ތަރަހައިގެ ފަސްވަނަ ”މޫވީ ނައިޓް“ ކާމިޔާބުކަމާއެކު ނިންމާލައިފިއެވެ.
މި މޫވީ ނައިޓް ބާއްވާފައިވަނީ ނިމިދިޔަ ބުރާސްފަތި ދުވަހުގެރޭ 7:45 ގައި އެމް.އެން.ޔޫ ސީ.އޭ އޮޑިޓޯރިއަމްގައެވެ. މި މޫވީ ނައިޓްއަކީ މިއަހަރު ތަރަހައިން ބޭއްވި އެންމެ ކާމިޔާބު މޫވީ ނައިޓްގެ އިތުރުން މިއަހަރު މިހާތަނަށް ބޭއްވި އިވެންޓްތަކުގެ ތެރެއިން އެންމެ ކާމިޔާބު އިވެންޓްވެސް މެއެވެ. މިފަހަރުގެ މޫވީއަކަށް އަޅުވާފައިވަނީ އިނގިރޭސި މޫވީއެއް ކަމަށްވާ ”ދަ ނަން 2“ އެވެ. އެގޮތުން މިފަހަރުގެ މޫވީ ނައިޓަށް 200 އަށް ވުރެ ގިނަ ޓިކެޓް ވަނީ ވިކިފައެވެ. މީގެ އިތުރުން މި އިވެންޓްގައި ސޮސެޖް، މަޖާ އަދި ކޯކްގެ އިތުރުން ސްޕްރައިޓް ވެސް ވަނީ ފަންޑް ރައިޒް ކުރުމުގެ ގޮތުން ވިއްކާފައެވެ.
މޫވީ ނައިޓް ފަދަ އިވެންޓް ތަކަކީ ތަރަހައިން ރާވާ ހިންގުމަށް ހަމަޖެހިފައިވާ އެހެނިހެން އިވެންޓްތައް ކުރިއަށް ގެންދިޔުމަށް ބޭނުންވާ ބަޖެޓް ހަމަޖެއްސުމުގެ ގޮތުން ބާއްވާ އިވެންޓްތަކެވެ. ހަމައެއާއެކު މިފަދަ އިވެންޓްތަކުގެ ސަބަބުން ދަރިވަރުން މެދުގައި އެކުވެރިކަން އުފެދި، ކިޔެވުމުން ބްރޭކެއް ލިބި ސިކުނޑި ހަމަޖެހުމަށް ލިބޭ ފުރުސަތަކަށް ވެގެންދެއެވެ. ނިމިދިޔަ މޫވީ ނައިޓަކީ ތަރަހައިގެ ފަސްވަނަ މޫވީ ނައިޓަށްވި ކަމުގައި ވިޔަސް މީގެ ކުރިންވެސް ވަނީ މޫވީ ނައިޓްތަކެއް ބާއްވާފައެވެ. ކުރިއަށްއޮތް ދުވަސްތަކުގައިވެސް އިތުރު މޫވީ ނައިޓްތައް ބޭއްވުމަކީ ތަރަހައިގެ އަމާޒެކެވެ.
