ސަމީރުއާއި އަލްއުސްތާޛާ ޒަޢީމާ ނަޝީދު ޢަބޫބަކުރު އެވެ.
ދަރިވަރުންގެ އިތުރުން، ފެކަލްޓީގެ ބައެއް ލެކްޗަރަރުން ބައިވެރިވެ ވަޑައިގެންނެވި މި ސެޝަނުގައި، ފެމިލީ ކޯޓުގެ ކުޑަ ތަޢާރަފަކަށް ފަހު، އެ ކޯޓުން ބަލާ މައްސަލަތަކުގެ މަޢުލޫމާތު ދަރިވަރުންނަށް ދެވުނެވެ. އަދި އެއަށްފަހު އެ ކޯޓުން ދެވޭ ޚިދުމަތްތަކާއި، ކޯޓުގައި ބައެއް ނާޒުކު މައްސަލަތަކުގެ ޝަރީޢަތް ކުރިޔަށް ގެންދެވޭ ގޮތުގެ މަޢުލޫމާތު ވެސްދެވުނެވެ. މީގެއެތުރުން، ކޯޓުން ރައްޔިތުންނަށް ފޯރުކޮށްދޭ، އިތުރު ޚިދުމަތްތަކުގެ މަޢުލޫމާތު ވެސް ވަނީ ދެއްވާފައެވެ. އަދި ސެޝަން ނިންމާލަމުން، ދަރިވަރުންގެ ސުވާލުތަކަށް ފުރުސަތު ހުޅުވާލައި، އެ ދަރިވަރުންގެ ސުވާލުތަކަށް ދެ ޤާޟީން ޖަވާބު ދެއްވިއެވެ.
ސޮސައިޓީ އޮފް ޝަރީޢާ އެންޑް ލޯ އިން، އިންތިޒާމުކޮށްގެން ހިނގުނު މި ސެޝަނަށް ދަރިވަރުންގެ ބޮޑު ތަރުހީބެއް ލިބިފައިވާއިރު، މިފަދަ އިތުރު ސެޝަންތަކެއް، އިތުރު ކޯޓުތަކާއި މުއައްސަސާތަކާ ގުޅިގެން، މުސްތަޤުބަލުގައި ކުރިޔަށް ގެންދަން މަސައްކަތް ކުރަމުން ދާކަމަށް އެސް.އެސް.އެލްގެ ރައީސް، އިސްމާޢީލް ރަޒީން އިމްރާން ރޭގެ ސެޝަން ނިންމާލަމުން ވަނީ ވިދާޅުވެފައެވެ.
