ސްޓޫޑެންޓްސް އިނިޝިއޭޓިވްސް އޮފް އާރޓްސް (ސިއާ) އަދި ތަރަހަ ގުޅިގެން 2022 ވަނަ އަހަރުގެ 2 ވަނަ ސެމިސްޓަރުގައި ސެންޓަރ ފޯ ފައެންޑޭޝަން ސްޓަޑީޒް އާއި ފެކަލްޓީ އޮފް އާރޓްސްއާ އަލަށް ގުޅުނު ދަރިވަރުންނަށް ހާއްސަކޮށްގެން ”ސިއާ-ތަރަޙަ ވެލްކަމް ނައިޓް“ ނަމުގައި ވެލްކަމް ނައިޓެއް ވަރަށް ކާމިޔާބު ކަމާއެކު ބާއްވައިފިއެވެ.
2 ސެޕްޓެންބަރު 2022ވީ ހުކުރު ދުވަހު އެފް.އީ ޕީއީ ހޯލްގައި ބޭއްވިގެން ދިޔަ މި ވެލްކަމް ނައިޓްގައި 60 އެއްހާ ދަރިވަރުން ވަނީ ބައިވެރި ވެފައެވެ. ހަމަ އެއާއެކު މި ހަރަކާތުގައި ދަރިވަރުންގެ ޔޫނިއަންގެ މިހާރުގެ ހިންގާ ކޮމެޓީގެ ބައެއް މެންބަރުންނާއި ސިއާ އަދި ތަރަހައިގެ ހިންގާ ކޮމެޓިގެ މެންބަރުން ވަނީ ބައިވެރި ވެފައެވެ. އަދި ގާތް ގަނޑަކަށް 30 އެއްހާ އިސްވާރުންނާއި އެމް.އެން.ޔޫ.އެސް.ޔޫ ގެ ބޮޑުބެރު ޓީމް ވެސް ވަނީ ހަރަކާތްތެރިވެފައެވެ.
ދަރިވަރުންގެ ޔޫނިއަންގެ ހިންގާ ކޮމެޓީ އަލަށް ގުޅުނު ދަރިވަރުންނަށް ތަޢާރަފް ވެގެން ދިއުމާއެކު ދަރިވަރުންނަށް ހުޅުވިފައިވާ ފަހި ފުރުސަތުތައް ވަނީ ދަރިވަރުންނާއި ހިއްސާ ކުރެވިފައެވެ. ހަމައެއާއެކު ލީޑާރސް ގްރޫޕަށް ގުޅުމަށް ދަރިވަރުންނަށް ވަނީ ފުރުސަތު ހުޅުވާލެވިފައެވެ.
ހަމައެއާއެކު ތަރަހައިގެ 7 ވަނަ ދައުރުގެ ހިންގާ ކޮމެޓީގެ މެންބަރުން ވެސް ވަނީ ތައާރަފް ވެފައެވެ. އަދި އެމް.އެން.ޔޫ.އެސް.ޔޫ ބޮޑުބެރު ގުރޫޕް ވެސް ދަރިވަރުންނަށް ތަޢާރަފް ކޮށްދީ ބޮޑުބެރު ގުރޫޕް އަށް ގުޅުމަށް ވަނީ ފުރުސަތު ހުޅުވާލެވިފައެވެ.
މި ހަރަކާތް މިހާ ފުރިހަމަ ކޮށް ނިމިގެން ދިޔައީ ތަރަހަ އަދި ސިއާގެ ހިންގާ ކޮމެޓީގެ ފުރިހަމަ އެއްބާރުލުމާއެކުއެވެ. އަދި ހަމަ އެހެންމެ އިސްވާރުންގެ ވެސް ބުރަ މަސައްކަތާއެކުއެވެ.
މި ހަރަކާތް ކުރިއަށް ގެންދިޔުމުގެ މައިގަނޑު މަގްސަދަކީ ދަރިވަރުންގެ މެދުގައި އިތުރަށް ގުޅުން ބަދަހިކޮށް ކިޔެވުމުގެ އިތުރުން އިތުރު ހަރަކާތްތަކުގައި ދަރިވަރުން ބައިވެރި ކުރުމަށް ހިތްވަރު ދިނުމެވެ.
މިހަރަކާތަކީ ސިއާ އަދި ތަރަހަ ގުޅިގެން ފަހުގެ ތާރީހެއްގައި ކުރިއަށް ގެންދިޔަ ފުރަތަމަ ހަރަކާތެވެ.
