އެމްއެންޔޫއެސްޔޫ އިންޓަރ ފެކަލްޓީ ވޮލީ ބޯޅަ މުބާރާތް މާރޗް މަހު ފަށާއިރު މި މުބާރާތަށް ދުރާލާ ތައްޔާރުވުމުގެ ގޮތުން މެޑައްޔަށް ޓާގެޓްކޮށް ތަރަހައިގެ އަންހެން އަދި ފިރިހެން ވޮލީ ޓީމު ޕްރެކްޓިސް ފަށައިފިއެވެ.
އެމްއެންޔޫއެސްޔޫ ވޮލީ މުބާރާތުގައި ނިމިދިޔަ ދެ އަހަރު ވެސް ތަރަހައިން ވަނީ ވާދަކޮށްފައެވެ. އަދި މި މުބާރާތުގެ ގްރޫޕް ސްޓޭޖް ފަހަނައަޅައި ތަރަހައިގެ ޓީމަކަށް ސެމީ ފައިނަލާއި ހިސާބަށް ދެވިފައިވަނީ ނިމިދިޔަ 2019 ވަނަ އަހަރެވެ. އެގޮތުން 2019 ވަނަ އަހަރު ތަރަހައިގެ އަންހެން އަދި ފިރިހެން ޓީމު ވަނީ ސެމީއަށް ދަތުރުކޮށްފައެވެ. ތަރަހައިގެ އަންހެން ޓީމު ސެމީ އިން ބަލިވީ ތިން ސެޓު ދެ ސެޓުން މުބާރާތުގެ ރަނަރަޕް ޓީމު އެފްއެޗްއެސް އަތުން ބަލިވެގެންނެވެ. އަދި ތަރަހައިގެ ފިރިހެން ޓީމު ސެމީ އިން ބަލިވީ ވާދަވެރި ކުޅުމަކަށްފަހު މުބާރާތުގެ ޗެމްޕިއަން އެފްއެޗްޓީއެސް އަތުން ބަލިވެގެންނެވެ.
ތަރަހައިން މިއަހަރުގެ މުބާރާތަށް ނުކުންނައިރު އެޓީމުގެ ސްކޮޑް ފެނިގެންދާނީ މިދިޔަ އަހަރަށްވުރެ ވަރުގަދަ ކޮށެވެ. އެގޮތުން މި އަހަރުގެ ޓީމުގައި ވެސް މިދިޔަ އަހަރުގެ ޓީމުގައި ތިބި ބައެއް ކުޅުންތެރިން ތިބޭނެއެވެ. އެގޮތުން ކެޕްޓަން ޝަމްވީލާއި، ވައިސް ކެޕްޓަން ޝާހު މިއަހަރުގެ ޓީމުގައި ވެސް ހިމެނޭނެއެވެ.
ލިޔުނީ: މުހައްމަދު އަބާން
މީޑިއާ ކޯޑިނޭޓަރ (ތަރަހަ)
