ބިޒްނަސް ސްކޫލް ސްޓޫޑެންޓް އެސޯސިއޭޝަން އަދި ތަރަހަ ގުޅިގެން 2021 ވަނަ އަހަރުގެ ދެވަނަ ސެމިސްޓާގައި މި ދެ ގޮފި ނިސްބަތްވާ ފެކަލްޓީތައް ކަމަށްވާ އެމް.އެން.ޔޫ ބިޒްނަސް ސްކޫލާއި ސެންޓަރ ފޯ ފައުންޑޭޝަނަށް އަލަށް ގުޅުނު ދަރިވަރުންނަށް އަމާޒުކޮށް ”ބީ.އެސް.އެސް.އޭ ތަރަހަ ގާލާ ނައިޓް“ގެ ނަމުގައި ހަރަކާތެއް ކުރިއަށް ގެންގޮސްފިއެވެ.
ހުކުރު ދުވަހުގެ ރޭ ބިޒްނަސް ސްކޫލްގެ އޮޑިޓޯރިއަމްގައި ކުރިއަށް ގެންދިޔަ ގާލާ ނައިޓްގައި އެމް.އެން.ޔޫ.އެސް.ޔޫގެ ރައީސް އާއި ދެ ފެކަލްޓީގެ ރައީސުންގެ އިތުރުން އެމް.އެން.ޔޫ.އެސް.ޔޫގެ ކުރީގެ ރައީސް އަދި މިހާރުގެ އެޑްވައިޒަރީ ކޮމިޓީގެ މެމްބަރާއި ބިޒްނަސް ސްކޫލް ސްޓޫޑެންޓް އެސޯސިއޭޝަންގެ ކުރީގެ ރައީސް އަދި މިހާރު އެޑްވައިޒަރީ ކޮމިޓީގެ މެމްބަރުވެސް ވަނީ ދަރިވަރުންނާއި މުހާތަބުކޮށް ވާހަކަ ދައްކާފައެވެ.
އަލަށް ދެ ފެކަލްޓީއާއި ގުޅުނު ގިނަ ދަރިވަރުންތަކެއް މި ހަރަކާތުގައި ބައިވެރިވެފައިވާއިރު ގާލާ ނައިޓް ކުރިއަށް ގެންގޮސްފައިވަނީ ނުހަނު ފޯރިގަދަ ކޮށެވެ. އެގޮތުން ދަރިވަރުން ތަފާތު ގްރޫޕްތަކަށް ބަހާލެވި ދަރިވަރުންގެ މެދުގައި އިނާމު ލިބޭ ގޮތަށް ވަނީ ފޯރިގަދަ ކުޅިވަރުތައް ކުޅެފައެވެ. އަދި އެމް.އެން.ޔޫ.އެސް.ޔޫ ބޮޑުބެރު ގްރޫޕްގެ ހުށަހެޅުންތަކާއި ޘަޤާފީ ހުށަހެޅުންތައް ވެސް ގާލާ ނައިޓްގައި ވަނީ ފެނިގެން ގޮސްފައެވެ.
ހަމަ އެހެންމެ ގާލާ ނައިޓް ތެރެއިން އެމް.އެން.ޔޫ ލީޑާސް، ބޮޑުބެރު ގްރޫޕް، އަދި ގޮމަ ގްރޫޕާއި ގުޅެން ބޭނުންވާ ދަރިވަރުންނަށް ވަނީ އެ ފުރުސަތު ވެސް ފަހި ކޮށްދީފައެވެ.
ގާލާ ނައިޓް ފުރިހަމަ ކަމާއެކު ނިންމާލުމުގައި ބިޒްނަސް ސްކޫލް ސްޓޫޑެންޓް އެސޯސިއޭޝަން އަދި ތަރަހަ އަދި މި ދެ ގޮފީގެ އިސްވާރުންގެ އެއްބާރުލުން ވަނީ ނުހަނު ބޮޑަށް ލިބިފައެވެ.
ކޮންމެ ސެމިސްޓާއެއްގައި ވެސް އަލަށް ގުޅޭ ދަރިވަރުންނަށް ބާއްވާ ގާލާ ނައިޓް މިފަހަރު ބާއްވާފައިވަނީ ކޮވިޑް-19ގެ ޙާލަތާއެކު އައި މެދުކެނޑުމަކަށްފަހުގައެވެ. ގާލާ ނައިޓް ބޭއްވުމުގެ މައިގަނޑު ބޭނުމަކީ ދަރިވަރުންގެ މެދުގައި އެކުވެރިކަން އާލާކޮށް ދަރިވަރުން އެމް.އެން.ޔޫގެ މިފަދަ ހަރަކާތްތަކަށް އަހުލުވެރި ކުރުވުމެވެ.
