2017 ވަނައަހަރުން ފެށިގެން ސިލްސިލާގޮތެއްގައި ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ގޮފި, ސޮސައިޓީ އޮފް ޝަރީޢާ އެންޑް ލޯއިން ބާއްވާ ފުޓްސަލް މުބާރާތް އިޒްހާމް މެމޯރިއަލް ކަޕް 2024 ކާމިޔާބުކަމާއެކު ނިންމާލައިފިއެވެ.
މި މުބާރާތް ކުރިއަށް ގޮސްފައިވަނީ މި އޮކްޓޯބަރ މަހުގެ 4 ވަނަ ދުވަހު ހުޅުމާލެ ރެޑްބުލް ފުޓްސެލް ދަނޑުގައެވެ. މުބާރާތުގެ ފުރަތަމަ މެޗު ހެނދުނު ފެށިގެން ދިޔައިރު, މުބާރާތުގެ ފައިނަލް ކުޅެފައިވަނީ ހަމަ އެދުވަހުގެ ރޭގަނޑު 8:30 ގައެވެ.
ފިރިހެން 6 ޓީމާއި, އަންހެން 4 ޓީމު ބައިވެރިވި މި މުބާރާތުގެ ފިރިހެން ޑިވިޝަނުގެ ފައިނަލް މެޗުގައި ބައްދަލުކޮށްފައި ވަނީ އެފް.ސީ ރިޖަލް އާއި އެސް.ޔޫ ވައިބްސް އެވެ. އަދި އަންހެން ޑިވިޝަނުގެ ފައިނަލް މެޗުގައި ބައްދަލުކުރީ ސެލެސްޓިއަލް އެސް.ސީ ފެމިނި އަދި އޯރގަނައިޒާސް އެފް.ސީ އެވެ. ދެ މެޗުގައި ވެސް ފޯރިގަދަ ކުޅުމެއް ފެނިގެން ދިޔައިރު ފިރިހެން ޑިވިޝަނުގެ ޗެމްޕިއަންކަން ހޯދައިފައިވަނީ އެފް.ސީ ރިޖަލް އެވެ. އަދި އަންހެން ޑިވިޝަނުގެ ޗެމްޕިއަންކަން ހޯދައިފައި ވަނީ ސެލެސްޓިއަލް އެސް.ސީ ފެމިނި އެވެ.
މުބާރާތުގެ އެންމެ މޮޅު ފިރިހެން ކުޅުންތެރިޔާގެ މަޤާމް އެފް.ސީ ރިޖަލްގެ މުހައްމަދު އުލްވާން ހޯދާފައި ވާއިރު މުބާރާތުގައި މޮޅު ކުޅުމެއް ދައްކާ އަންހެން އެންމެ މޮޅު ކުޅުންތެރިޔާގެ މަޤާމް ހޯދާފައިވަނީ ސެލެސްޓިއަލް އެސް.ސީ ފެމިނިގެ ޖަފްނާ އީސާ އެވެ.
މުބާރާތުގެ ފައިނަލް ބަލާލުމައްޓަކައި އަލްމަރްހޫމް އިޒްހާމްގެ އާއިލާއިން ދަނޑަށް ވަޑައިގެންނެވިއިރު, މުބާރާތުގެ ފައިނަލް މެޗް ޝަރަފްވެރިކޮށްދެއްވައި އެކި ވަނަތައް ލިބުނު ޓީމުތަކަށް އިނާމްދެއްވާފައިވަނީ މާލެ ސިޓީ ކައުންސިލްގެ ޑެޕިއުޓީ މޭޔަރ އަހްމަދު ނަރީޝް އެވެ.
