ދިވެހިރާއްޖޭގެ ޤައުމީ ޔުނިވަރސިޓީގެ ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) އާ އަލަށް ގުޅުނު ދަރިވަރުންނަށް އޮރިއެންޓޭޝަން ބާއްވައިފިއެވެ.
2022 އޮގަސްޓް 10 ވީ ބުދަ ދުވަހު އެމްއެންޔޫގެ މައި ކެމްޕަހުގެ އޮޑިޓޯރިއަމްގައި ބޭއްވިގެން ދިޔަ ސެޝަން ރާވާ ހިންގުމުގައި އުޅުނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ގޮފި ތަރަހައިގެ އިސް ފަރާތްތަކުންނާއި ސީ.އެފް.އެސް ގެ ޓީމާ ގުޅިގެންނެވެ. ހަމައެއާއެކު ތަރަހައިގެ ލީޑަަރސް ގްރޫޕުގައި ހިމެނޭ އިސްވާރުން ވެސް ވަނީ ބައިވެރިވެފައެވެ.
ގާތްގަނޑަކަށް 100 އެެއްހާ ދަރިވަރުން ބައިވެރިވި މި އޮރިއެންޓޭޝަން ގައި ވަނީ އެމްއެންޔޫ އިން ދަރިވަރުންނަށް ހުޅުވިފައިވާ އެތަކެއް ފުރުސަތު ތަކެއް ކިޔައިދީފައެވެ. އެގޮތުން އެމް.އެން.ޔޫ.އެސް.ޔޫ އާއި ތަރަހަ އާ ގުޅޭގޮތުން ދަރިވަރުންނަށް ވަނީ މައުލޫމާތު ދެވިފައެވެ. ހަމައެހެންމެ ލީޑަރސް ގްރޫޕަށް ވަންނަން ބޭނުންވާ ދަރިވަރުންނަށް ވަނީ އެފުރުސަތު ހުޅުވާލެވިފައެވެ.
މި ސެޝަން ގައި ސީ.އެފް.އެސްގެ ޑީން ވަނީ ދަރިވަރުންނާ މުޙާތަބުކޮށް ވަރަށް ފުން މާނަހުރި އެތަކެއް ވާހަކަ ތަކެއް ކިޔައިދީފައެވެ. އަދި ސީ.އެފް.އެސް ގެ ކުރީގެ ދަރިިވަރު އަދި ތަރަހައިގެ 8 ވަނަ ދައުރުގެ ނައީބު ރައީސާ (އިތުރު ހަރަކާތް) ކަމުގައިވާ، ފާތިމަތު މާސާ ސަޢީދު ވަނީ ސީ.އެފް.އެސް ގެ ތަޖުރިބާ ހިއްސާކޮށްފައެވެ.
މި ސެޝަން ނިމިގެންދިޔައި އުފާވެރި މާހައުލެއްގެ ތެެރެއިންނެވެ. އެގޮތުން ދަރިވަރުން އެކަކު އަނެކަކާ ގުޅުން ބަދަހި ކޮށްލާ އެކުވެރި މާހައުލެއް އުފެދިގެން އައީ ތަރަހައިގެ އިސްވާރުން ކުރިއަށް ގެންދިޔަ ހަރަކާތްތަކުގެ ސަބަބުންނެވެ.
ކޮންމެ ސެމިސްޓަރ އެއްގައި އަލަށް ކޯސްތަކާ ގުޅޭކުދިންނަށް މިފަދަ އޮރިއެންޓޭޝަން ތަކެއް ދަނީ ހިންގަމުންނެވެ. ކުރީ ސެމިސްޓަރުތަކެކޭވެސް އެއްފަދައިން މި ސެމިސްޓަރަކީ ވެސް ދަރިވަރުންނަށް އެކި ގޮތް ގޮތުން ކުރިއެރުން ލިބޭނެ ސެމިސްޓަރަކަށް ވުމަކީ ތަރަހައިގެ އުންމީދެކެވެ.
