ސެންޓަރ ފޯ ފައުންޑޭޝަން ސްޓަޑީސްއަށް މިއަހަރު އަލަށް ގުޅުނު ދަރިވަރުންނަށް ބޭއްވުނު ”ތަރަހަ މެޖިކަލް ރޫކީސް ނައިޓް 2023“ ކާމިޔާބު ކަމާއެކީ ނިންމާލައިފިއެވެ.
28 ފެބުރުވަރީ 2023 ވީ އަންގާރަ ދުވަހުގެރޭ އެފް.އީ އޮޑިޓޯރިއަމްގައި ބޭއްވުނު މި ނައިޓްގައި ޖުމްލަ 90 އަށް ވުރެ ގިނަ ދަރިވަރުން ބައިވެރިވެފައި ވެއެވެ.
އިވެންޓް ފެށިގެން ދިޔައީ ތަރަހައިގެ ކުރީގެ އަދި މިހާރުގެ ހިންގާ ކޮމިޓީގެ ތަޢާރަފްވުމަކަށް ފަހުގައެވެ. އަދި ސެންޓަރ ފޯ ފައުންޑޭޝަން ސްޓަޑީސްގެ ބިޒްނަސް ޑިޕާޓްމެންޓުގެ އެޗް.އޯ.ޑީ އައިޝަތު ރިހުލާ (ރިހުލާ މިސް) އަދި ސީ.އެފް.އެސްގެ ލެކްޗަރާރ އަދި ކުރީގެ ސްޓޫޑެންޓް ޑީން ނާދިޔާ އަޙްމަދު ވެސް ވަނީ ވާހަކަދައްކަވާފައެވެ. މީގެ އިތުރުން އެމް.އެން.ޔޫ.އެސް.ޔޫގެ ހިންގާ ކޮމެޓީގެ މެންބަރުންނާއި އެމް.އެން.ޔޫ ކައުންސިލްގެ ސްޓޫޑެންޓް ރިޕްރެޒެންޓޭޓިވް އިބްރާހިމް ޣާނިމްވެސް ދަރިވަރުންނާ ވާހަކަ ދައްކަވައި މުޚާތަބު ކުރިއެވެ.
ސީ.އެފް.އެސްގެ ހެޑް އޮފް ސެންޓަރ ނާސިހާ އަބްދުލްމުޙައިމިން ދަރިވަރުންނާ މުޚާތަބުކޮށް ދަރިވަރުން ކިޔެވުމާ އެއްވަރަށް އިތުރު ޙަރަކާތުގައިވެސް ޝާމިލުވެ އުޅުމަށް ނަސޭހަތްތެރި ވިއެވެ. މީގެ އިތުރުން މި ޙަރަކާތުގައި ތަފާތު އެކި ކުޅިވަރުތައް ކުޅެ ދަރިވަރުންނަށް އެކަކު އަނެކަކު ދެނެގަނެ އުފާވެރި މާހައުލެއްގައި ގުޅުން ބަދަހިކޮށް، މަޖާކޮށްލާ އެކުވެރިކަން އާލާކުރުމުގެ ފުރުސަތު ލިބުނެވެ. މި ޙަރަކާތުގައި ސީ.އެފް.އެސްގެ ދަރިވަރު އަޙްމަދު ޒަފާފު (ޒެޕޯ)ގެ ”ކަރެއޯކޭ ވިތު ޒެޕޯ“ ގެ އިތުރުން އެމް.އެމް.ޔޫ.އެސް.ޔޫ ބޮޑުބެރުގެ ހިތްގައިމު ހުށަހެޅުމެއް ވެސް ކުރިއަށްދިޔައެވެ. މި ޙަރަކާތް ނިމިގެން ދިޔައީ ސީއެފް.އެސްއިން ދަރިވަރުންނަށް ދިން ”ޕިއްޒާ ޕާޓީ“ އަކުންނެވެ.
ތަރަހަ މެޖިކަލް ރޫކީސް ނައިޓް 2023 މިހާ ފުރިހަމައަށް ބޭއްވިގެން ދިޔަ ކަމަށްޓަކައި ހުރިހާ އިސްވާރުންނަށް އެކުދިންގެ ހިތްވަރަށާއި މަސައްކަތަށް ތަރަހައިގެ ފަރާތުން ޝުކުރު އަދާކުރިއެވެ. މީގެ އިތުރުން ސީ.އެފް.އެސްގެ ދަރިވަރު އަޙްމަދު ޒަފާފު (ޒެޕޯ) އަށާއި، އެމް.އެން.ޔޫ.އެސް.ޔޫ ބޮޑުބެރު، އެމް.އެން.ޔޫ.އެސް.ޔޫ މީޑިއާ އަދި ޚާއްސަކޮށް ސީ.އެފް.އެސްގެ ބައެއް ލެކްޗަރާރސްއަށް އެބޭފުޅުން ދެއްވި އެހީތެރިކަމަށް ފަށްފަށުން ޝުކުރު ދެންނެވިއެވެ.
ތަރަހައިން ސިލްސިލާ ގޮތެއްގައި ބާއްވަމުން އަންނަ މި ޙަރަކާތުގެ މައިގަނޑު މަޤްސަދަކީ ސީ.އެފް.އެސްއަށް އަލަށް ގުޅޭ ދަރިވަރުންނަށް އެކުވެރި މަޖާ މާޙައުލެއް ޤާއިމްކޮށްދީ، ސީ.އެފް.އެސް އަދި ތަރަހައަކީ ދަރިވަރުންނަށްޓަކައި، ދަރިވަރުންނާއި އެކުގައި އަބަދުވެސް ތިބޭނެ ބައެއްކަމަށް އެކުދިންނަށް ދައްކައިދިނުމެވެ.
ތަރަހައިގެ އުންމީދަކީ އަލަށް ގުޅުނު ދަރިވަރުންވެސް އެމް.އެން.ޔޫ.އެސް.ޔޫއާއި ތަރަހައިން ބާއްވާ ޙަރަކާތްތަކުގައި އެއްބާރުލުން ދިނުމެވެ.
