ދިވެހިރާއްޖޭގެ ޤައުމީ ޔުނިވާސިޓީގެ ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް)ގައި ޤާއިމްކުރެވިފައިވާ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ގޮފި ތަރަހައިގެ ވެލްކަމް ނައިޓް ކާމިޔާބުކަމާއެކު ނިންމާލައިފިއެވެ.
ދެ އަހަރު ދުވަހުގެ މެދުކެނޑުމަކަށްފަހު 2022 ފެބުރުވަރީ 18ވީ ހުކުރު ދުވަހުގެ ރޭ އެފް.އީ ޕީއީ ހޯލްގައި ބޭއްވި ”ތަރަހަ ވެލްކަމް ނައިޓް 2022“ ގައި 80ށްވުރެ ގިނަ އާ ލީޑަރުންވަނީ ބައިވެރިވެފައެވެ. އެއާއެކު މި ނައިޓްގައި އެމް.އެން.ޔޫ.އެސް.ޔޫ.އާއި ތަރަހައާ ގުޅޭ ގޮތުން އަލަށް ގުޅުނު ލީޑަރުންނަށް ވަނީ ތައާރަފެއް ދީފައެވެ. އަދި ދަރިވަރުންގެ މެދުގައި އެކުވެރިކަމާއި ވާދަވެރިކަމުގެ ރޫހު އުފެއްދުމުގެ ގޮތުން ގިނަ ކުޅިވަރުތަކެއް ވެސް ވަނީ ކުޅެފައެވެ. މި ހަރަކާތްތަކަށް ހުރިހާ ދަރިވަރުންގެ ތަރުހީބު ވެސް ފުރިހަމައަށް ވަނީ ލިބިފައެވެ. އެއާއެކު ކުޅިވަރުތަކުން މޮޅުވި ގްރޫޕްތަކާއި ވަކި ވަކި ކުދިންނަށްވަނީ އިނާމު ދީފައެވެ.
މި ”ވެލްކަމް ނައިޓް“ގައި އެމް.އެން.ޔޫ.އެސް.ޔޫ.ގެ ރައީސް ހުސައިން ޒައިދު އަލަށް ގުޅުނު ލީޑަރުންނާ މުޚާތަބުކުރެއްވިއިރު، ޒައިދުވަނީ ކޮންމެ ކުއްޖެއް ވެސް ހަރުދަނާ އިސްވާރަކަށް ވުމަށް ޓަކައި ހިތްވަރާއެކު މަސައްކަތްކުރުމަށް ގޮވައިލައްވައިފައެވެ.
މި އިވެންޓަކީ ތަރަހައިގެ ލީޑަރުންގެ ބޮޑު އެއްބާރުލުމެއް ލިބިގެން ހިންގި އިވެންޓެކެވެ. އަދި އެމް.އެން.ޔޫ.އެސް.ޔޫގެ ބޮޑުބެރު ޓީމްގެ ފަރާތުން ވަރަށް ފުރިހަމަ މުނިފޫހިފިލުވުމުގެ ހަރަކާތްތަކެއް ވަނީ ހުށަހަޅާފައެވެ. ހަމައެއާއެކު ތަރަހައިގެ ބެލެނިވެރި ފަރާތްކަމަށްވާ އެމް.އެން.ޔޫ.އެސް.ޔޫ.ގެ ހިންގާ ކޮމިޓީގެ މެމްބަރުންގެ ފުރިހަމަ އެއްބާރުލުން ވެސް ލިބިފައިވެއެވެ.
އެހެންކަމުން ބޮޑުބެރު ޓީމަށާއި އެމް.އެން.ޔޫ.އެސް.ޔޫ ހިންގާ ކޮމެޓީ އަށް ތަރަހަ އިން ވަނީ ވަރަށް ޚާއްސަ ޝުކުރެއް އަދާކޮށްފައެވެ.
ތަރަހައިގެ ވެލްކަމް ނައިޓްގައި ދަރިވަރުންނާ މުޚާތަބު ކުރައްވަމުން ތަރަހައިގެ ހިންގާ ކޮމެޓީގެ މި ދައުރުގެ ރައީސާ އާމިނަތު ނިޝްފާ ވަނީ ކިޔެވުމަށް އިސްކަންދެމުން އިތުރު ހަރަކާތްތަކުގައި އުޅެ ބައިވެރިވުމަށް ނަސޭހަތްތެރިވެލައްވާފައެވެ. އަދި ކޮންމެ ކުއްޖަކު ވެސް އަޚްލާޤީ ގޮތުން އެހެން ކުދިންނަށް ނަމޫނާ ދައްކާ ކުދިންތަކަކަށް ވުމަށް ނަސޭޙަތްތެރިވެފައެވެ.
މި ވެލްކަމް ނައިޓްގެ އެންމެ ބޮޑު ބޭނުމަކީ އަލަށް ގުޅުނު ދަރިވަރުންނަށް މަރުޙަބާ ކިޔައި، އެ ދަރިވަރުންނަށް އުފާވެރި ވަގުތުކޮޅެއްގެ ތެރެއިން، އެހެން ދަރިވަރުންނަށް ތައާރަފުވެ ދަސްކުރުމުގެ ފުރުސަތު ފަހިކޮށްދިނުމެވެ. އަދި ދަރިވަރުންނަށް އެމް.އެން.ޔޫ.އެސް.ޔޫ އާއި ތަރަހައިގެ މައުލޫމާތުތައް ހިއްސާކުރުމެވެ.
ތަރަހައިގެ އަމާޒަކީ ސީ.އެފް.އެސް.ގެ ދަރިވަރުންގެ ތެރެއިން ހިންގުންތެރި ހަރުދަނާ ދަރިވަރުންތަކެއް ބިނާކުރުމެވެ.
