2021 ވަނަ އަހަރުގެ އެމް.އެން.ޔޫގެ ސެންޓަރ ފޯ ފައުންޑޭޝަން ސްޓަޑީޒް އަށް އަލަށް ގުޅޭ ދަރިވަރުންނަށް އަމާޒުކޮށްގެން ފެކަލްޓީއިން ބާއްވާ އޮރިއެންޓޭޝަން ބާއްވައިފިއެވެ.
އޮގަސްޓް 18 ވަނަ ދުވަހު ބޭއްވި މި އޮރިއެންޓޭޝަން ބާއްވާފައިވަނީ އެމް.އެން.ޔޫ ސެންޓްރަލް އޮޑިޓޯރިއަމް ގައެވެ. އެއް ދަންފަޅިއަކަށް ކުރިއަށް ގެންދިޔަ އޮރިއެންޓޭޝަންގައި ސެންޓަރ ފޯ ފައުންޑޭޝަންއާއި އަލަށް ގުޅުނު ގިނަ ދަރިވަރުންތަކެއް ވަނީ ބައިވެރި ވެފައެވެ.
އޮރިއެންޓޭޝަންގެ ތެރެއިން ދަރިވަރުންނަށް ސެންޓަރ ފޯ ފައުންޑޭޝަން ސްޓަޑީޒްގެ ކުޑަ ތަޢާރަފެއް ދީފައިވާއިރު، އެމް.އެން.ޔޫ އާއި ގުޅޭ ގިނަ މަޢުލޫމާތު ވެސް ފޯރުކޮށްދެވިފައިވެއެވެ. ހަމަ އެއާއެކު ދަރިވަރުންގެ އިދާރީ ހިދުމަތްތަކާއި، ކޯސްތަކުގެ މަޢުލޫމާތު ތަކާއި، ކޯސްތަކުގެ ފީއާއި، ޔުނިވަރސިޓީއިން ފޯރުކޮށްދޭ ޚިދުމަތްތަކުގެ މަޢުލޫމާތު ވެސް ހިއްސާ ކުރެވިފައެވެ. އޭގެ ފަހުގައި ދަރިވަރުންނަށް ވަނީ އެކުދިންނަށް ކިޔައިވައިދެއްވާނެ ލެކްޗަރާއިންނާއި އިދާރީ މުވައްޒަފުން ވެސް ތަޢާރަފް ކޮށްދީފައެވެ.
މީގެ އިތުރުން ސެންޓަރ ފޯ ފައުންޑޭޝަން ސްޓަޑީޒްގެ ވިންގް ކަމުގައިވާ ތަރަހައިގެ ކުޑަ ތަޢާރަފެއް ދަރިވަރުންނާއި ހިއްސާ ކުރެވި ތަރަހައިގެ މެމްބަރުންވެސް ވަނީ ތަޢާރަފް ކުރެވިފައެވެ. އަދި ތަރަހައިން އިސް ނަގައިގެން މި ސެމިސްޓަރގައި ކުރިއަށް ގެންދިއުމަށް ރާވައިފައިވާ ބައެއް ހަރަކާތްތަށް ވެސް ދަރިވަރުންނާއި ހިއްސާ ކޮށްފައިވެއެވެ.
ދަރިވަރުންނާއި ހިއްސާ ކުރެވުނު މަޢުލޫމާތުތައް އެކުދިންނަށް އެނގިފައިވާ މިންވަރު ވަޒަންކުރުމުގެ މަޤްސަދުގައި އޮންލައިން ކުއިޒެއްވެސް އޮރިއެންޓޭޝަންގައި ހިމަނާފައިވެއެވެ. އަދި ދަރިވަރުންގެ މެދުގައި އެކުވެރިކަން އާލާ ކުރުވުމަށާއި، އެމް.އެން.ޔޫ ސެންޓްރަލްގެ ތެރޭގައި ހުރި މުހިންމު ތަންތަން ދައްކާލާ، ކްލާސްތައް ހުންނަތަންތަން ފަސޭހައިން ހޯދޭނެ ގޮތްތައް ޝައުޤުވެރިގޮތެއްގައި ކިޔައިދިނުމަށްޓަކައި، ދަރިވަރުންގެ މެދުގައި ”ސްކެވެންޖާ ހަންޓް“ގެ ނަމުގައި ކުޅިވަރެއް ވެސް ކުޅެފައިވެއެވެ. މި ކުޅިވަރުގައި ދަރިވަރުން ގްރޫޕް ތަކަކަށް ބަހާލާފައިވާއިރު، ތަރަހައިގެ އިސްވާރުންވެސް ބައިވެރިވިއެވެ.
އޮރިއެންޓޭޝަންގެ ސަބަބުން ދަރިވަރުންނަށް ވަނީ އެމް.އެން.ޔޫ ގެ ގިނަ ޚިދުމަތްތަށް ލިބޭނޭ ގޮތް ދަސްވެފައެވެ. އަދި އެކުދިންގެ ނަޒަރުގައި އޮރިއެންޓޭޝަން ބޭއްވުމުގެ ސަބަބުން އެކުދިންގެ ހުރި ކަންބޮޑުވުންތަކަށް ހައްލު ލިބި ނުތަނަވަސްކަން ފިލާ ދިޔައެވެ.
އޮރިއެންޓޭޝަން ކާމިޔާބު ކަމާއެކު ނިންމާލެވުމުގައި ތަރަހައިގެ ވަރަށް ބޮޑު އެއްބާރުލުމެއް ވަނީ ލިބިފައެވެ. އެމް.އެން.ޔޫގެ ކޮންމެ ހަރަކާތެއްގައި ވެސް އެމް.އެން.ޔޫގެ ސްޓޫޑެންޓް ޔޫނިއަންއާއި، ސެންޓަރ ފޯ ފައުންޑޭޝަން ސްޓަޑީޒްގެ ފުރިހަމަ އެއްބާރުލުމާއި އެހީތެރިކަން އަބަދުވެސް ދަނީ ފޯރުކޮށްދެމުންނެވެ.
