އެމްއެންޔޫއެސްޔޫ އިންޓަރ ފެކަލްޓީ ވޮލީ މުބާރާތް (ފިރިހެން ޑިވިޝަން) ފުރަތަމަ ފަހަރަށް ތަރަހައިން ކާމިޔާބުކޮށް ތާރީހު ބަދަލުކޮށްލައިފިއެވެ.
މިއަހަރުގެ އެމްއެންޔޫއެސްޔޫ އިންޓަރ ފެކަލްޓީ ވޮލީ މުބާރާތާއި ތަރަހައިން ކުރިމަތިލީ ނިމިދިޔަ އަހަރުގެ ސެމީ ފައިނަލުންވި ބަލި ހަނދާން ނައްތައިލާ، މުބާރާތުގެ ތަށި ފުރަތަމަ ފަހަރަށް ހޯދުމުގެ އަޒުމުގައެވެ.
ކޯޗަކާއި ނުލައި ކުޅުނު ތަރަހައިގެ ޓީމުގައި ހިމެނޭ ކުޅުންތެރިންނަކީ ޗެމްޕިއަނުން ކަމަށް ތަރަހައިގެ ނައިބު ރައީސް (އިލްމީ) މުހައްމަދު އަބްދުﷲ ވިދާޅުވިއެވެ. މި މުބާރާތާއި ކުރިމަތިލީ ގޮންޖެހުންތަކަކާއިއެކުގައި ކަމަށް ވިދާޅުވަމުން މުހައްމަދު އަބްދުﷲ ވިދާޅުވީ ދިމާވި އެންމެ ބޮޑު ގޮންޖެހުމަކީ ޕްރެކްޓިސް ކުރާނެ އިންޑޯރ ކޯޓެއް ނުލިބުން ކަމަށާއި، ނަމަވެސް ތަރަހައިގެ ޓީމުގައި ތިބި ކުޅުންތެރިންނަކީ މި ލެވެލްގެ މުބާރާތެއްގައި ތަފާތު ދައްކާނެ ކުޅުންތެރިންތަކެއް ކަމުގެ ޔަގީންކަން އޮތް ކަމަށެވެ.
މި މުބާރާތުގެ ފިރިހެން ޑިވިޝަނުގެ ޗެމްޕިއަންކަން ތަރަހައިން ހޯދީ ކުޅުނު އެއްވެސް މެޗަކުން ބަލިނުވެ، އަދި އެއްވެސް ސެޓެއް އިދިކޮޅު ޓީމަށް ނުދީކަން ފާހަގަކޮށްލަން ޖެހެއެވެ.
އެމްއެންޔޫއެސްޔޫ އިންޓަރ ފެކަލްޓީ ވޮލީ މުބާރާތުގެ ފިރިހެން ޑިވިޝަނުގެ އެންމެ މޮޅު ކުޅުންތެރިޔަކީ ތަރަހައިގެ ޖާޒީ ނަމްބަރު 7 މުހައްމަދު ޝަމްވީލެވެ. މީގެ އިތުރުން އެންމެ މޮޅު ޒުވާން ކުޅުންތެރިޔާގެ މަގާމު ވެސް ހޯދައިފައިވަނީ ތަރަހައިގެ ކުޅުންތެރިޔެކެވެ. އެންމެ މޮޅު ޒުވާން ކުޅުންތެރިޔާގެ މަގާމު ހޯދައިފައިވަނީ ތަރަހައިގެ ޖާރޒީ ނަމްބަރު 10، މާދިހް މުހައްމަދެވެ. އަދި މި މުބާރާތުގެ އެންމެ މޮޅު ހަ ކުޅުންތެރިންގެ ތެރޭގައި ތަރަހައިގެ ދެ ކުޅުންތެރިޔަކު ވަނީ ހިމެނިފައިވެއެވެ. އެއީ ޖާރޒީ ނަމްބަރު 12 ކެޕްޓަން ހުސެއިން ޝާހު އާއި ޖާރޒީ ނަމްބަރު ހަތަރެއް އަހުމަދު މުޒްލިފް އެވެ.
ތަރަހައިގެ ރައީސް އަހުމަދު ޝާން ވިދާޅުވީ މިއީ ވަރަށް ވެސް ތާރީހީ ކާމިޔާބެއް ކަމަށާއި މިކާމިޔާބުގައި ތަރަހައަށް ސަޕޯޓްކޮށްދިން ހުރިހާ އެންމެނަށް ޝުކުރުއަދާކުރާ ކަމަށެވެ.
މި މުބާރާތުގައި ތަރަހައިގެ އަންހެން ޓީމުވެސް ވާދަކޮށްފައިވެއެވެ. ތަރަހައިގެ އަންހެން ޓީމު މުބާރާތުގެ ސެމީއިން ބަލިވީ އެމްއެންޔޫ ބީއެސް އަތުންނެވެ.
